Apokalipsisi 18:1-24
-
Kʼamajkunhasïndi “K’éri Babilonia” (1 a 8)
-
“Juchiiti iretarhu anapuecha uéakunta je jimini” (4)
-
-
Kómu atsïkuarhisïndiksï jimboka Babilonia kʼamajkunhaska (9 a 19)
-
Imeecha engaksï auandarhu jaka tsípisïndiksï jimboka Babilonia kʼamajkunhaska (20)
-
Babilonia ísï kʼuanimanhaati marirhu komueska tsakapu ma (21 a 24)
18 Ísï tátsekua, exespka máteru ánjelini enga auandarhu uératini kétseni japka kánikua juramukua jingoni, ka iámu echerirhu tʼíntskaspti jimboka xáni kʼéri ambeespka.
2 Ima uinhachaspti: “¡Kʼamajkunhastia! ¡Kʼamajkunhastia Kʼéri Babilonia! Iásïksï jima nirastia irekani demoniuecha, jimaksï jakutsetspixati iámindu no sési jásï espirituecha* ka iámindu no sési járhati pájaruecha engaksï no sáni xénchanhajka.
3 Jimboka iámindu kʼérati ireteechani kauiraaska indeni binuni jingoni enga újka eskaksï ísku jándikua ambe únchaaka;* echerirhu anapu juramutiichaksï ísku jándikua ambe niátasti indeni jingoni, ka echerirhu anapu atarantstiichaksï* niárasti kánikua jatsikuarheni indeni jimbo enga inde ireta xáni uánikua ambe jatsikuarheka ka enga jimbo méntku no sáni kʼuratsejka”.
4 Ka ménderuni kurhaaspka eska nema auandarhu uératini uandaxapka, uandasïreendi: “Juchiiti iretarhu anapuecha uéakunta je jimini, engajtsï no uéjka májkueni pekadu ambe niátani eska inde ka engajtsï no uéjka eskajtsï chá jamberi kastigarinhaaka ísï eska inde.
5 Jimboka indeeri pekaduechaksï auandarhu jamberi niáraskia ka Tata Diosï miántasti na enga inde no sési ambe niátaka.
6 Ísï úkunta je eskaksïni inde na úchika. Jo, tsimani xanhari no sési úkunta je ambe engaksïni inde úchika. Indeni kopa jimbo enga inde jatsiraka kauikuani, chá tsimani xanhari sánderu kánikua jatsiraku je.
7 Ísï eska inde na xáni kʼéri ambe exekuarhipka ka ísï eska na xáni uánikua ambe jatsikuarhepka ka méntku no sáni kʼuratseni indeni ambe jimbo, chájtu májkueni no sési pʼikuasta je ka ú je eska iatiru kómu pʼikuarheraaka. Jimboka inde uandaska indeeri mintsitarhu: ‘Ji ísï uaxakatixaka eska reina ma; no méni tsïndi pakaraaka ka no méni kómu pʼikuarheraakaʼ.
8 Ísï jimbo, ma jurhiatikua jimbojkuksï niárakuati indeeri kastiguecha, uarhikua, kómu pʼikuarherakua ka kʼarhingua ambe, ka iámu kurhiranhaati chpiri jingoni. Jimboka uinhapitiiska Tata Diosï Jeoba ima enga jusgarika.
9 ”Jiáni engaksï echerirhu anapu juramutiicha, imeecha engaksï ísku jándikua ambe niátaka* indeni jingoni ka engaksï májkueni uánikua ambe jatsikuarheka eska inde ka méntkuksï no sáni kʼuratseni, engaksï indeecha exeaka eska sïraaxaka enga kurhiranhani jauaka, ueraatiksï ka uánheatiksï xáni no sési pʼikuarherani indeni jimbo.
10 Indeechaksï iauani sáni pakaraati anhandetini jimbokaksï chérakuarheaka enga xáni no sési pʼikuastanhani jauaka inde ireta. Uandaatiksï: ‘¡Lástima! ¡Lástima tʼu kʼéri ireta Babilonia, tʼuri uíuinhasï ireta máespka! ¡Jimbokari ma ora jimbojkusï jusgarinhaka!ʼ.*
11 ”Ístu, echerirhu anapu atarantstiichaksï ueraati ka kómu atsïkuarhiatiksï indeni ireta jimbo, jimboka nóteru nema piákuauakia ambe engaksï xáni atarantani jámajka,
12 oru ambeksï kámasïndi, plata, sési járhati tsakapuechani, perleechani, ambakiti takusï linueri, takusï moradu, seda ka takusï charhapiti; mámaru jásï ambe enga chkariiri úkata jaka enga sési jájkundejka ka mámaru jásï ambe enga marfili jingoni úkata jaka ka sési jásï chkari jingoni, kobri jingoni, tiámu jingoni o mármoli jingoni;
13 kanelajtu, India anapu pʼuntsumikua, kʼuájtsïtakua,* aseiti enga sési jájkundejka, olibanu, binu, olibusïiri aseiti, ambakiti jarina,* trigu, uákasïichani, karichiichani, kabaiuechani, karreteechani ambe, jántspiriichani ka kʼuiripuechani.
14 Jo, euanhantaskaria indeni xáni ambanharhi frutu engari tʼu xáni anhencheenga, ka inde mámaru jásï akua ambe enga xáni áspika ka enga xáni ambakitiika, xánkuestia para tʼu. Nóteruri méni jatsiakia indeni ambe.
15 ”Atarantstiicha engaksï indeni ambe atarantajka ka engaksï indeni ireta jimbo niáraka xáni jatsikuarheni, anhandetinksï pakaraati iauani sáni jimbokaksï chérakuarheaka enga inde ireta no sési pʼikuastanhani jauaka. Ueraatiksï ka kómu atsïkuarhiatiksï.
16 Uandaatiksï: ‘¡Lástima! ¡Lástima enga ísï nitamakuarhini jaka inde xáni kʼéri ireta enga ambakiti takusï linueri jukarini japka, takusï moradu ka takusï charhapiti, ka enga mámaru ambe jukarini japka orueri, sési járhati tsakapuechani ka perleechani!
17 ¡Jimboka ma ora jimbojku kʼamajkunhaska xáni ambakiti jatsikuarhekua ambe!ʼ.
”Ka iámindu imeecha engaksï barkuechani paajka, imeecha engaksï barkuecharhisï jámajka ka imeecha engaksï barkuecharhisï ánchikuarhijka, ka iámindu imeecha engaksï marirhisï ánchikuarhijka paraksï andakuarheni sáni, anhandetinksï pakaraspti iauani sáni.
18 Ka engaksï exepka na enga sïraani japka enga kurhiranhani japka, uinhachasïreendiksï: ‘¡¿Jaki xásï ireta ma eska inde xáni kʼéri ireta?!ʼ.
19 Tʼupuriksï atajtsïsïreendi ka uerasïreendiksï ka kómu atsïkuarhisïreendiksï, uinhachasïreendiksï: ‘¡Lástima! ¡Lástima enga ísï nitamakuarhini jaka inde xáni kʼéri ireta, indeeri jatsikuarhekua jimboksïsï niárati xáni jatsikuarheni iámindu imeecha engaksï marirhisï káuenga imeecheeri barkuechani! ¡Jimboka ma ora jimbojkusï kʼamajkunhaka!ʼ.
20 ”¡Chá engajtsï auandarhu jaka ka ístu chá engajtsï pímbinharhatiika, apostoliicha ka Tata Diosïiri uandakua páriicha,* kánikua tsípi je ini ambe jimbo! Jimboka Tata Diosï jusgariiskia indeni ambe jimbo engaksïni inde úchika”.
21 Ka uíuinhasï ánjeli ma, tsakapu ma tarhataspti enga xáxepka eska molinurhu anapu tsakapu ma enga kánikua kʼénharhipka ka marirhu kʼuanimaspti, ka uandaspti: “Ísïsï méntku ma jimbojku xerenhantaati Babilonia, inde kʼéri ireta, ka méntku nóteru méni exenhaatia.
22 Nóteru méni kurhaakuarhiatia jimini eskaksï pireriicha kústaxaka arpani ka eskaksï kústatiicha jámaxaka o imeecha engaksï flautani kústajka o trompetani. Nóteru nema jauatia jimini enga ánchikuarhini jámaaka. Nóteru méni kurhaakuarhiatia jimini eska molinurhu anapu tsakapu urhuxaka.
23 Nóteru méni jauatia jimini kandela* ma enga tʼíntskaaka ka nóteru méni kurhaakuarhiatia eska nobiu o nobia ma uandaxaka. Jimbokaksï jimini anapu atarantstiicha jindeespka engaksï xáni kʼéri ambeepka echerirhu ka jimbokari sïkuamikua ambe jingoni támisï jánhastaaska iámindu kʼérati ireteechani.
24 Jo, ísïisti. Indeni ireta jimbo exenhantasti iurhiri Tata Diosïiri uandakua páriicheeri, pímbinharhatiicheeri ka iámindu imeecheeri engaksï echerirhu uándikunhaka”.
Notecha
^ O jamberi “iámu no sési jásï tarhiata para jirejtani”.
^ Griegu jimbo pornéia. Exe je Glosario, ísku jándikua ambe.
^ O “atarantstiicha engaksï jini ka jini jámajka”.
^ Griegu jimbo pornéia. Exe je Glosario, ísku jándikua ambe.
^ O “kastigarinhaka”.
^ O “insiensu”.
^ O “kurhinda tsïreri”.
^ O “profeteecha”.
^ O “lámpara”.
