Apokalipsisi 21:1-27
21 Jimajkani exespka jimbanhi auanda ma ka jimbanhi echeri ma; jimboka ima auanda enga ióntki japka, nóteru jarhasptia ka nijtu ima echeri enga ióntki japka, ka mari nóteru jarhastia.
2 Ístuni exespka pímbinhasï iretani Jimbanhi Jerusalénini, auandarhu uératini kétsexapti, jima uératini enga Tata Diosï jaka. Ka ísï jarhasptia eska nobia ma enga sési jáxentajka para uámbani erontani.
3 Tátsekua kurhaaspka eska nema uinhachaxapka jima uératini enga kʼéri uaxantskua* japka ka uandasïreendi: “¡Exe! Tata Diosïiri tabernakulu* kʼuiripuecha jingoni jarhasti. Tata Diosï imeecha jingoni irekaati ka imeechaksï imeeri ireteuati. Ka Tata Diosïsï imeecha jingoni jauati.
4 Ka ima kutsunharhikuauati iámu uekua, ka uarhikua nóteru jauatia, nóteru nema kómu pʼikuarheraatia* ka nóteru nema ueraatia nijtu no sési pʼikuarherani. Ióntki anapu ambe nóteru jarhastia”.
5 Ima enga kʼéri uaxantskuarhu* uaxakatini japka, uandaspti: “¡Exe! Jimbanhi úntaxaka iámindu ambe”. Ístu uandaspti: “Karaa ini uandakuechani jimbokaksï mintsinharhikueska ka jurhimbikua ambeesti”.
6 Ka arhisptirini: “¡Inde ambe ísï úkuarhistia! Ji jindeeska Alfa ka Omega,* ueenakua ka kʼamarhukua. Iámindu ima enga kʼarhichani jaka, ji íntskuaka imani itsïni enga jima uérani jaka nani enga itsï tsípikueri uérajka ka no ma maiampiati.
7 Ima enga andaaka, iámindu ini ambe pʼiuati ka ji imeeri Tata Diosïuaka ka ima juchiiti sapiuati.*
8 Joperu imeecha engaksï chémsïika, imeecha engaksï no mintsikajka, imeecha engaksï no pímbinhasïika ka engaksï ikichakueni jásï ambeeka, imeecha engaksï uándikpijka, imeecha engaksï ísku jándikua ambe niátajka,* imeecha engaksï sïkuamikua ambe kámajka, imeecha engaksï diosï úkatechani kómarhiajka ka iámindu imeecha engaksï chkuanderajka, lagurhuksï kʼuanijpanhaati enga chpiri ka asufri jingoni kurhini jaka, enga arhikuekajka uarhikuani enga jindeeka para tsimani úni jámani”.
9 Máechakua ima siete ánjeliicheeri engaksï siete platoniichani kaani japka ka engaksï uinirini japka siete últimu kastiguecha, jurhaspti ka arhisptirini: “Ju, jimbokakeni exeraaka nobiani enga Karichi sapichueri témbeeka”.
10 Jiájkani espiritu santu jimbo, imarini kʼéri juátarhu ma páspti enga kánikua iótapka ka exerasptirini pímbinhasï iretani enga jindeeka Jerusaléni, auandarhu uératini kétsexapti, jima uératini enga Tata Diosï jaka,
11 ka meremerexexapti Tata Diosïiri tʼíntskua jimbo. Ísï meremerexexapti eska tsakapu ma enga meru kánikua sési jáxeka, ísï eska jaspe enga meremerexejka.
12 Kʼéri barda ma jukaspti enga iótapka, 12 puerteechani jukaaspti ka 12 ánjeliichaksï jarhaspti puerteecharhu; ka puerteecharhu, karanharhikukataksï jarhaspti nombriicha 12 kʼumanchikuecheeri* engaksï Israeli uájpeeka.
13 Esterhisï tanimu puerteechani jukaaspti, norterhisï tanimu puerteecha, surirhisï tanimu puerteecha ka oesterisï tanimu puerteecha.
14 Ístu, ireteeri barda 12 tsakapuechani jukaaspti engaksï pítsekuepka, ka jimaksï 12 nombriicha karanharhikukata jarhaspti 12 apostoliicheeri engaksï Karichi sapichueriika.
15 Ima engareni uandontskuarhechini japka, tsʼéritarakua ma kámaxapti, pʼatamu ma kámaxapti orueri para iretani tsʼéritani, puerteechani ka ístu bardani.
16 Ireta ísï úkata jarhaspti eska kuadru ma, méntkueni kóskaspti ka ióskani. Pʼatamu jingoni tsʼéritaspti iretani; xánisï niáraspti ma 2,220 kilometru;* méntkueni ióskaspti, kóskani ka iótani.
17 Ístu tsʼéritaspti bardani ka xánisï niáraspti ma 64 metru;* ánjeli imani tsʼéritarakuani úraspti engaksï kʼuiripuecha úrajka para tsʼéritani ambe ma.
18 Barda jasperiispti ka ireta ambakiti orueriispti, ísï meremerexesïreendi eska bidriu.
19 Iretarhu anapu bardeeri pítsekuechaksï sési xarharasïreendi, jimboka mámaru jásï tsakapu jukaspka engaksï sési járhapka: orheta pítsekua jáspeespti; máteru pítsekua safiruespti, ini jingonksï tsimaniisptia; máteru pítsekua kalsedoniespti, ini jingonksï tanimuesptia; máteru esmeraldeespti, ini jingonksï tʼámuesptia;
20 máteru sardónikeespti, ini jingonksï sinkoesptia; máteru sardiuespti, ini jingonksï seisiisptia; máteru krisolituespti, ini jingonksï sieteesptia; máteru beriluespti, ini jingonksï ochuesptia; máteru topasiuespti, ini jingonksï nuebeesptia; máteru krisopraseespti, ini jingonksï diesiisptia; máteru jasintuespti, ini jingonksï onseesptia; ka máteru amatisteespti, ini jingonksï doseesptia.
21 Ístu 12 puerteechaksï jindeespti 12 perleecha; mándani puerta, ma perla jingontku úkata jarhaspti. Ka iretarhu anapu sánderu kʼéri xanharu ambakiti orueriispti, ísï xarharasïreendi komueska bidriu.
22 No ma templu exespka indeni iretarhu, jimboka Tata Diosï Jeoba, ima enga iámindu ambe újka úni, ima jindeesti jima anapu templu ísï eska Karichi sapichu na jindeeka.
23 No uétarhisïndi eska jurhiata o eska luna tʼíntskaaka iretarhu, jimboka Tata Diosïiri tʼíntskuasï tʼíntskajka iretarhu ka Karichi sapichu jindeesti jima anapu kandela.*
24 Kʼérati ireteechaksï uaati jámani imeeri tʼíntskua jimbo ka echerirhu anapu juramutiichaksï kʼéri ambe exeati.
25 Puerteechaksï chúskutaati mítakuarhetini jarhani, jimboka jima no méni chúriaka.
26 Kʼérati iretarhu anapu kʼuiripuechaksï kʼéri ambe arhiati ka kʼéri ambeksï exeati indeni iretani.
27 Joperu méntku nóteru ambe ma inchaati indeni iretarhu enga no pímbinhasï jauaka ka nijtu ima inchaa enga ikichakueni jásï ambe niátajka ka enga támisï jánhastpini jámajka. Imeechajkuksïsï inchaati engaksï karakata jauaka indeni karakatarhu* nani enga karanhani jaka néksï intsïnhaa tsípikua ka inde karakata Karichi sapichueriisti.
Notecha
^ O “tronu”.
^ O “kʼumanchikua sapichu”.
^ O “nóteru nema kómu pʼikuarheraatia jimboka nóteru jatsiskia ambe ma o nemani”.
^ O “tronurhu”.
^ Alfa ka Omega jindeestiksï orheta ka últimu letra abesedariueri griegu jimbo.
^ O “uátsïtiuati”.
^ Exe je Glosario, ísku jándikua ambe.
^ O “tribuecheeri”.
^ O “12 mili estadiu”. Ma estadiu 185 metruespti (606.95 piesi).
^ O “144 kodu”.
^ O “lámpara”.
^ O “roiurhu”.
