Apokalipsisi 10:1-11
10 Exespka máteru uíuinhasï ánjelini enga auandarhu uératini kétseni japka nube ma xukuparhatini,* ka arkoirisi ma jukajtsïspti. Xánharhispti komueska jurhiata ka imeeri jantsiriichaksï xáxespti komueska chpiriiri pilariicha.
2 Jájkirhu kámaxapti karakata* sapichu ma enga pʼirakunhapkia. Imeeri jantsiri jurhijkandani anapuni marirhu inchamaspti, joperu uikixkandani anapuni echerirhu peeraspti.
3 Jimajkani uinhachaspti ísï eska na uinhamu mintsirajka leoni ma. Ka enga uinhachapka, kurhaaspka na engaksï uandani japka siete charanchikuecha.
4 Karaxamengia ambe engaksï uandapka siete charanchikuecha, joperuni kurhaaspka uandakua ma engareni auandarhu uératini arhienga: “Tʼujku míte* ambe engaksï siete charanchikuecha uandaka ka asï jáma karani”.
5 Ima ánjeli engani exepka eska marirhu ka echerirhu anhandetixapka, auandarhisï tarhataspti imeeri jájki jurhijkandani anapuni
6 ka jurariispti imani jimbo enga irekani jaka para méntkisï, imani jimbo enga auandani kueraaka ka ambe enga xáni jaka auandarhu, enga echerini kueraaka ka ambe enga xáni jaka echerirhu, enga marini kueraaka ka ambe enga xáni jaka marirhu. Uandaspti: “Tata Diosï nóteru erokuarhiatia.
7 Sánderu sési, imani jurhiatikuechani jimbo enga máteru ánjeli kústani jámaakia imeeri trompetani, ka ini jingonksï sieteuatia, jiáni úkuarhiatia inde ambe enga Tata Diosïiriika,* inde ambakiti aianhperakua enga Tata Diosï aianguaka imeeri jántspiriichani engaksï imeeri uandakua páriika”.*
8 Ka kurhaaspka engareni ménderu uandajpani japka uandakua ma auandarhu uératini. Arhisptirini: “Ní ka pʼíku indeni karakata* pʼirakukata enga jájkirhu kámani jaka ima ánjeli enga marirhu ka echerirhu anhandetini jaka”.
9 Niraspka andarhierani ánjelini ka arhispka eskarini íntskupiringa karakata sapichuni, ka imarini arhispti: “Pʼíku karakatani ka á. Kʼameraati chiiti sïturhini, joperu engari arhani jauakia, ísï téati eska tékolmena”.*
10 Ísï jimbo, pʼíkuspka karakata sapichuni enga ánjeli kámani japka jájkirhu ka arhaspka. Engani tsʼémupka, ísï téspti eska tékolmena; joperu engani na ápkia, iámureni kʼamerachespti sïturhini.
11 Ka arhisptijtsïni: “Jatsiskari para ménderu uandantani ambe enga úkuarhiaka ireteecha jingoni, kʼérati ireteecha jingoni, imeecha jingoni engaksï táchani jásï idioma uandajka ka uánikua juramutiicha jingoni”.
Notecha
^ O “irhirikuarhetini”.
^ O “roiu”.
^ Griegu jimbo: “Sési míka seiu ma jingoni”.
^ Exe je Glosario, ambe ma enga Tata Diosïiriika.
^ O “profeteeka”.
^ O “roiu”.
^ O “tékua”.
