Apokalipsisi 22:1-21
22 Jimajkani, imarini iurhekua ma exeraspti nani enga itsï tsípikueri iurheni japka, pímbinhanharhispti ka Tata Diosï ka Karichi sapichueri kʼéri uaxantskuarhu* uérasïreendi,
2 sánderu kʼéri xanharu jimbo enga iretarhu jaka terujkanisï iurhesïreendi. Iurhekuarhu uanamukuteni jimbo, jiniani ka ixúanksï jarhaspti anhatapuecha engaksï tsípikua íntspijka, engaksï 12 xanhari jukeenga frutu ka mándani kutsïksï jukasïreendi. Anhatapuecheeri chkurhi jindeespti para kʼérati ireteechani ambakeraantani.
3 Ka Tata Diosï nóteru méni uandaati eska no jaiapanhentasïnga iretani, sánderu sési, iretarhuksï jauati Tata Diosïri kʼéri uaxantskua* ka Karichi sapichueri kʼéri uaxantskua. Ka imeeri jántspiriichaksï marhuakuni jauati,
4 erateatiksï ka imeeri nombriksï jukarini jauati tsʼérukuarhu.
5 Nóteru méni chúriatia ka no uétarhiati eska kandela* ma tʼíntskaaka iretarhu o eska jurhiata tʼíntskaaka, jimboka Tata Diosï Jeobasï tʼíntskakuauaka ka imeechaksï juramuati para méntkisï.
6 Ánjelirini arhispti: “Íksï uandakuecha mintsinharhikuesti ka jurhimbikua ambeestiksï. Ísïisti, Tata Diosï Jeoba, ima enga uandaraapka imeeri uandakua páriichani,* axasti imeeri ánjelini para xarhatakuani imeeri jántspiriichani ambe enga úkuarhiaka no ióni jimbo.
7 Exe, no ióni jimbo juuaka. Tsípisïndi ima enga újka ambe enga uandajka i karakata eska úkuarhiaka”.*
8 Ji Juanu, jísïni kurhaaka ka exeni iámindu ini ambe. Engani na ísï exepkia ka kurhandini, tinguikuatsespka parani kómarhini imani ánjelini engareni ini ambe exerapka.
9 Joperureni ima arhispti: “¿Amberisï úni jaki? ¡Asï jáma indeni ambe úni! Jíjtuni jántspentkusïni jámajka ísï eska tʼu ka ísï eska chiiti erachiicha* engaksï Tata Diosïiri uandakua páriika ka ísï komueska imeecha engaksï újka ambe enga i karakata* uandajka. Tata Diosïni kómarhi”.
10 Ka ístu uandaspti: “Asï tʼujku míte* ambe enga uandajka i karakata* eska úkuarhiaka, jimboka ima jurhiatikua enga uaxastakata jakaia, axuterku jarhastia.
11 Ima enga no káni sési jámajka eska seguiriini jauaka no káni sési jámani; ka ima enga ikichakueni jásï ambeeka eska seguiriini jauaka ikichakueni jásï ambeeni. Joperu ima enga sési jámajka eska seguiriini jauaka sési jámani; ka ima enga pímbinhasïika eska seguiriini jauaka pímbinhasï jarhani.
12 ”‘¡Kurhaa! No ióni jimbo juuaka ka juájtaaka imani ambe engani íntspiaka parani mándani arini maiamuantani imeeri úkuecha jimbo.
13 Ji jindeeska Alfa ka Omega,* primeru ka últimu, ueenakua ka kʼamarukua.
14 Tsípisïndiksï imeecha engaksï juparhiantajka imeecheeri takusï iórhatiichani paraksï úni akuani imani anhatapuechani engaksï tsípikua íntspijka ka paraksï úni puerteecharhisï inchaakuni iretarhu.
15 Uíchuechaksï uérakua jarhasti,* ka ístu imeecha engaksï sïkuamikua ambe kámajka, imeecha engaksï ísku jándikua ambe niátajka,* imeecha engaksï uándikpijka, imeecha engaksï diosï úkateechani kómarhiajka ka iámindu imeecha engaksï tsitijka chkuanderakua ambe ka engaksï pʼindeka chkuanderaniʼ.
16 ”‘Ji, Jesúsi, axaska juchiiti ánjelini paraksïni chánksïni aianguni ini ambe paraksï kúnguarhikuecha sési jarhani. Ji jindeeska Dabidiiri sïrukua ka ístuni imeeri uájpeeska ka ji jindeeska ima jóskua enga xarhentku andarajka ka enga meremerexejkaʼ”.
17 Espiritu santu ka nobia, méntkuksï uandaxati “¡Ju!”. Ka iámindu ima enga kurhandiaka ini ambe, eska uandaaka “¡Ju!”. Ka ístu juue ima enga kʼarhichani jaka. Ima enga uékaaka, eska itsïmaaka itsï tsípikueri ka no ma maiampiati.
18 “Imeechani engaksï kurhandijka ambe enga karakata jaka ini karakatarhu enga uandajka ambe enga úkuarhiaka,* ji arhiaxaka:* enga nema jatsikuntaska ambe ma ini karakatarhu, Tata Diosï axakuauati indeni kastiguechani engaksï ini karakata jimbo karakata jaka;
19 ka enga nema pʼikuntaska ambe ma ini karakatarhu enga uandajka ambe enga úkuarhiaka,* Tata Diosï no jurajkuati para akuani imani anhatapuechani engaksï tsípikua íntspijka ka no jurajkuati eska inchaakuaka pímbinhasï iretarhu ka i ambesï karakata jati ini karakatarhu.*
20 ”Ima enga uandantajka ini ambe, uandasïndi: ‘Jo, no ióni jimbo juuakaʼ”.
“¡Eska ísï úkuarhiaka! Ju, Jesúsi, juchiiti Tata”.
21 Eska Jesúsi* kánikua kóndeantauaka pímbinharhatiichani.
Notecha
^ O “tronurhu”.
^ O “tronu”.
^ O “lámpara”.
^ O “profeteechani”.
^ O “ambe enga uandajka roiueri profesia”.
^ O “ermanuecha”.
^ O “roiu”.
^ O “roiu”.
^ Griegu jimbo: “Asï seiu jatsiku”.
^ Alfa ka Omega jindeestiksï orheta ka últimu letra abesedariueri griegu jimbo.
^ Imeechani arhikuekaasïndi engaksï imani ambe pʼindeka úni enga Tata Diosï uandajka eska ikichakueni jásï ambeeska.
^ Exe je Glosario, ísku jándikua ambe.
^ O “roiueri profesia”.
^ Griegu jimbo: “uandantasïnga”.
^ O “ini roiurhu profesierini”.
^ O “roiurhu”.
^ Griegu jimbo: “Tata Jesúsi”.
