Markusï 7:1-37
7 Jimajkani, fariseuecha ka karariicha máru engaksï Jerusaléni uératini jupka, jurhasptiksï andarhierani Jesúsini.
2 Ka exesptiksï eskaksï Jesúsiiri chúxapatiicha máru jájkurhatini tʼirexapka, eskaksï no jupajkuspka.*
3 —Fariseuecha ka iámindu judiuechaksï pʼindesti jupajkukuarheni kodurhu jamberi ante deksï tʼireni jimbokaksï no uékasïnga jurajkuni imani ambe engaksï ióntki anapuecha pʼindepka úni.
4 Ka engaksï na niántajkia plasisï uératini, orhetaksï jikuasïndi para tʼireni. Ístuksï no uékasïndi jurajkuni imani ambe engaksï ióntki anapuecha pʼindepka úni, komueska itsïirhu inchamaani kopeechani, tsúntsuechani* ka jatakua ambe kobriiri—.
5 Jimboksïsï fariseuecha ka karariicha kurhamarhipti: “¿Andiksïsï chiiti chúxapatiicha no újki ambe engaksï ióntki anapuecha pʼindepka úni? ¿Andiksïsï no jupajkujki para tʼireni?”.
6 Ima arhiaspti: “Ísku apariicha, jimbosï Isaíasi tʼuini uandarini japtia chaari ambe jima enga arhijka: ‘I kʼuiripuechajtsïni uandakua jimbojku kʼéri ambe arhisïndi, joperujtsïni no mintsita jingoni xénchasïndi.
7 Méntku no marhuasïndi engajtsïni ísï kʼéri ambe arhini jarhajka, jimbokaksï jorhentpisïnga imani ambe engaksï kʼuiripuecha juramujka’.
8 Chájtsï jurajkuska ambe enga Tata Diosï juramujka ka sánderujtsï imani ambe úsïnga ambe engaksï kʼuiripuecha pʼindeka úni”.
9 Ka útasteru arhiaspti: “¡Chájtsï kʼóru jirinhakuntasïnga néna jurajkuni ambe enga Tata Diosï juramujka parajtsï no jurajkuani chaari pʼindekuechani!
10 Jimboka Moisési uandaska: ‘Janhanharhi chiiti taatini ka chiiti naandini’ ka ‘Uándikunhaati ima enga no sési ambe uandaaka taati jémbeeri o amambeeri’.
11 Joperujtsï chá uandasïnga: ‘Nema uaati arhini taati jémbani o amambani: “Iámindu ambe engani jatsika engakeni jimbo úpiringa jarhuatani, kéjtsïtaaka”’,* —o intsïmperata máesti engani Tata Diosïni aiakuka—.
12 Ka indeni jimbo, chájtsï pʼíngusïnga ini kʼuiripuni para jarhuatani taati jémbani o amambani.
13 Jimajkani chaari pʼindekua ambe jimbo engajtsï jorhentpijka ka máteru indeeni jásï ambe jimbo engajtsï újka, chájtsï nóteru úxakaia ambe enga Tata Diosïiri uandakua arhijka”.
14 Jiájkani ménderu arhiaspti kʼuiripuechani eskaksï andarhierapiringa ka arhiaspti: “Kurhaa je ka kurhangunta je ambe engani ji uandani jaka.
15 Kʼuiripuni ma no ima ambesï tsïjpajti ambe enga arhajka, sino ima ambesï tsïjpajti ambe enga uandajka”.
16 *
17 Enga Jesúsi jurajkuapkia kʼuiripuechani, kʼumanchikuarhu ma inchaspti ka imeeri chúxapatiichaksï ueenaspti kurhamarhini ambe arhikuekasïreeni inde ejemplu.
18 Ka Jesúsi arhiaspti: “¿Andi chájtu útasï no úxaki kurhanguni? ¿Andi nójtsï exesïni eska no akua ambesï tsïjpajka kʼuiripuni ma?
19 Jimboka no imeeri mintsitarhusï niárajka sino imeeri sïturhirhu ka tátsekua petantasïndi”. Ísï uandaparini, arhikuekaxapti eska iámindu jásï tʼirekua ambakitiiska.
20 Ka ístu uandaspti: “Ambe enga uandajka kʼuiripu ma, inde ambesï tsïjpajti.
21 Jimboka mintsitarhu uérasïnga no sési jásï eratsekua ambe komueska: ísku jándikua,* sïpani, uándikpini,
22 enga acheeti enganiarijka témbani,* tsititspeni jámani, no sési jásï ambe niátani, chkuanderani, no sáni kʼuratsekua jingoni niátani no sési jásï ambe,* enbidiarpini, no sési ambe uandani Tata Diosïiri ambe, kʼéramakuarhini ka no eratsekua jingoni jámani.
23 Iámindu i no sési jásï ambe jindeesti enga mintsitarhu uérajka ka i ambesï tsïjpajti kʼuiripuni ma”.
24 Enga Jesúsi na uéntapkia jima uératini, Tiru ka Sidónisï niraspti. Ka kʼumanchikuarhu ma inchaspti jimboka no uékasïreenga eska kʼuiripu mítepiringa eska jima jarhaspka, joperu niáraspti mítekuarhini.
25 Enga Jesúsi na jima niárapka, uarhiiti ma enga kurhaapka Jesúsiiri ambe, nanakani ma kánguarhisïreendi enga no sési jásï espiritu ma incharhitini japka. Uarhiiti jurhaspti andarhierani Jesúsini ka tinguikuatsespti.
26 Ka uarhiiti méntku úndaxapti arhini Jesúsini eska petarhitantapiringa no sési jásï espirituni imeeri uájpani. —Uarhiiti griegu uandasïreendi ka Fenisia anapuespti* enga Siria jaka—.
27 Joperu Jesúsi arhispti: “Jurajku eskaksï uájpeecha orheta sési uiniarhaaka, jimboka no sési jarhaska uájpeechani euamukuani kurhindani para uíchu sapirhatiichani kʼuanikukuani”.
28 Ka uarhiiti arhispti: “Ísïisti, tata, joperuksï uíchu sapirhatiicha jamberi engaksï mesarhu inchajchukutini jarhajka, ántskantasïndiksï ambe engaksï sapiicha uéjkujka”.
29 Jimajkani Jesúsi arhispti: “Níia níntani ka ásteru uandanhiaia. Jimbokari indeni ambe uandaska, demoniu uérhintastia chiiti nanakani”.
30 Ísï jimbo, uarhiiti níntaspti imeeri kʼumanchikuarhu ka enga niántapkia, exespti eska imeeri nanaka tʼuini apojtsïkuspkia ka eska demoniu uérhintaspkia.
31 Jimajkani Jesúsi uéntaspti Tiru uératini, ka Sidóni ka Dekápolisisï* nitamaspti para Galilea anapu marirhu niárani.
32 Ka pákusptiksï acheetini ma enga no ueenga kurhaani ka enga no ueenga sési uandani ka méntkuksï úndaxapti arhini eska pʼájtsïkupiringa.
33 Tátsekua, Jesúsi támu páspti imani acheetini, jima enga no nema japka. Tsimapuru pʼándikuspti ka enga na tʼuátapkia, pʼárhikuspti imeeri katambani.
34 Ka auandarhisï eranchespti, kʼéri ma kʼarhanguntaspti* ka arhispti “Éffata”, enga arhikuekajka “Mítakuarhi”.
35 Ka acheeti jirejiresï ambandirantaspti ka úspti kurhaani ka ístu kuataperantaspti imeeri katambani ka úsptia sési uandani.
36 Jimajkani Jesúsi arhiaspti kʼuiripuechani eskaksï no nemani jámapiringa aianguni. Joperu enga ima sánderu ísï arhiauenga, imeechaksï sánderu sóntku uandantasïreendi.
37 Ka kʼuiripuechaksï ísku pakarasïreendi ka uandasïreendiksï: “I achamasï méntku iámindu ambe sési úsïndi. ¡Kurhanditaraasïndi imeechani engaksï no újka kurhaani ka uandaraasïndi imeechani engaksï no újka uandani!”.
Notecha
^ Fariseuecha ka judiuechaksï pʼindespti jupajkukuarheni, joperuksï imeecha újtsïkuarhespti indeni pʼindekuani.
^ O “itsï jatakuechani”.
^ O “korbániisti”.
^ Exe je ambe enga arhijka nota enga Mateu 17:21 jimbo jaka.
^ Uandakua enga griegu jimbo jindeeka pornéia, uánikua ambe arhikuekasïndi. Exe je Glosario, ísku jándikua ambe.
^ Exe je Glosario, enganiarpini; ísku jándikua ambe niátani.
^ Uandakua griegu jimbo jindeesti asélgueia. Exe je Glosario, no sáni kʼuratsekua jingoni niátani no sési jásï ambe.
^ O “andajpenuspti”.
^ O “Diesi Ireteecharhisï”.
^ O “kʼarhanchikuarhintaspti”.
