Apokalipsisi 3:1-22
3 ”Karaku imani ánjelini enga Sardisi anapu kúnguarhikua jimbo jaka: Ísïsï uandajti ima enga kaani jaka Tata Diosïiri siete espirituechani ka ístu siete jóskuechani: ‘Ji sési míteska ambe engari xáni újka ka ístuni míteska eska uandanhasïnga eskari tsípiti jarhaska, joperuri uarhiskia.
2 Jingontku ja ka uíuinhajkunta ambe enga útasï pakarani jaka ka enga sáno uarhika, jimbokani ji nótkini exexaka eskari kʼamaraskia úni ambe* engari úni japka juchiiti Tata Diosïni japarini.
3 Ísï jimbo, asï méni mirikurhi ambe engari intsïnhaka ka ambe engari kurhandika. Asï méni jurajku indeni ambe úni ka móanta. Jimboka engari no tsínharhiska, jíkeni ísï niáracheaka komueska sïpari ma ka tʼuri méntku no míteaka na jandora niáraa ji.
4 ”ʼJoperuksï jarhasti máru* Sardisi engaksï no jájkuka imeecheeri takusïni, ka jíndeni jingonksï xanharaati takusï urapiti jukarini, jimbokaksï ísï andakuarheska.
5 Ima enga andaaka, ísï xukuparhatini niuati, takusï urapiti jukarini, ka ji no méni kénditaaka imeeri nombrini imani karakatarhu nani enga karanhani jaka néksï intsïnhaa tsípikua, sánderu sési, juchiiti Taatini japarini ka ístu imeeri ánjeliichani japarini, ji uandaaka eskani míteska imeeri nombrini.
6 Ima enga kurhandijka, eska kurhandiaka ambe enga espiritu arhiajka kúnguarhikuechaniʼ.
7 ”Karaku imani ánjelini enga Filadelfia anapu kúnguarhikua jimbo jaka: Ísïsï uandajti ima enga pímbinhasïika, ima enga sési jimboeka, ima enga Dabidiiri iabeni kámani jaka, ima enga mítajka para nóteru nema míkania ka ima enga míkajka para nóteru nema mítania:
8 ‘Ji sési míteska ambe engari újka. —Exe, chiiti orhepatini jimbo peeraska puerta ma enga mítakuarhetini jaka ka enga no nema uaaka míkani—. Ka nájkirukari tʼu chkérini jaka, ji míteska eskari ísï úska eskakeni na arhika ka nóri méni jurajkuska juchiiti nombrini.
9 Exe, ji juaka indeni grupuni enga Satanási jingoniika* —indeechani engaksï judiu eratakuarhijka joperu engaksï chkuanderajka— paraksïni tinguixurhichini* ka mítetarauaka na engakeni xáni xénchaka tʼungini.
10 Jimbokari patsaaska indeni uandakuechani engaksï uandantajka na engani xáni tekaantaka,* jíjtukeni kuájchakuaka jiáni engaksï kʼuiripuecha tsʼéjkunhaaka; i ambe iámu parhakpinirhu úkuarhiati parakaksï iámindu parhakpini anapuecha tsʼéjkunhaaka.
11 Ji no ióndaaka jurhani. Seguiriini ja uinhamu jupikani indeni ambe engari jatsika, parakakeni no nema euaka chiiti koronani.
12 ”ʼJi uaaka eska ima enga andaaka, ísïiuaka komueska pilari ma juchiiti Tata Diosïiri templurhu ka nóteru méni kéndikuatia jima. Imeeri tsʼérukuarhu, ji karaaka juchiiti Tata Diosïiri nombrini ka juchiiti Tata Diosïiri ireteeri nombrini, enga jindeeka Jimbanhi Jerusaléni enga auandarhu uératini jurhajka, jima uératini nani enga juchiiti Tata Diosï jaka; ka ístuni karaaka juchiiti jimbanhi nombrini.
13 Ima enga kurhandijka, eska kurhandiaka ambe enga espiritu arhiajka kúnguarhikuechaniʼ.
14 ”Karaku imani ánjelini enga Laodisea anapu kúnguarhikua jimbo jaka: Ísïsï uandajti ima enga arhinhajka Améni, testigu enga mintsinharhikueka ka enga sési jimboeka, ima enga Tata Diosï orheta kueraaka:
15 ‘Ji sési míteska ambe engari xáni újka ka ístuni míteska eskari no tsʼirapiti jarhaska ka nijturi jorhepiti jaki. Sési japirindi eskari méntku tsʼirapepiringa o eskari mátirku jorhepepiringa.
16 Joperu, jimbokari kuatapiti jarhaska, nójturi jorhepeska nijturi tsʼirapiti jaki, jimbokenisï jiuantaaka.
17 Tʼuri uandasïnga “ji jatsikuarheriiska, uánikua ambesïni jatsikia ka méntkuni no ma ambe uétarhinchasïnga”, ka jiniri tʼu no exeni eskari méntku no sáni tsípikua jingoni irekaxaka, eskari lástima íntspisïnga, eskari méntku no ma ambe jatsikuarheska ka eskari méntku no ma ambe úsïnga exeni ka eskari xásku jámaxaka.
18 Jimbokenisï arhini jaka eskarini jíndeni piáchiaka oru enga sési ambarhekata jaka chpiri jingoni parakari jatsikuarheriuaka, ka ístu takusï urapiti parakari xukuparhatini jámaaka ka paraksïni no kʼuratsetani jimbokari xásku jámaxaka, ka ístu sïpiati parari éskuarhu atanharhini ka ísïri únia exeni.
19 ”ʼJi arhistakuasïnga ka xukaasïnga iámindu imeechani engani xénchaajka. Ísï jimbo, móanta ka iámu mintsita jingoni marhuaku Tata Diosïni.
20 Exe, ji téndenastaxaka puertarhu jamukuteni. Engareni nema kurhachakuska ka mítani puertani, ji inchaakuaka imeo ka imani jingoni senariuaka ka imajtu jíndeni jingoni.
21 Ima enga andaaka, ji sésikua íntskuaka para ima jíndeni jingoni uaxakani juchiiti kʼéri uaxantskuarhu* ísï eskani ji na andaka ka uaxakani juchiiti Taati jingoni imeeri kʼéri uaxantskuarhu.
22 Ima enga kurhandijka, eska kurhandiaka ambe enga espiritu arhiajka kúnguarhikuechaniʼ”.
Notecha
^ O “eskari iámu ambe úskia”.
^ Griegu jimbo: “máru nombriicha”.
^ O “juaka Satanásiiri sinagogani”.
^ O “paraksïni kʼéri ambe arhini”.
^ O jamberi “Jimbokari májkuendi xáni tekaantaska eskani ji”.
^ O “tronurhu”.
