Apokalipsisi 4:1-11
4 Ka ísï tátsekua, exespka puerta ma enga mítakuarhetini japka jini auandarhu, ka ima uandakua engareni orheta uandajpapka, ísï kurhaakuarhisïreendi komueska trompeta ma. Arhisptirini: “Ju ixúani karhakua, jimbokakeni exeraaka ambe enga xáni úkuarhiaka”.
2 Ísï tátsekua, jirejiresïrini incharhispti espiritu santu. Ka kʼéri uaxantskua* ma exespka auandarhu, ka nema uaxakatixapti kʼéri uaxantskuarhu.
3 Ka ima enga jima japka uaxakatini, ísï xarharasïreendi komueska jaspe ka komueska sési jásï tsakapu charhapiti ma,* ka kʼéri uaxantskuani* uirhipandatixapti arkoirisi ma enga ísï xarhareenga komueska esmeralda.
4 Ka 24 kʼéri uaxantskuechaksï* uirhipandatixapti imani kʼéri uaxantskuani, ka exespka eskaksï indeni kʼéri uaxantskuecharhu 24 orhejtsïkutiicha uaxakatixapka, takusï urapitiksï jukarixapti ka koronaksï ma jukajtsïspti orueri.
5 Ka kʼéri uaxantskuarhu* uératini, piritaxapti ka uinhamu charasïreendi ka ísï kurhaakuarhisïreendi enajki uandanhani japi; ka kʼéri uaxantskuarhu orhepatini, siete kandeleechaksï* jarhaspti engaksï tixarani japka. Iichaksï imani siete espirituechani arhikuekaasïndi engaksï Tata Diosïiriika.
6 Ka kʼéri uaxantskuarhu* orhepatini, ísï xarharasïreendi enajki kánikua itsï japi enga pímbinhanharhipka ka enga meremerexeni japka.*
Ka kʼéri uaxantskuarhu terujkani* ka jima uirhipandani, tʼámu kerubiniichaksï* jarhaspti engaksï iámu jukarhikuarheapka éskuechani, orhepanisï ka tátsepanisï.
7 Ka ima kerubini enga orhetku japka, xáxespti komueska leoni ma, ka segundu kerubini xáxespti komueska toru sapichu ma, ka terseru kerubini xánharhispti komueska achamasï ma, ka kuartu kerubini xáxespti komueska águila ma enga kárani jarhajka.
8 Indeksï tʼámu kerubiniicha, mándani arhinksï seisi kʼésïichani* jukaaspti, ka kʼésïicharhuksï iámu éskua jukarhikuarheaspti, incharinisï ka uérakisï. Ka chúrikua ka jurhiakua méntkuksï uandani jarhasïndi: “Pímbinhasïisti, pímbinhasïisti, pímbinhasïisti Tata Diosï Jeoba, ima enga iámindu ambe újka úni, ima enga japka ka enga jaka ka enga jurhani jaka”.
9 Méni engaksï inde kerubiniicha kʼéri ambe arhijka, engaksï kʼéri ambe exejka ka engaksï diosmaiamukua arhijka imani enga kʼéri uaxantskuarhu* uaxakatini jaka, imani enga irekani jaka para méntkisï,
10 inde 24 orhejtsïkutiichaksï tinguixurhikusïndi imani enga kʼéri uaxantskuarhu* uaxakatini jaka ka kómarhisïndiksï imani enga irekani jaka para méntkisï. Pʼíjtsïntasïndiksï koronani ka kʼuanikuasïndiksï kʼéri uaxantskuarhu orhepani ka uandasïndiksï:
11 “Juchaari Tata Diosï Jeoba, tʼujkuresï jukanchaka k’éri ambe arhinhani, kʼéri ambe exenhani ka uinhapikua intsïnhani jimbokari tʼu kueraaska iámindu ambe, ka iámindu ambe niárasti jarhani ka kueraanhani jimbokari tʼu ísï uékaska”.
Notecha
^ O “tronu”.
^ O “sardio”.
^ O “tronuni”.
^ O “tronuechaksï”.
^ O “tronurhu”.
^ O “lámpareechaksï”.
^ O “tronurhu”.
^ Griegu jimbo: “enajki mari ma japi bidriueri, kristaliini jásï ma”.
^ O “terujkanirhu, tronurhu máekandu”.
^ Kerubiniichaksï ánjeliisti engaksï kánikua juramukua jatsika.
^ O “aleechani”.
^ O “tronurhu”.
^ O “tronurhu”.
