Markusï 9:1-50
-
Jesúsi ménderueni jáxentasïndi (1 a 13)
-
Ambakerantasïndi tumbini ma enga demoniu ma incharhitini japka (14 a 29)
-
“Para ima enga mintsikajka, iámindu ambe úsïndi úkuarhini” (23)
-
-
Jesúsi ménderu uandasïndi eska uándikunhaaka (30 a 32)
-
Imeeri chúxapatiichaksï arhirperasïndi jimbokaksï uékasïnga exeni né sánderu kʼéri ambeeski (33 a 37)
-
“Ima engajtsïni no ikiachejka, juchantsïni jingoniisti” (38 a 41)
-
Ambe enga no sési úrpijka (42 a 48)
-
“Ísïi je eska itukua” (49 ka 50)
9 Ístu arhiaspti: “Jíksïni sési jimbo arhisïnga eskaksï jarhaska máru ixú engaksï no uarhiaka astakaksï exeaka eska juramuxakaia Tata Diosïiri Reinu kánikua uinhapikua jingoni”.
2 Seisi jurhiatikua tátsekua, Jesúsi kʼéri juáta ma jimbo karhamaspti ka pájtaspti Pedruni, Santiaguni ka Juanuni, imeechajkuksïsï japti jima. Ka Jesúsi ménderueni jáxentaspti imeechani japarini.
3 Imeeri xukuparhakua meremerexexapti ka tʼuputʼupuxentaspti; no nema ixú parhakpinirhu úpirindi xáni uraperantani imeeri xukuparhakuani.
4 Ka ma repentkuksï xarhakuaspti Elíasi ka Moisési, iichaksï Jesúsini jingoni uandontskuarhexapti.
5 Jimajkani Pedru arhispti Jesúsini: “Jorhentpiri,* ¡xáni sési engachi ixú jaka! Ju je uaani tanimu kʼumanchikuechani sïkuiriiri: ma para tʼu, ma para Moisési ka máteru para Elíasi”.
6 Joperu Pedru no jánhaskasïreendi ambe úni jimbokaksï kánikua chéxapka.
7 Jiájkani, nube ma úkuarhispti ka ójchakuraaspti ka nuberhu uératini kurhaakuarhispti nema uandani jarhani: “I jindeesti juchiiti Sapi* engani xáni xénchajka. Kurhajcha je”.
8 Ka engaksï imeecha iápurisï jámapka eraani, nóteruksï nemani exesptia, Jesúsiterkusï japtia imeecha jingoni.
9 Engaksï kétsemantani japkia juátarhu uératini, Jesúsi arhiaspti eskaksï no nemani jámapiringa aianguni ambe engaksï exepka asta jiáni enga Achamasïiri Uájpa tsíntapiringa.*
10 Imaksï ísï úspti eska na arhiapka ka nóksï nemani aianguspti.* Joperuksï kurhamarperasïreendi ambe arhikuekasïreeni Jesúsi enga uandapka eska tsíntapiringa.
11 Ka ueenasptiksï kurhamarhini Jesúsini: “¿Andiksïsï karariicha uandajki eska orheta jatsiska para Elíasi jurhani?”.
12 Ima arhiaspti: “Ísïisti, orheta Elíasi juuati ka ménderu sési peentaati iámindu ambe. Joperu, ¿andisï karakata jaki eska Achamasïiri Uájpa jatsiska para no sési nitamakuarhini ka eskaksï no jaiapanhentaaka?
13 Joperu jíksïni arhisïnga eska Elíasi jurhaskia ka ísïksï kámasti eskaksï imeecha na uékaka, ísï eska na karakata japkia eska úkuarhinchapiringa”.
14 Engaksï niántapkia jima engaksï máteru chúxapatiicha japka, exesptiksï eskaksï uánikua kʼuiripuecha jarhaspka imeechani jingoni ka eskaksï máru karariicha imeechani jingoni arhirperaxapka.
15 Enga kʼuiripu exepka Jesúsini, iáminduechaksï ísku pakaraspti ka uiriipasptiksï kúmuni paraksï uandajpani.
16 Ka ima arhiaspti: “¿Ambejtsï arhirperaxaki indeecha jingoni?”.
17 Achamasï ma enga jima japka kʼuiripuecha jingoni, arhispti: “Jorhentpiri, jíkeni juchiiti sapini juácheska enga no újka uandani jimboka espiritu ma incharhitixaka.
18 Méni enga pʼíntajka, perentskantasïndi ka kʼuruata* uéchasïndi, kirisïmiantasïndi sïniichani ka iámu chkésïndi. Arhiaska chiiti chúxapatiichani eskaksï petarhitantapiringa, joperuksï no ústi”.
19 Jesúsi arhiaspti: “Iásï anapu kʼuiripuecha engajtsï xáni no mintsikajka, ¿na jatini jamberi jatsia para chánksïni jingoni jarhani? Ka ¿na jatini jamberi jatsia paraksïni tekaachintani jarhani? Juáchejtsïni je”.
20 Ísï jimbo, juákusptiksï tumbini, joperu enga espiritu na exepka Jesúsini, úndaspti no sési kántani tumbini. Tumbi kuarhatsespti, perentsespti* ka ueenaspti kʼuruata uéchani.
21 Jimajkani Jesúsi kurhamarhispti taati jémbani: “¿Na jatini ueenaski ísï jámani?”. Ka ima arhispti: “Desde enga sapichuepka.
22 Espiritu méntku úndasïndi chpirirhu kʼuanijpani o itsïirhisï uekamani para uándikuni. Joperu engari tʼu úska úni ambe ma, pʼamojkujtsïni ka jarhuatajtsïni”.
23 Jesúsi arhispti: “¿Andiresï uandajki ‘engari tʼu úska’? Jimboka para ima enga mintsikajka, iámindu ambe úsïndi úkuarhini”.
24 Ka tumbiiri taati jémba jirejiresï arhispti: “¡Mintsikasïnga! ¡Joperu jarhuatarini parani sánderu mintsikani!”.
25 Enga Jesúsi exepka eskaksï kʼuiripuecha uiriipaxapka andarhieraani, Jesúsi xukaspti no sési jásï espirituni ka arhispti: “Tʼu, espiritu engari no újka uandani ni kurhaani, ¡jíkeni arhisïnga eskari uérhintaaka ini tumbini ka eskari nóteru méni incharhintaaka!”.
26 No sési jásï espiritu uinhachaspti ka no sési kántaspti tumbini ka tátsekua uérhintaspti. Ka tumbi ísï pakaraspti enajki uarhipia. Ka sáno iáminduechaksï uandasïreendi: “¡Uarhistia!”.
27 Joperu Jesúsi jupijkuspti para jauatani ka tumbi jauaraspti.
28 Tátsekua, Jesúsi ka imeeri chúxapatiichaksï kʼumanchikuarhu ma inchaspti ka engaksï na imeechaterku japkia, kurhamarhisptiksï: “¿Andisïni jucha no ú petarhitantani imani espirituni?”.
29 Ima arhiaspti: “I jásï espiritu, kómarhikua jimbojkusï újti uérhintani kʼuiripuni ma”.
30 Jimajkani uéntasptiksï jima uératini ka Galileaisïksï nitamaspti, joperu Jesúsi no uékasïreendi eskaksï kʼuiripuecha mítepiringa eska jimeesïsï jámaxapka
31 jimboka imeeri chúxapatiichani jorhendaaxapka. Arhiasïreendi: “Achamasïiri Uájpa kʼuiripuecheeri jájki jimbo jurajkunhaati* ka uándikuatiksï. Joperu nájkirukaksï uándikuaka, tanimu jurhiatikua jimbo tsíntaati”.*
32 Imaksï no kurhanguspti ambe enga arhiapka ka nóksï tekaaspti kurhamarhini.
33 Ka niárasptiksï Kapernaúmi ka engaksï kʼumanchikuarhu japkia, kurhamarhiaspti: “¿Ambejtsï arhirperaxapi engajtsï xanharu jimbo jurhani japka?”.
34 Iáminduechaksï ísku pakaraspti jimbokaksï xanharu jimbo arhirperaxapka né sánderu kʼéri ambeespi.
35 Ísï jimbo, ima uaxakaspti ka ióarhiaspti 12 apostoliichani ka arhiaspti: “Enga nema uékaaka sánderu kʼéri ambeeni, jatsisti para sánderu sapichueni ka iáminduechani jántspikuani”.
36 Jimajkani Jesúsi terujkani peeraspti tataka sapichuni ma, kamajchakuspti ka arhiaspti imeeri chúxapatiichani:
37 “Ima enga sési erokajka iini jásï tataka sapichuni ma jimboka juchiiti chúxapatiiska, ístureni jíndeni sési erokasïndi; ka ima engareni sési erokajka jíndeni, nóreni solu jíndeni sési erokasïndi sino ístu imani engareni axaka”.
38 Juanu arhispti: “Jorhentpiri, exeskachi kʼuiripuni ma enga demoniuechani petarpiantani japka chiiti nombri jimbo; joperu jimboka no juchantsïni jingoni jámaxapka, arhixapkachi eska no jámapiringa indeni ambe úni”.
39 Joperu Jesúsi arhiaspti: “Asï jáma je pʼínguni, jimboka no nema úsïnga milagru ma úni juchiiti nombri jimbo ka jini no sési ambe uandani jarhani juchiiti ambe.
40 Jimboka ima engajtsïni no ikiachejka, juchantsïni jingoniisti.
41 Jíksïni jurhimbikua jingoni arhixaka, ima engaksïni íntskuaka ma basu itsï jimbokajtsï chá Kristueri chúxapatiiska, ima kʼuiripu niáraati jatsini imeeri kóntperatani.
42 Joperu ima enga no sési ambe úraaka máisï ini sapirhatiichani engajtsïni jíndeni mintsikajka, sánderu sési nikupirindi imani kʼuiripuni engaksï molinurhu anapu tsakapu ma jójchakupiringa engaksï burruecha uantsïkujka ka eskaksï marirhu kʼuanimapiringa.
43 ”Engakeni ménisï chiiti jájki no sési ambe úraska,* kachujku. Sánderu sésiisti eskari intsïnhaaka tsípikua nájkirukari nóteru jukaakia máechakua jájki ka eskari tsimani jájkiichani jingoni Jeenarhu* kʼuanijpanhaaka, chpirirhu enga méntku no pátakuarhijka.
44 *
45 Ka engakeni chiiti jantsiri no sési ambe úraska,* kachundu. Sánderu sésiisti eskari intsïnhaaka tsípikua nájkirukari nóteru jukaakia máechakua jantsiri ka eskari tsimani jantsiriichani jingoni Jeenarhu kʼuanijpanhaaka.
46 *
47 Ka engakeni chiiti éskua no sési ambe úraska,* iauanisï kʼuaniku. Sánderu sésiisti eskari inchaaka Tata Diosïiri Reinurhu nájkirukari máechakua éskua jukaaka ka eskari tsimani éskuechani jingoni Jeenarhu kʼuanijpanhaaka,
48 jima enga karhasï no uarhijka ka enga chpiri méntku no pátakuarhijka.
49 ”Jimbokaksï iáminduecha chpiri jingoni itumeranhaaka.
50 Itukua ambakitiisti. Joperu enga itukua nóteru itumejkia, ¿nénajtsï uaa ménderu itumerantani? Ísïi je eska itukua ka jánguarhinta je iáminduecha jingoni sési pájperani.
Notecha
^ O “Rabí”.
^ O “Uátsïti”.
^ Griegu jimbo: “jauarapiringa”.
^ O jamberi “imeechajkuksïsï mítepti ini ambe”.
^ O “pʼuruata”.
^ O “perekuarhispti”.
^ O “traisionariinhaati”.
^ Griegu jimbo: “jauaraati”.
^ O “Enga chiiti jájki uaaka eskari téksarhutaaka”.
^ Exe je Glosario, Jeena.
^ Exe je ambe enga arhijka nota enga Mateu 17:21 jimbo jaka.
^ O “enga chiiti jantsiri úska eskari téksarhutaaka”.
^ Exe je ambe enga arhijka nota enga Mateu 17:21 jimbo jaka.
^ O “enga chiiti éskua úska eskari téksarhutaaka”.
