Apokalipsisi 19:1-21
19 Tátsekua ísï kurhaaspka enajkiksï uánikua kʼuiripuecha uinhachani japi auandarhu. Uandasïreendiksï: “¡Kʼéri ambe arhi je Tata Diosï Jeobani!* Juchaari Tata Diosï pʼímutaantasïndi kʼuiripuechani, kánikua uinhapikua jatsisti ka kʼéri ambeesti,
2 jimboka jurhimbiti ka sési jusgarpisïnga; jimboka kastigariiskia uarhiitini enga kʼéri ísku jándiika, ima enga ikichakueni jásï ambe úka echerini imeeri ísku jándikua ambe* jingoni; ka no sési úkuntastia indeni uarhiitini enga inde ísï jájkurhatini jaka imeeri jántspiriicheeri iurhiri”.
3 Ka jirejiresïksï ménderu uandaspti: “¡Kʼéri ambe arhi je Tata Diosï Jeobani!* Méntku sïraani jauati enga inde uarhiiti ísï kurhini jaka”.
4 Inde 24 orhejtsïkutiicha ka tʼámu kerubiniichaksï tinguikuatsespti ka kʼéri ambeksï arhispti Tata Diosïni enga kʼéri uaxantskuarhu* uaxakatini jaka. Ka uandasptiksï: “¡Eska ísï úkuarhiaka! ¡Kʼéri ambe arhi je Tata Diosï Jeobani!”.*
5 Ístu, kʼéri uaxantskuarhu* uératini kurhaakuarhispti eska nema uandaspka: “Kʼéri ambe arhi je juchaari Tata Diosïni, iámindu chá engajtsï imeeri jántspiriika, chá engajtsï chénharhijka,* sapirhatiicha ka kʼératiicha”.
6 Ka ísï kurhaaspka enajki uánikua kʼuiripu uandani japi, enajki kánikua itsï iurheni* japi ka enajki uinhamu charhancheni japi. Imeechaksï uandasïreendi: “¡Kʼéri ambe arhi je Tata Diosï Jeobani!* ¡Jimboka juchaari Tata Diosï Jeoba enga iámindu ambe újka úni, ueenastia juramuni!
7 Ju je sési pʼikuarherani ka kánikua tsípenharhini ka ju je kʼéri ambe arhini, jimboka Karichi sapichu tembuchaakia ka imeeri témba lista jarhastia.
8 Ísïisti, imeeri témba sésikua intsïnhasti para ambakiti takusï linueri jukantani, meremeresï ka pímbinhasï; jimboka ambakiti takusï linueri indeni ambe arhikuekasïnga engaksï pímbinharhatiicha sési újka”.
9 Ka ánjelirini arhispti: “Kara ini ambe: ‘Tsípisïndiksï imeecha engaksï pʼímarhinhaka paraksï nirani senarini Karichi sapichueri tembuchakuarhuʼ”. Ka ístu uandaspti: “I uandakuechaksï jurhimbitiisti ka Tata Diosïsï ísï uandati”.
10 Enga i ambe úkuarhipka, tinguikuatsespka parani kómarhini. Joperureni ima arhispti: “¡Erokuarhi! ¡Asï jáma indeni ambe úni! Jíjtuni jántspentkusïni jámajka ísï eska tʼu ka chiiti erachiicha* engaksï arhinhaka paraksï uandantani jámani Jesúsiiri ambe. ¡Tata Diosïni kómarhi! Jimboka Jesúsiiri ambe uandantani, inde ambesï újti eska uandanhantaaka ambe enga úkuarhiaka”.*
11 Exespka auandani mítakuarhetini jarhani, ka jimajku xarharaspti kabaiu urapiti ma. Ima enga kabaiuni jatarini japka, arhinhasïndi Mintsinharhikua ka Jurhimbikua, ka sési jusgarpisïndi ka sési jimbo uarhipeni.
12 Xárhati éskuechani jukaasti eska chpiri ka uánikua koroneechani* jukajtsïasti. Nombri ma kámasïndi enga no nema míteka, imajkusï míteti.
13 Takusï ma jukarixati enga iurhiri jáxeka,* ka ísï arhinhasïndi: Tata Diosïiri Uandakua.
14 Ístu, jimajkuksï nikuxapti auandarhu anapu sondaduecha ka kabaiu urapitiichanksï jatapaaxapti, ambakiti takusï linueriksï jukarixapti enga urauraxepka* ka pímbinhasï.
15 Ima, espada iósti ma uéchasïndi enga sési uarhomukukata jaka para kʼérati ireteecha jingoni uarhipeni. Ka ísï eranguauati kʼuiripuechani eska karichi eranguti ma tiámueri pirimu ma jingoni. Ístu, ubasï tsitanduxati jima enga ubasï tsitandunhajka, enga jindeeka Tata Diosïiri ikiatapu, ima enga iámindu ambe újka úni.
16 Ka imani takusïrhu enga jukarini japka, nombri ma karakata jarhasti tsikajtakuarhisï: Reiisti reiicheeri ka Juramutiisti juramutiicheeri.
17 Ístuni, ánjelini ma exespka enga jurhiatarhu anhandetini japka. Ima uinhachaspti ka arhiaspti iámindu pájaruechani engaksï auandarhisï* kárajka: “¡Ju je ixúani! Tánguarhinta je parajtsï arhani Tata Diosïiri kʼéri senani.
18 Ánta je juramutiicheeri kʼuiripetani, sondaduecheeri orhejtsïkutiicheeri kʼuiripetani, kʼuiripuecheeri engaksï juramukua jatsipka ka ánta je kabaiuecheeri kʼuiripetani ka imeecheeri engaksï jatauenga; ánta je iáminduecheeri kʼuiripetani, imeecheeri engaksï no jántspiriipka ka ístu imeecheeri engaksï jántspini jámeenga, sapirhatiicheeri ka kʼératiicheeri”.
19 Ka exespka no sési jásï animalini, echerirhu anapu juramutiichani ka imeecheeri sondaduechani, iáminduechaksï tánguarhintatixapti paraksï imani jingoni uarhipeni enga kabaiu urapitini jatarini japka ka imeeri sondaduechani jingoni.
20 Ka no sési jásï animali jupikanhaspti ka ístu jupikanhaspti Tata Diosïiri uandakua pári* arhikata enga mámaru ambe* úpka indeni japarini ka jimbosï támisï jánhastaapti imeechani engaksï no sési jásï animaliiri mínda jatsikunhapka ka ístu imeechani engaksï kómarhijka imeeri imajenini. Ka tsimarhanksï kʼuanijpanhaspti engaksï útasï tsípiti japka imani lagu jimbo enga chpiriiriika ka enga asufri jingoni kurhini japka.
21 Joperu imeechani engaksï pakarani japka, espada iósti jingonksï uándikuaspti, ima espada iósti jingoni enga uéchani japka ima enga kabaiu urapitini jatarini japka. Ka iámindu pájaruechaksï sési uiniarhaspti imeecheeri kʼuiripeta jingoni.
Notecha
^ O “¡Aleluya!”. Ixú úrakuarhesïndi uandakua Jah, enga ístu jindeeka para arhikuekani nombrini Jeoba.
^ Griegu jimbo pornéia. Exe je Glosario, ísku jándikua ambe.
^ O “¡Aleluya!”. Ixú úrakuarhesïndi uandakua Jah, enga ístu jindeeka para arhikuekani nombrini Jeoba.
^ O “tronurhu”.
^ O “¡Aleluya!”. Ixú úrakuarhesïndi uandakua Jah, enga ístu jindeeka para arhikuekani nombrini Jeoba.
^ O “tronurhu”.
^ O “janhanharhijka”.
^ O “¡Aleluya!”. Ixú úrakuarhesïndi uandakua Jah, enga ístu jindeeka para arhikuekani nombrini Jeoba.
^ O “enajki uánikua itsïicha”.
^ O “ermanuecha”.
^ O “eskaksï jauaka profesiecha”.
^ Griegu jimbo: “diademeechani”.
^ O jamberi “tskarhetakata jaka”.
^ O “tʼuputʼupuxepka”.
^ O “tarhiatarhisï”, “karhakisï”.
^ O “profeta”.
^ O “kʼéri ambe”.
