Apokalipsisi 7:1-17
7 Ísï tátsekua, exeaspka tʼámu ánjeliichani engaksï anhandetini japka tʼápuru ladu echerirhu. Pʼínguxaptiksï tarhiatani enga tʼápuru uératini jurhajka echerirhu paraka no tarhiapiringa echerirhu, nijtu marirhisï ka nijtu anhatapuecharhisï.
2 Ístuni exespka máteru ánjelini enga jima uératini karhamani japka nani enga jurhiata andarajka,* ima, Tata Diosïiri seiu ma páxapti, ima Tata Diosïiri enga tsípiti jaka. Ka uinhachakuaspti imani tʼámu ánjeliichani engaksï sésikua intsïnhapka paraksï no sési úkuni echerini ka marini.
3 Arhiaspti: “¡Asï ambe ma úku je echerini, ka nijtu marini ka nijtu anhatapuechani astakachi na seiu jatsikuauakia tsʼérukuarhu juchaari Tata Diosïiri jántspiriichani!”.
4 Ka kurhaaspka na engaksï xáni uánikuepka ima engaksï seiu jatsikunhapka: 144 miliisptiksï engaksï seiu jatsikunhapka, iámindu kʼumanchikuarhu* anapuesptiksï engaksï xáni Israeli uájpeepka.
5 Judáeri kʼumanchikuarhu anapuecha, 12 miliisptiksï engaksï seiu jatsikunhapka;Rubéniiri kʼumanchikuarhu anapuecha 12 mili;Gadiiri kʼumanchikuarhu anapuecha 12 mili;
6 Aseriiri kʼumanchikuarhu anapuecha 12 mili;Neftalíiri kʼumanchikuarhu anapuecha 12 mili;Manasésiiri kʼumanchikuarhu anapuecha 12 mili;
7 Simeóniiri kʼumanchikuarhu anapuecha 12 mili;Lebíiri kʼumanchikuarhu anapuecha 12 mili;Isakariiri kʼumanchikuarhu anapuecha 12 mili;
8 Sabulóniiri kʼumanchikuarhu anapuecha 12 mili;Joséeri kʼumanchikuarhu anapuecha 12 mili;Benjamíniiri kʼumanchikuarhu anapuecha, 12 miliisptiksï engaksï seiu jatsikunhapka.
9 Ísï tátsekua, exeaspka uánikua kʼuiripuechani enga no nema ueenga miiuani.* Inde kʼuiripuechaksï iámindu kʼérati ireteecharhu anapuespti, iámindu kʼumanchikuecharhu* anapuecha, ireteecharhu ka táchani jásï idiomaksï uandasïreendi; imaksï kʼéri uaxantskuarhu* orhepani anhandetixapti ka Karichi sapichueri orhepatini. Takusï urapiti ióstiksï ma jukarixapti ka pímuechanksï kaaxapti jájkirhu.
10 Ka uinhachaparinksï uandasïreendi: “¡Juchachi pʼímutantskata uéraska juchaari Tata Diosïni jimbo, ima enga kʼéri uaxantskuarhu* uaxakatini jaka ka ístu Karichi sapichuni jimbo!”.
11 Iámindu ánjeliichaksï anhandetixapti ka uirhipandatixaptiksï kʼéri uaxantskuani,* orhejtsïkutiichani ka ístu tʼámu kerubiniichani; ka kʼéri uaxantskuarhuksï orhepatini tinguixurhispti ka kómarhisptiksï Tata Diosïni.
12 Uandasptiksï: “¡Eska ísï úkuarhiaka! Eska juchaari Tata Diosï kʼéri ambe arhinhaaka, eska kʼéri ambe exenhaaka, eska diosmaiamukua arhinhaaka ka eska kánikua janhanharhinhaaka para méntkisï; ima iámindu ambe sési jánhaskasïndi, jatsisti juramukua ka uinhapikua. Eska ísï úkuarhiaka”.
13 Jimajkani, orhejtsïkutirini ma kurhamarhispti: “¿Neeskiksï inde engaksï takusï urapiti iósti jukarini jaka? ¿Ka naniksï uéraski?”.
14 Ísï jimbo, jirejiresï arhispka: “Juchiiti tata, tʼurisï míteka”. Jimajkani, imarini arhispti: “Indeksï imeesti engaksï sési uérakuka jiáni engaksï xáni no sési nitamakuarhika; juparhiantastiksïa indeecheeri takusï ióstichani ka uraperantaastiksïa Karichi sapichueri iurhiri jingoni.
15 Jimboksïsï Tata Diosïiri kʼéri uaxantskuarhu* orhepatini jati ka chúrikua ka jurhiakuaksï marhuakuni jarhasïndi imeeri templurhu. Ka ima enga kʼéri uaxantskuarhu uaxakatini jaka, kʼumanchikua sapichu ma úkuauati para kuájchakuani.
16 Nóteruksï méni kʼarhimaatia ka niteruksï méni kʼarhichaia; ístu jurhiata no ma ambe úkuauati na uéjki kánikua aparhikuarhini jarhani.
17 Jimboka Karichi sapichu enga kʼéri uaxantskuarhu* terujkani jaka, ísï eranguauati komueska karichiichani ka jimeesïsï páuati nani enga uérani jaka itsï tsípikueri. Ka Tata Diosï kutsunharhikuauati iámindu uekua”.
Notecha
^ O “esteeisï”, “orienteeisï”.
^ O “triburhu”.
^ O “kuenta uaani”.
^ O “tribuecharhu”.
^ O “tronurhu”.
^ O “tronurhu”.
^ O “tronuni”.
^ O “tronurhu”.
^ O “tronurhu”.
