Apokalipsisi 6:1-17
-
Karichi Sapichu pʼikuasïndi seisi seiuechani (1 a 17)
-
Ima enga kabaiu urapiti jatarini jaka, andapiti uérasïndi (1 ka 2)
-
Ima enga kabaiu jatarini jaka enga xásï koloriika komueska chpiri, pínandikua kénditasïndi (3 ka 4)
-
Ima enga kabaiu turhipitini jatarini jaka úsïndi eska kʼarhimakua jauaka (5 ka 6)
-
Ima enga kabaiu jatarini jaka enga iámu tsïpambeka arhinhasïndi Uarhikua (7 ka 8)
-
Imeecha engaksï uándikunhaka, altarirhu kétsekuaksï exenhasïndi (9 a 11)
-
Kʼéri ma jenchesïndi (12 a 17)
-
6 Exespka enga Karichi sapichu pʼikupka máechakua seiuni imani siete seiuecheeri, ka inde tʼámu kerubiniicheeri, kurhachakuspka máechakua kerubinini enga ísï kurhachakuarhienga komueska charanchini, ka uandaspti: “¡Ní!”.*
2 Ka jimajkani exespka kabaiu urapitini ma. Ka ima enga nirani japka jatarini, arku ma kámaxapti ka korona ma intsïnhaspti; ka enga nirani japka, kʼamajkuaxapti imeechani engaksï ikiakujka para andapiti uérani.
3 Enga Karichi sapichu pʼikupka máteru seiuni, íni jingonksï tsimaniisptia, kurhachakuspka segundu kerubinini uandani: “¡Ní!”.
4 Ka uéraspti máteru kabaiu enga xásï koloriipka komueska chpiri. Ima enga jima nirani japka jatarini, sésikua intsïnhaspti para pínandikua kénditani echerirhu, paraksï uándikperani imeecha engaksï echerirhu irekaka, ka kʼéri espada ma intsïnhaspti.
5 Enga Karichi sapichu pʼikupka máteru seiuni, ini jingonksï tanimuesptia, kurhachakuspka terseru kerubinini uandani: “¡Ní!”. Ka exespka kabaiu turhipitini ma. Ima enga jima nirani japka jatarini tsʼeritarakua ma kámaxapti jájkirhu.
6 Jima terujkanirhu nani engaksï tʼámu kerubiniicha japka, kurhachakuspka nemani enga uandeenga: “Ma denariu* jukaparhasti ma litru* trigu ka ma denariu jukaparhasti tanimu litru sebada; asï ísku ambendurhi olibusïiri aseitini nijtu binuni”.
7 Enga Karichi sapichu pʼikupka máteru seiuni, ini jingonksï tʼámuesptia, kurhachakuspka kuartu kerubinini uandani: “¡Ní!”.
8 Ka exespka kabaiuni ma enga iámu tsïpambepka. Ima enga jima nirani japka jatarini arhinhasïreendi Uarhikua, ka Tumba* jimajku chúxapaxapti. Ka intsïnhasptiksï juramukua kuarta parti echerirhu paraksï uándikpini espada iósti ma jingoni, kʼarhingua jingoni, kʼéri pʼamenchakua ma jingoni ka echerirhu anapu animaliicha jingoni engaksï no sési jámajka.
9 Enga Karichi sapichu pʼikupka máteru seiuni, ini jingonksï sinkoesptia, exespka eska altarirhu kétsekua iurhiri* jarhaspka ka imeecheeriispti engaksï uándikunhapka jimbokaksï no jurajkuspka Tata Diosïiri uandakuani ka jimbokaksï uandantani jámasïreenga.
10 Iichaksï ísï uinhachasïreendi: “Juchaari Tata, tʼuri jindeeska Sánderu Kʼéri Juramuti, pímbinhasïiskari ka tʼujkuresï sési jimboeka, ¿nári jatini jamberi pʼíngukuarhia parari jusgariuani imeechani engaksï echerirhu irekani jaka ka parari kastigariuani imeechani engajtsïni iurhiri tsïtachika?”.
11 Iámindu indeechaksï takusï urapiti ma intsïnhaspti. Ístuksï arhinhaspti eskaksï mintsikuarhipiringa sáni, astakaksï na iámu andangupiringia erachi* jémbeecha engaksï májkueni jántspiriika eska imeecha ka engaksï sáno uándikunhaka ísï eskaksï imeecha na uándikunhaka.
12 Exespka enga Karichi sapichu pʼikupka máteru seiuni para seisi úni jámania. Kʼéri ma jenchespti, jurhiata ísï niraspti turhipini komueska takusï chanchanhasï enga pʼunguari jingoni* úkata jaka, lunajtu iámu charhapintaspti komueska iurhiri,
13 jóskuechaksï auandarhu uératini uekorhespti ka echerirhuksï andatseeraspti, ísïksï nirasti uekorheni komueska jígusï tsuri* na uauarhujka anhatapurhu enga kʼéri ma tarhiajka.
14 Auanda ísï kéndikuspti komueska na nirajka irhikuarhini karakata* ma, ka iámindu juáteecha ka iámindu isleechaksï kénditanhaspti jima engaksï japka.
15 Jimajkani echerirhu anapu juramutiicha, kʼérati juramutiicha, ima achamasïicha engaksï sondaduechani orhejtsïkuajka, imeecha engaksï jatsikuarheriika, imeecha engaksï juramukua jatsika, iámindu imeecha engaksï jántspiriika ka ístu iámindu ima kʼuiripuecha engaksï no jántspiriika, jirikuarhisptiksï kuebeecharhisï ka kʼerendeecharhisï engaksï juáteecharhisï jaka.
16 Ka méntkuksï úndaspti arhiani juáteechani ka kʼerendeechani: “Ójchakurajtsïni je ka kuájchakujtsïni je parajtsïni no exentani ima enga kʼéri uaxantskuarhu* uaxakatini jaka ka nijtu Karichi sapichu enga xáni ikiani jaka,
17 jimboka niáraskia inde kʼéri jurhiatikua engaksï imeecha xarhataaka na engaksï xáni ikiani jaka, ¿ka né uaa tekaantani indeni jurhiatikua?”.
Notecha
^ Griegu jimbo: “¡Ju!”.
^ Denariu ma, jindeespti moneda ma plateeri Roma anapu. Xánksï maiamusïreendi kʼuiripuni ma enga ma jurhiatikua ánchikuarhienga.
^ O “ma kénise”.
^ O “Adesi”. Indenisï arhikuekani jati jima engaksï uarhiriicha mintsikuarhini jaka, joperu inde lugari no nani jarhasti. Exe je Glosario, tumba.
^ O “almeechaksï”. Peeka ixú iurhirini arhikuekani jaka enga altarirhu tsïtanhaka ka enga tsípikuani arhikuekajka. Exe je Glosario, alma.
^ O “ermanu”.
^ Jamberi chibueri pʼunguari jingoni.
^ O “xúxunhasï”.
^ O “roiu”.
^ O “tronurhu”.
