Apokalipsisi 17:1-18
-
Ambe enga úkuarhinchaaka “Kʼéri Babilonia” (1 a 18)
-
Uarhiiti ma enga no sési jásï animali charhapiti ma jatarini jaka (1 a 3)
-
No sési jásï animali “ióntki jarhasptia joperu iásï nóteru jarhastia, joperu no ióni jimbo, uénheati jima uératini enga xáni jauanhika” (8)
-
Diesi sïuanguechaksï uarhipeati Karichi Sapichuni jingoni (12 a 14)
-
Diesi sïuanguechaksï kurhunhiati uarhiiti ísku jándini (16 ka 17)
-
17 Máechakua ima siete ánjeliicheeri engaksï siete platoniichani kaani japka, jurhaspti ka arhisptirini: “Ju ixúani, jimbokakeni exeraaka na enga jusgarinhaaka inde uarhiiti enga kʼéri ísku jándiika ka enga itsïirhisï uaxakajka.
2 Echerirhu anapu juramutiichaksï ísku jándikua ambe niátaspti* indeni uarhiiti jingoni, ka imeecha engaksï parhakpinirhu irekani jaka, indeni binu jingonksï kauispti enga ima kámani jaka, inde binu imeeri ísku jándikuesti”.
3 Ka espiritu santu jimbo, imarini desierturhu páspti. Jimajkani exespka uarhiitini ma enga no sési jásï animalini ma jatarini japka; inde no sési jásï animali charhapitiispti ka iámu uinirhikuarheaspti nombriichani engaksï no sési ambe uandeenga Tata Diosïiri ambe, ka ístu siete éjpuechani jukaaspti ka 10 sïuanguechani.
4 Uarhiiti takusï moradu ka charhapiti jukarixapti, ka orueri ambe jukarixapti, sési járhati tsakapuechani ka perleechani. Imeeri jájkirhu kopa ma kámaxapti orueri enga no sési jásï ambe uinirini japka ka ikichakueni jásï ambe imeeri ísku jándikueri.*
5 Tsʼérukuarhu nombri ma jukarhuspti enga no újka kurhangunhani: “Kʼéri Babilonia, enga jindeeka uarhiiti ísku jándiicheeri amamba ka ístu echerirhu anapu no sési jásï ambeeri”.
6 Ka exespka eska uarhiiti kauirixapka pímbinharhatiicheeri iurhiri jingoni ka Jesúsiiri testiguecheeri iurhiri jingoni.
Ji ískuni pakareeraspka engani ísï exepka uarhiitini.
7 Ísï jimbo, ánjelirini arhispti: “¿Andiresï ísku pakareera? Jíkeni aianguaka parakari kurhanguaka indeni uarhiitiiri ambe ka inde no sési jásï animaliiri enga páni jaka, inde enga siete éjpuechani jukaaka ka 10 sïuanguechani.
8 No sési jásï animali engari exepka, ióntki jarhasptia joperu iásï nóteru jarhastia, joperu no ióni jimbo, uénheati jima uératini enga xáni jauanhika* ka kʼamajkunhaati. Imeecha engaksï echerirhu irekani jaka, imeecha enga desde enga ueenaka jarhani parhakpini no karanhani jaka imeecheeri nombriicha karakatarhu* nani enga karanhani jaka néksï intsïnhaa tsípikua, ískuksï pakaraati jiáni engaksï exeaka no sési jásï animalini enga ióntki japka ka enga iásï nóteru jakaia joperu enga útasï jarhani jauaka.
9 ”Para ini ambe kurhanguni uétarhisïndi sési jánhaskani. Siete éjpuechaksï siete juáteechani arhikuekaasïndi, ka indeni juáteecha jimbosï uaxajtsïkujti uarhiiti.
10 Jarhastiksï siete juramutiicha: sinkoksï nitamastia, máechakua iáiasï jarhasti ka máteru nótki jurhaxati; joperu jiáni enga janoaka, no ióni pakaraati.
11 Ka no sési jásï animali enga ióntki japka joperu enga iásï nóteru jakaia, indejtu máteru juramutiisti ka indeni jingonksï ochuestia; jima uérasti siete juramutiicharhu ka kʼamajkunhaati.
12 ”Ima 10 sïuanguechani engari exeaka, 10 juramutiichani arhikuekaasïndi engaksï nótki juramuni jaka, joperuksï intsïnhaati juramukua paraksï ma ora juramuni no sési jásï animali jingoni.
13 Indeechaksï májku jásï ambe uékasïndi úni,* jimboksïsï íntskujti uinhapikua ka juramukua no sési jásï animalini.
14 Uarhipeatiksï Karichi sapichuni jingoni, joperu Karichi sapichu andauati jimboka Juramutiiska juramutiicheeri ka Reiisti reiicheeri. Imeecha engaksï imani jingoni jaka, engaksï ióarhinhaka, engaksï erakunhaka ka engaksï no méni jurajkuka Tata Diosïni, imeechajtuksï andaati”.
15 Imarini arhispti: “Itsï engari exeka jima enga uarhiiti ísku jándi uaxakatini jaka, ireteechani arhikuekaasïndi, uánikua kʼuiripuechani, kʼérati ireteechani ka imeechani engaksï táchani jásï idioma uandajka.
16 Inde 10 sïuanguecha engari exeaka ka no sési jásï animali, kurhunhiatiksï uarhiiti ísku jándini, xáskuksï jurajkuati ka patsïki jásï. Ántaatiksï ka uarhiitinksï iámu kurhiraati chpiri jingoni.
17 Jimboka Tata Diosï eratsetaraaska paraksï indeecha úni ambe enga Tata Diosï eratsetini jaka úni, o indeni ambe engaksï imeecha májku jásï uéjka úni,* jimboksïsï juramukua íntskujti no sési jásï animalini astaka úkuarhiaka ambe enga Tata Diosï uandaka.
18 Ka inde uarhiiti engari exeka, k’éri iretani arhikuekasïndi enga echerirhu anapu juramutiichani ísï juramukuajka komueska reina ma”.
Notecha
^ Griegu jimbo pornéia. Exe je Glosario, ísku jándikua ambe.
^ Griegu jimbo pornéia. Exe je Glosario, ísku jándikua ambe.
^ Griegu jimbo: “abismurhu uénheati”. Exe je Glosario, abismu.
^ O “roiurhu”.
^ O “májku eratsekuaksï kámasïndi”.
^ O “eratsejka úni”.
