Markusï 8:1-38
-
Jesúsi tʼireraasïndi 4 mili achamasïichani (1 a 9)
-
Arhisïndiksï eska exerauaka mínda ma (10 a 13)
-
Fariseuecheeri ka Erodesiiri xarhipiti (14 a 21)
-
Ambakerantasïndi achamasïni ma enga no ueenga exeni Betsaida (22 a 26)
-
Pedru uandasïndi eska Jesúsi jindeeska Kristu (27 a 30)
-
Jesúsi uandasïndi eska uándikunhaaka (31 a 33)
-
Ambe enga jatsika para úni ima enga Jesúsini chúxapajka (34 a 38)
8 Imani jurhiatikuecha jimbo, ménderu uánikua kʼuiripu tánguarhintaspti. Ka jimbokaksï no ma ambe kámaxapka para arhani, Jesúsi ióarhiaspti imeeri chúxapatiichani ka arhiaspti:
2 “Mintsita jingoni pʼamojkuasïnga ini kʼuiripuechani, jimbokaksï tanimu jurhiatikua jámaskia jíndeni jingoni ka nóksï ambe ma kámaxati para arhani.
3 Engani ískuni* axaantaska, xanharu jimboksï mirikurhiati.* Máruksï iauani uératini jurhasti”.
4 Ka imeeri chúxapatiichaksï arhispti: “Joperu iauanchi jámaxaka, ¿nani pʼiua kʼuiripu ma kurhinda para xáni uánikua kʼuiripuni íntskuni?”.
5 Jimajkani kurhamarhiaspti: “¿Namuntsï kurhinda kámaxaki?”. Imeechaksï mókukuspti: “Siete echakua”.
6 Ísï jimbo, Jesúsi arhispti kʼuiripuni eska uaxandepiringa. Tátsekua, pʼíkuspti siete echakua kurhinda, diosmaiamukua arhispti Tata Diosïni, arhukuaspti ka íntsaaspti imeeri chúxapatiichani paraksï kʼuiripuechani intsïtaani ka imeechaksï intsïtaaspti kʼuiripuechani.
7 Ístuksï kámaxapti namunitu kurucha sapirhatiichani, ísï jimbo, enga na kómarhipkia Tata Diosïni,* arhiaspti imeeri chúxapatiichani eskaksï ístu intsïtaapiringa kʼuiripuechani.
8 Ísï jimbo, iáminduechaksï tʼirespti ka sésiksï uiniarhaspti. Ka tánantasptiksï kurhindani enga pakarapka ka siete kʼérati tsïkiataksï uinirini tánantaspti.
9 Ma 4 mili achamasïichaksï jarhaspti jima. Tátsekua, Jesúsi axaantaspti kʼuiripuechani.
10 Jesúsi jirejiresï jatantaspti barkurhu imeeri chúxapatiicha jingoni ka Dalmanutisï niáraspti.
11 Ka jurhasptiksï fariseuecha ka ueenasptiksï no sési arhini Jesúsini ka méntkuksï arhixapti eska exeraapiringa auandarhu anapu mínda* ma, jimbokaksï uékasïreenga tsʼéjkuni.
12 Jesúsi mintsitarhu* uératini kʼéri ma kʼarhanguntaspti* ka uandaspti: “¿Andijtsïsï chá iásï anapu kʼuiripuecha méntku uékani jaki mínda ma exeni? Jíksïni sési jimbo arhisïnga eskaksï iásï anapu kʼuiripuecha no ma mínda exeaka”.
13 Enga na ísï arhiapkia, kéndikuspti ka jima jurajkuaspti, ménderu jatantaspti barkurhu ka jiniani uanamukuteni niraspti.
14 Joperu imeeri chúxapatiichaksï mirikurhispti kurhinda páni. Nóksï ambe ma kámaxapti barkurhu, máechakua kurhindajkuksïsï kámani japti.
15 Ka Jesúsi arhiaspti: “Xéparini je. Jingontku jáma je fariseuecheeri xarhipiti* jingoni ka Erodesiiri xarhipiti jingoni”.
16 Jimajkani imeechaksï úndaspti arhirperani jimbokaksï no páspka kurhinda.
17 Ka jimboka Jesúsi kuenta íntskukuarhespka, arhiaspti: “¿Andijtsïsï kurhinda jimbo arhirperani jaki? ¿Andi útasïjtsï no úsïni kurhanguni? ¿Nójtsï kurhangusïni? ¿Andi útasï chaari mintsita xáni chopeski engajtsï no újka kurhanguni?
18 ‘Jukaaskajtsï éskuechani, ¿ka útasïjtsï no exeni?; jukaaskajtsï kutsïkuechani, ¿ka útasïjtsï no kurhaani?’. ¿Andi nóterujtsï miásïnia
19 engani sinko echakua kurhindeechani arhukuapka para 5 mili achamasïichani tʼireraani? ¿Namuntsï tsïkiata uinirini tánantaspi?”. Imeechaksï arhispti: “Dose tsïkiata”.
20 “Ka engani siete kurhinda arhukuapka para 4 mili achamasïichani tʼireraani, kʼérati tsïkiateecha jimbojtsï tánantaspka kurhindani enga pakarapka, ¿namuntsï tsïkiata tánantaspi?”. Imeechaksï arhispti: “Siete”.
21 Jimajkani kurhamarhiaspti: “¿Ka útasïjtsï no kurhanguxaki?”.
22 Ka tátsekuaksï Betsaida niáraspti, jimaksï achamasïni ma peerakuspti enga no ueenga exeni ka kómarhisptiksï eska pʼárhipiringa.
23 Jesúsi jupijkuspti imani achamasïni enga no ueenga exeni ka iretarhu uéakumanisï páspti, ka tátsekua éskuarhu tʼuánharhikuspti, pʼájtsïkuspti ka kurhamarhispti: “¿Exexakiri ambe ma?”.
24 Ima achamasï eraaspti ka uandaspti: “Jo, kʼuiripuechani exeaxaka joperuksï ísï xarharasïndi enajkiksï anhatapue engaksï xanharani jaka”.
25 Jimajkani Jesúsi ménderu pʼánharhikuspti éskuarhu ka i achamasï uinhanharhintaspti ka úspti iámindu ambe sési exeni.
26 Ka Jesúsi axantaspti cheeni jémbo* ka arhispti: “Asï jáma inchaakuntani iretarhu”.
27 Tátsekua Jesúsi imeeri chúxapatiicha jingoni niraspti Sesarea de Filipuisï ka xanharu jimbo kurhamarhiaspti: “¿Na uandasïni kʼuiripu eskani neeski ji?”.
28 Imeechaksï arhispti: “Eskari Juanueska, ima enga itsï atauenga* kʼuiripuechani. Joperu máteruechaksï uandasïndi eskari Elíasiiska. Ka máteruecha eskari Tata Diosïiri uandakua páriiska”.*
29 Ka ima ménderu kurhamarhiaspti: “¿Ka chá na uandasïni eskani neeski ji?”. Pedru arhispti: “Tʼuri jindeeska Kristu”.
30 Jimajkani Jesúsi arhiaspti eskaksï no nemani jámapiringa aianguni.
31 Ka ueenaspti jorhendaani imeeri chúxapatiichani eska Achamasïiri Uájpa jatsispka para kánikua no sési nitamakuarhini ka eskaksï orhejtsïkutiicha, kʼérati saserdotiicha ka karariicha no jaiapanhentapiringa ka eska uándikunhapiringa ka tanimu jurhiatikua jimbo tsíntani.*
32 Jesúsi ini ambe aiangukuarhiaxapti, ka Pedru támu páspti ka ueenaspti xukani.
33 Jesúsi pʼirhikuarhispti, erauaspti imeeri chúxapatiichani, xukaspti Pedruni ka arhispti: “¡Kéndikucherini Satanási! Jimbokari no ísï eratsesïnga eska Tata Diosï sino ísï eskaksï kʼuiripuecha”.
34 Jimajkani Jesúsi ióarhiaspti kʼuiripuechani ka ístu imeeri chúxapatiichani ka arhiaspti: “Engareni nema uéjka chúxapuni, eska ísku exekuarhiaka,* eska tarhatakuarhiaka imeeri chkarini enga jindeeka para no sési nitamakuarhini* ka eskarini méntkisï chúxapaaka.
35 Jimboka ima enga uékaaka kuájchakuni imeeri tsípikuani, masi uaati tsïtani; joperu ima enga tsïtaaka imeeri tsípikuani jimboka juchiiti chúxapatiiska ka ambakiti aianhperakua jimbo, niáraati tsípikua jatsini.
36 Jimboka, ¿ambe marhuakua kʼuiripuni ma enga niáraska iámu parhakpinini andani, joperu tsïtani imeeri tsípikuani?
37 Jimboka, ¿ambe uaa íntspini kʼuiripu ma para kuájchakuni imeeri tsípikuani?
38 Jimboka enga nema kʼuratseska jíndeni jimbo ka imani ambe jimbo engani ji uandajka, iásï anapu kʼuiripuechani japarini engaksï jurajkuka Tata Diosïni ka engaksï xáni no sési úriika,* Achamasïiri Uájpajtu kʼuratseati imani kʼuiripuni jimbo jiáni enga juuaka imeeri Taatiiri juramukua jingoni ka pímbinharhati ánjeliichani jingoni”.
Notecha
^ O “no ma ambe aparini”, “no tʼirerini”.
^ O “desmaiarikuarhiati”.
^ O “enga na újchakurapkia”.
^ O “seniali”.
^ O “imeeri espiriturhu”.
^ O “kʼarhanchikuarhintaspti”.
^ O “kʼúratarakua”.
^ O “imeeri kʼumanchikuarhu”.
^ Exe je Glosario, itsï atakuarhini; itsï atani.
^ O “profeteeska”.
^ O “jauarani”.
^ O “eska nóteru irekaakia para imajkumindu”.
^ Exe je Glosario, chkari enga jindeeka para no sési nitamakuarhini.
^ O “pekadoriika”.
