Apokalipsisi 16:1-21
-
Siete platoniicha engaksï Tata Diosïiri ikiatapu jatarini jaka (1 a 21)
16 Jimajkani kurhaaspka eska nema uandaxapka santuariurhu uératini ka arhiasïreendi siete ánjeliichani: “Ní je ka echerirhu móndaa je indeni siete platonichani engaksï Tata Diosïiri ikiatapu jatarini jaka”.
2 Orheta ánjeli niraspti ka echerirhu móndaspti imeeri platonini. Ka inde kʼuiripuecha engaksï no sési jásï animaliiri mínda jatsikunhapka ka engaksï imeeri imajenini kómarhienga, kʼéri pʼamenchakuaksï ma pʼiraspti engaksï ueenapka xúta* jukarhikuarheni ka kánikuaksï no sési pʼikuarherasïreendi.
3 Máteru ánjeli marirhu móndaspti imeeri platonini, ini jingonksï tsimaniisptia. Ka mari iurhiri úkuarhintaspti ísï eska uarhiriiri iurhiri, ka uarhispti ambe enga xáni* irekani japka marirhu.
4 Máteru ánjeli, iurhekuecharhisï móndaspti imeeri platonini ka jimeesïsï enga itsï uérajka, ini jingonksï tanimuesptia. Ka itsï iámu iurhiri úkuarhintaspti.
5 Jimajkani kurhaaspka imani ánjelini enga juramukujka itsïni: “Tʼuri jindeeska ima enga jaka ka enga japka, enga no méni jurajpijka, jimbokari tʼusï axaaka ini kastiguechani.
6 Jimbokaksï imeecha tsïtakuaska iurhiri pímbinharhatiichani ka uandakua páriichani,* jimborisï tʼu iurhiri íntsaaka paraksï arhani. Imeechaksïsï ísï jirinhakuarhiti”.
7 Ka kurhaaspka eska altari uandaxapka: “Jo, Tata Diosï Jeoba, tʼu engari iámindu ambe újka úni, jurhimbiti ka sésiri jusgarpisïnga”.
8 Máteru ánjeli jurhiatarhu móndaspti imeeri platonini; ini jingonksï tʼámuesptia. Ka jurhiata sésikua intsïnhaspti para kurhiraani kʼuiripuechani.
9 Ka kʼuiripuechaksï kurhispti jimboka kánikua aparhikuarhixapka. Joperuksï ueenaspti no sési ambe uandani Tata Diosïiri nombriiri ambe, inde Tata Diosïiri enga juramukua jatsika para ini ambe jingoni kastigarpini, ka nóksï móantaspti nijtuksï kʼéri ambe arhini.
10 Máteru ánjeli, no sési jásï animaliiri kʼéri uaxantskuarhu* tʼáptsïtaspti imeeri platonini, ini jingonksï sinkoesptia. Ka iámu pápkʼandentaspti jimeesïsï enga ima juramukua jatsika. Kʼuiripuechaksï katambani katsarhisïreendi xánksï no sési pʼikuarherani,
11 joperuksï xáni no sési pʼikuarheraxapti ka xúta* jukarhikuarheni, jimboksïsï ueenapti no sési ambe uandani Tata Diosïiri ambe enga auandarhu jaka ka nóksï móantaspti imeecheeri úkuecha jimbo.
12 Máteru ánjeli kʼéri iurhekuarhu Éufratesi jimbo móndaspti imeeri platonini, ini jingonksï seisiisptia. Ka itsï ueenaspti kʼarhini parakaksï úpiringa jimeesïsï nitamani ima juramutiicha engaksï jiniani uératini jurhani japka nani enga jurhiata andarajka.*
13 Ka exespka eska dragoni, no sési jásï animali ka Tata Diosïiri uandakua pári arhikata, uéchaspkaksï tanimu no sési járhati uandakuechani espiritueri engaksï xárhapka eska raneecha.
14 Demoniuechaksïsï uandaajti ini uandakuechani ka iámu echerirhu anapu juramutiichaksï kurhauasïndi ini uandakuechani; i uandakuechaksï kʼérati ambe úsïndi para tánaantani juramutiichani paraksï uarhipeni Tata Diosïiri kʼéri jurhiatikua jimbo, ima Tata Diosï enga iámindu ambe újka úni.
15 “¡Kurhaa! Ísï juuaka komueska sïpari ma. Tsípisïndi ima enga tsínharhitini jarhajka ka takusï jukarini,* paraka no xásku jámaaka ka kʼuiripuechaksï kʼuratsetani”.
16 Ka jimaksï tánaantaspti juramutiichani enga ebreu jimbo arhinhajka Armajedoni.*
17 Ka máteru ánjeli tarhiatarhu móndaspti imeeri platonini, ini jingonksï sieteesptia. Enga i ambe úkuarhipka, kurhaakuarhispti eska nema uandaxapka santuariurhu, kʼéri uaxantskuarhu* uératini, ka uandaspti: “¡Iámu ambe úkuarhistia!”.
18 Ka ueenaspti piritani ka uinhamu charanchesïreendi ka ísï kurhaakuarhisïreendi enajki uandanhani japi, ka ueenaspti uinhamu jencheni, no méni xáni uinhamu jenchexapti desdeka ueenaka jarhani kʼuiripu echerirhu. Ísïsï xáni uinhamu jenchepti.
19 Kʼéri ireta tanipuru arhukurhispti ka kʼérati ireteecheeri ireteecha méntkuksï ísï niraspti xerekuarhentani; ka Tata Diosï miántaspti Kʼéri Babiloniani para indeni kopani íntskuni enga binu jatarini jaka enga jindeeka Tata Diosïiri ikiatapu.
20 Ístu, iámindu isleechaksï sïpakuarhispti ka juáteechaksï jimajku nóneespti.
21 Jimajkani, auandarhu uératini ueenaspti xanuata uekorheni, ísïksï kʼénharhispti eskaksï kʼérati tsakapuecha ka kʼuiripuechanksï ataasïreendi; mándani tsakapu, ma talentisï* kʼuetsapespti. Ka kʼuiripuechaksï ueenaspti no sési ambe uandani Tata Diosïiri ambe indeni xanuata jimbo, jimboka kʼéri kastigu máespka.
Notecha
^ O “úlsera”.
^ O “uarhisptiksï almeecha engaksï”.
^ O “profeteechani”.
^ O “tronurhu”.
^ O “úlsera”.
^ O “engaksï esteerhisï jurhani japka”, “engaksï orienteerhisï jurhani japka”.
^ Griegu jimbo: “ka patsani imeeri takusï ambe”.
^ Griegu jimbo Har Maguedṓn. Uandakua máesti enga ebreu jimbo arhikuekajka ‘Meguidó anapu juáta’.
^ O “tronurhu”.
^ Gresia anapu talentu ma xániispti 20,4 kilu (654 onsa troi). Exe je Glosario, talentu.
