Apokalipsisi 13:1-18
-
Marirhu uémesïndi no sési jásï animali ma enga siete éjpuechani jukaaka (1 a 10)
-
Echerirhu uétsesïndi no sési jásï animali ma enga tsimani sïuanguechani jukaaka (11 a 13)
-
Imajeni ma ima no sési jásï animaliiri enga siete éjpuechani jukaaka (14 ka 15)
-
Mínda ka númeru no sési jásï animaliiri (16 a 18)
13 Ima* marirhu uanamukuteni pakaraspti, kutsarirhisï anhandetixapti.
Jimajkani exespka no sési jásï animalini ma enga marirhu uémeni japka. Diesi sïuanguechani jukaaspti ka siete éjpuechani. Diesi koroneechani* jukajtsïaspti sïuanguecharhu, ka éjpuecharhu nombriichani jukaaspti engaksï no sési ambe uandajka Tata Diosïiri ambe.
2 Ka inde no sési jásï animali engani exepka, xáxespti eska leopardu ma, joperu xárhati jantsiriichani jukaaspti eska osu ma ka xásï penchumikua jukaspti eska leoni ma. Ka dragoni indeni no sési jásï animalini íntskuspti imeeri uinhapikuani, imeeri kʼéri uaxantskuani* ka imeeri juramukuani.
3 Ka ísï exespka enajkiksï máechakua éjpuni atakupi para uándikuni, joperu jima engaksï atapka para uándikuni, nimarasptia. Ka iámindu echerirhu anapuechaksï niraspti chúxapani indeni no sési jásï animalini jimbokaksï kánikua sési exesïreenga.
4 Kómarhisptiksï dragonini jimboka imasï íntskupka juramukua no sési jásï animalini, ka kómarhisptiksï no sési jásï animalini ka uandasïreendiksï: “¿Jaki nema enga ísïiuaka eska i no sési jásï animali? ¿Ka jaki nema enga uaaka indeni jingoni uarhipeni?”.
5 Ka intsïnhaspti penchumikua ma para kʼéramakuarhini ka para no sési ambe uandani Tata Diosïiri ambe, ka ístu intsïnhaspti juramukua para 42 kutsï úni ambe enga ima uékapiringa.
6 Tátsekua ima arhataspti para no sési ambe uandani Tata Diosïiri ambe, para no sési ambe uandani imeeri nombriiri ambe ka imeeri kʼumanchikueri ambe, jo, para no sési ambe uandani imeecheeri ambe engaksï auandarhu irekaka.
7 Sésikua intsïnhaspti para pímbinharhatiicha jingoni uarhipeni ka para andaani, ka juramukua intsïnhaspti para juramukuani iámindu kʼumanchikuechani,* ireteechani, imeechani engaksï táchani jásï idioma uandajka ka kʼérati ireteechani.
8 Ka iámindu imeecha engaksï echerirhu irekani jaka kómarhiatiksï. Desde enga ueenaka jarhani parhakpini, no ma indeecheeri nombri karakata jarhasti imani karakatarhu nani enga karanhani jaka néksï intsïnhaa tsípikua, i karakata Karichi sapichueriisti enga kéjtsïtanhaka.
9 Ima enga újka kurhaani, eska kurhauaka.
10 Enga nema jatsika para jupikanhani, jupikanhaati. Enga nema espada jingoni uándikuska nemani,* espada jingoni uándikunhaati. Jimboksïsï pímbinharhatiicha jatsiti para tekaantani ka mintsikani.
11 Jimajkani exespka máteru no sési jásï animalini enga echerirhu uétseni japka. Tsimani sïuanguechani jukaaspti engaksï xárhapka eska karichi sapichueri ma, joperu ueenaspti ísï uandani eska dragoni ma.
12 Ka imajtu xáni juramukua jatsispti eska orheta no sési jásï animali. Úsïndi eska echeri ka iámindu imeecha engaksï jima irekaka kómarhiakaksï orheta no sési jásï animalini, imani enga atanhapka para uándikunhani joperu enga nimarakia.
13 Ka kʼéri ambe úsïndi, asta jamberi úsïndi eska auandarhu uératini chpiri uekorheaka echerirhu paraksï iámindu kʼuiripuecha exeni.
14 Támisï jánhastaasïndi imeechani engaksï echerirhu irekaka imani kʼérati ambe jingoni enga újka, jimboka jurajkunhaska eska ísï úpiringa no sési jásï animalini japarini, ka ístu arhiasïndi imeechani engaksï parhakpinirhu irekani jaka eskaksï imajeni ma úkuaka imani no sési jásï animalini, ima enga espada jimbo atanhaka joperu enga tátsekua tsíntaka.
15 Ka sésikua intsïnhaspti para no sési jásï animaliiri imajenini indeni tarhiatani íntskuni enga tsípikua íntspijka,* paraka inde imajeni no sési jásï animaliiri úpiringa uandani ka uándikutarkuarhiani iámindu imeechani engaksï no uékapiringa kómarhini no sési jásï animaliiri imajenini.
16 Iáminduechani, sapirhatiichani ka kʼératiichani, jatsikuarheriichani ka no jatsikuarheriichani, imeechani engaksï no jántspiriika ka ístu imeechani engaksï jántspiriika, arhiasïndi eskaksï jatsiska para mínda jatsikunhani jurhijkandani anapu jájkirhu o tsʼérukuarhu
17 paraka no nema uaaka piáni o íntspikuarhini ambe ma, imajkusï uaati ísï úni enga jatsikunhaka mínda o nombri no sési jásï animaliiri o númeru enga jindeeka imeeri nombri.
18 Para i ambe, uétarhisïndi jánhaskani: ima enga mítekuka, eska kuenta pʼikuntaaka para míteni nákiiski inde númeru no sési jásï animaliiri, jimboka kʼuiripuecheeri númerueska; imeeri númeru jindeesti 666.
Notecha
^ Ixú dragonini arhikuekaxati.
^ Griegu jimbo: “diademeechani”.
^ O “tronuni”.
^ O “tribuechani”.
^ O jamberi “Enga nema jatsiska para espada jingoni uándikunhani”.
^ O “espirituni íntskuni”.
