Apokalipsisi 2:1-29
2 ”Karaku imani ánjelini enga Éfesu anapu kúnguarhikua jimbo jaka: Ísïsï uandajti ima enga siete jóskuechani kaani jaka imeeri jájki jurhijkandani jimbo ka enga jimeesïsï xanharani jaka engaksï siete kandela jatakuecha jaka ka engaksï orueriika:
2 ‘Ji sési míteska ambe engari újka ka na engari xáni uinhamu ánchikuarhijka ka ístu na engari xáni tekaantajka. Ístuni míteska eskari no sáni jaiapanheantasïnga imeechani engaksï no sési ambe niátajka ka eskari tsʼéjkuaska imeechani engaksï apostoli eratakuarhijka ka exeskaria eskaksï chkuanderasïnga.
3 Ístu, eskari kánikua tekaantaxaka ka eskari orhepani uéraska juchiiti nombri jimbo nájkirukari uánikua ambe nitamakuarhika, ka nóri kuatantaxaka.
4 Joperu ma ambejkukinisï uéjka arhini: eskari nóteru ísï xénchpesïngia eskari na xénchpeenga ueenani jámani.
5 ”ʼJiájkani miánta na engari xáni iauani nípkia, joperuri kuarhatseska, ísï jimbo, móanta ka ueena ménderu imani ambe úni engari ueenani jámani ueenga. Ka engari no ísï úska, ji juuaka ka euantaakakini chiiti kandela jatakuani ka kénditaaka jima enga jaka; joperu engari móantaska, no ísï uaaka.
6 Joperuri ini ambe kʼóru sési úxaka: méntkuri no jaiapanhentasïnga ambe enga újka Nikolásiiri grupu,* ka jíjtuni méntkuni no sáni jaiapanhentasïnga indeni ambe.
7 Ima enga kurhandijka, eska kurhandiaka ambe enga espiritu arhiajka kúnguarhikuechani: ima enga andaaka, ji sésikua íntskuaka paraka akuaka anhatapuni enga tsípikua íntspijka ka enga Tata Diosïiri paraisurhu jakaʼ.
8 ”Karaku imani ánjelini enga Esmirna anapu kúnguarhikua jimbo jaka: Ísïsï uandajti ima enga Orheteeka ka Últimu, ima enga uarhika ka enga tsíntaka:
9 ‘Ji sési míteska na engari kómu nitamakuarhijka* ka eskari no ma ambe jatsikuarheska, joperuri kʼóru uánikua ambe jatsikuarheska. Ka ístuni sési míteska na engaksï xáni no sési uandajka Tata Diosïiri ambe imeecha engaksï judiu eratakuarhijka; indeechaksï grupu máesti engaksï Satanási jingoniika.
10 Méntku asï jáma chéni imani ambe jimbo engari kómu nitamakuarhiaka.* Exe, Noambakiti seguiriini jauati jánguarhintani paraksïni chánksïni máru ónhatarkuarhini parajtsï sési sési tsʼéjkunhani, ka no sésijtsï kánhaaka 10 jurhiatikua. Jánguarhinta no jurajkuni Tata Diosïni asta uarhikuarhu jamberi ka jíkeni íntskuaka korona tsípikueri.
11 Ima enga kurhandijka, eska kurhandiaka ambe enga espiritu arhiajka kúnguarhikuechani: ima enga andaaka, méntku no ma ambe úkuati uarhikua enga jindeeka para tsimani úni jámaniʼ.
12 ”Karaku imani ánjelini enga Pérgamu anapu kúnguarhikua jimbo jaka: Ísïsï uandajti ima enga imani espadani kámani jaka enga tsimapuru atajka ka enga kánikua ióskaka ka enga sési uarhomukukata jaka:
13 ‘Ji míteska nani engari irekani jaka: jima enga Satanásiiri kʼéri uaxantskua* jaka. Joperuri kʼóru no jurajkuxaka juchiiti nombrini. Ístu, nóri méni uandaska eskarini no jakajkusïnga* jíndeni, nijtu imani jurhiatikuechanisï enga Antipasi irekani japka, juchiiti testigu enga mintsinharhikueka, ima enga chánksïni japarini uándikunhaka jima enga Satanási irekaka.
14 ”ʼJoperu jarhasti máru ambe engakeni uékani jaka arhini: eskari jimini jatsiaska imeechani engaksï inchandimejka úni ambe enga Balaami jorhentpipka, ima enga arhipka Balakini néna tsʼéjkuani Israeli uájpeechani,* parakaksï apiringa imani kʼuiripetani engaksï diosï úkateecha kéjtsïtaminhajka ka paraksï ísku jándikua ambe niátani.*
15 Ka ísturi jimini jatsiaska imeechani engaksï inchandimejka úni ambe enga Nikolásiri grupu* jorhentpijka.
16 Ísï jimbo, móanta. Joperu engari no móantaska, ji no ióndaaka jurhani ka imeechani jingoni uarhipeaka espada iósti jingoni enga juchiiti penchumikuarhu uérajka.
17 ”ʼIma enga kurhandijka, eska kurhandiaka ambe enga espiritu arhiajka kúnguarhikuechani: ima enga andaaka, ji íntskuaka sáni maná enga jískakata jaka ka tsakapu sapinharhi urapiti ma íntskuaka. Jima karanharhikukata jarhasti jimbanhi nombri ma enga no nema míteka, imajkusï míteti enga intsïnhajkaʼ.
18 ”Karaku imani ánjelini enga Tiatira anapu kúnguarhikua jimbo jaka: Ísïsï uandajti Tata Diosïiri Uájpa, ima enga ísï jukaaka éskuechani komueska chpiri ka jantsiriichani komueska kobri enga sési ambarhekata jakaia:
19 ‘Sési míteska ambe engari újka, na engari xénchpejka, na engari mintsikajka ka na engari marhuakujka Tata Diosïni ka ístu na engari xáni tekaantajka. Ka ístuni sési míteska eskari iásï sánderu ambe úxakaia eska ueenani jámani.
20 ”ʼJoperu jarhasti ma ambe engakeni uéjka arhini: eskari no ma ambe arhisïnga imani uarhiitini enga Jesabeli arhinhajka, ima enga uandajka eska Tata Diosïiri uandakua páriiska* ka enga támisï jánhastaajka juchiiti jántspiriichani imani ambe jingoni enga jorhentpijka parakaksï ísku jándikua ambe niátaaka* ka paraksï arhani imani kʼuiripetani engaksï diosï úkateecha kéjtsïtaminhajka.
21 Ji tiempu íntskuska paraka móantapiringa, joperu ima no uékasïndi móantani jimboka ísku jándikua ambe niátaska.*
22 Exe, uaaka eska uinhamu pʼamenchaaka ka eska ísku apojtsïkuntaaka, ka imeechani engaksï ísku jándikua ambe niátajka* imani jingoni, uaaka eskaksï kánikua kómu nitamakuarhiaka,* joperu engaksï móantaska indeni ambe jimbo enga inde uarhiiti úraaka,* jiájkani no ísï uaaka.
23 Kʼéri pʼamenchakua ma jingoni uándikuauaka indeni uarhiitiiri uájpeechani. Ka ísï, iámindu kúnguarhikuechaksï míteati eskani jísïni exeni jaka ambeksïsï jatsi kʼuiripuecha imeeri eratsekuarhu ka na engaksï pʼikuarhinhejka imeeri mintsitarhu.* Ka íntskuakaksïni chánksïni ambe engajtsï andakuarheni jaka chaari úkuecha jimbo.
24 ”ʼJoperujtsï jarhaska máteru engajtsï Tiatira jaka, iámindu chá engajtsï no újka ambe enga Jesabeli jorhentpijka ka engajtsï méntku no niáraka míteni indeni ambe enga ísï mítekateeka komu “chkuanderakua ambe enga Satanási jorhentpijka”, jíksïni arhisïnga chánksïni: “Nóteruksïni ambe ma kurhacheakia.
25 Joperu kʼóru, asï jáma je jurajkuni ambe engajtsï jatsika asta jiáni engani ji juuaka.
26 Ima enga andaaka ka enga juchiiti xanharuecha jimbo jámaaka* asta kʼamarhukuni jamberi, ji juramukua íntskuaka paraka juramukuauaka ireteechani,
27 ísï eskarini juchiiti Taati na juramukua íntskuka jíndeni. Ka ima eranguauati kʼuiripuechani ísï eska karichi eranguti ma tiámueri pirimu ma jingoni, ka kʼamajkunhaatiksï ísï eska na kʼependurhikuarhijka jatakua ambe enga kʼuerekua* jingoni úkata jaka.
28 Ístuni íntskuaka imani jóskuani enga xarhentku andarajka.
29 Ima enga kurhandijka, eska kurhandiaka ambe enga espiritu arhiajka kúnguarhikuechani”ʼ.
Notecha
^ O “sekta”.
^ Griegu jimbo: “no sési nitamakuarhijka”.
^ Griegu jimbo: “no sési nitamakuarhiaka”.
^ O “tronu”.
^ O “eskarini no mintsikasïnga”.
^ O “néna peerani ambe ma paraksï Israeli uájpeecha téksarutani”.
^ Exe je Glosario, ísku jándikua ambe.
^ O “sekta”.
^ O “eska profetiseeska”.
^ Exe je Glosario, ísku jándikua ambe.
^ Griegu jimbo pornéia. Exe je Glosario, ísku jándikua ambe.
^ Exe je Glosario, enganiarpini; ísku jándikua ambe niátani.
^ Griegu jimbo: “kánikua no sési nitamakuarhiaka”.
^ Griegu jimbo: “inde uarhiitiiri úkuechani jimbo”.
^ Griegu jimbo: “rinioniicharhu”.
^ Griegu jimbo: “enga patsaaka ambe engani ji újka”.
^ O “atsïmu”.
