Apokalipsisi 15:1-8
15 Ka auandarhu exespka máteru mínda, kʼéri mínda máespti ka kánikua ambakiti: siete ánjeliichaksï siete kastiguechani kaaxapti. Íksï últimuestia, jimboka indeecha jingoni, Tata Diosï kʼamaraakia xarhatani na enga xáni ikiani jaka.
2 Ístu, ísï xarharasïreendi enajki kánikua itsï pímbinhanharhi japi* enga chpiri jingoni jeuetakata japka. Ka ístuni exeaspka imeechani engaksï andapka no sési jásï animalini ka imeeri imajenini ka númeruni enga jindeeka imeeri nombri. Íksï uanamukuteni anhandetixapti jima enga kánikua itsï pímbinhanharhi japka; jájkirhuksï kaaxapti Tata Diosïiri arpeechani.
3 Pirexaptiksï Moisésiiri pirekuani, ima enga Tata Diosïni jántspikuenga, ka ístu Karichi sapichueri pirekuani. Uandasïreendiksï:
“Tata Diosï Jeoba, tʼuri kʼéri ambe úsïnga ka kánikua ambakiti ambe, tʼu engari iámindu ambe újka úni. Kánikuaksï sési jarhasti chiiti xanharuecha ka jurhimbitiistiksï, tʼuri jindeeska Juramuti para méntkisï.
4 Tata Diosï Jeoba, ¿nékini no chénharhia* tʼungini? ¿Né no kʼéri ambe arhia chiiti nombrini? Jimbokari tʼujkusï no méni jurajpijka. Iámindu kʼérati ireteechaksïni juuati andarhierani ka kómarhiatiksïni jimbokaksï exesïnga eskari tʼu sési jusgarpisïnga”.
5 Ísï tátsekua, exespka eska auandarhu mítakuarhespka santuariu enga tabernakulurhu jaka, jima engaksï Tata Diosïiri mandamientuecha jaka.
6 Ka santuariurhuksï uéraspti siete ánjeliicha engaksï siete kastiguechani kaani japka. Imeechaksï takusï linueri jukarixapti enga pímbinhasï japka ka enga meremerexeni japka, ka kʼénhikuarhuksï jónguarhikua ma jukarixapti enga orueriipka.
7 Máechakua ima tʼámu kerubiniicheeri, íntsaaspti siete ánjeliichani siete platoniichani engaksï orueriipka ka engaksï uinirini japka Tata Diosïiri ikiatapu, ima Tata Diosïiri enga irekani jaka para méntkisï.
8 Ka santuariurhu uinintaspti sïraata jimboka Tata Diosï xáni k’éri ambeeska ka ístu imeeri uinhapikua jimbo. No nema úsïreendi inchani santuariurhu astakaksï na siete ánjeliicha kʼamarapiringia móndaani siete kastiguechani.
