Apokalipsisi 8:1-13
8 Enga Karichi sapichu pʼikupka máteru seiuni, ini jingonksï sieteesptia, media ora ma méntku iámu pínandintaspti auandarhu.
2 Ka exeaspka imani siete ánjeliichani engaksï Tata Diosïni japarini anhandetini jaka ka iichaksï siete trompeteechani intsïnhaaspti.
3 Ka jima niáraspti máteru ánjeli turhiri jatakua ma jingoni enga orueripka para kʼuájtsïtakua* kurhirani ka altarirhu máekandu pakaraspti anhandetini. Ka kánikua kʼuájtsïtakua intsïnhaspti para pímbinharhatiicheeri kómarhikuecha jingoni kéjtsïtani, imani altarirhu enga orueripka ka enga kʼéri uaxantskuarhu* orhepatini japka.
4 Ka kʼuájtsïtakueri sïraata enga ánjeli kurhirani japka, ueenaspti karhancheni pímbinharhatiicheeri kómarhikuecha jingoni paraksï Tata Diosïni andarhierani.
5 Joperu ánjeli jirejiresï pʼíkuspti turhiri jatakuani ka turhiri* uiniraspti enga altarirhu japka ka tátsekua echerirhu kʼuanijpaspti. Ka ueenaspti charanchini, uandakua ambe kurhaakuarhini, piritani ka ístu uinhamu jenchespti.
6 Ka siete ánjelicha engaksï siete trompeteechani kaani japka, ueenasptiksï prepararikuarhini paraksï kústaani.
7 Ka orheta ánjeli kústaspti trompetani. Ka xanuata xarharaspti ka chpiri enga iurhiri jingoni jeuetakata japka, ka echerirhu kʼuanijpanhaspti i ambe. Ka tersera parti echeri kurhispti; ka tersera parti anhatapuechaksï kurhispti ka ístu uitsakua xúxunhasï iámu kurhispti.
8 Ka máteru ánjeli kústaspti trompetani, ini jingonksï tsimaniisptia. Jimajkani, ambe ma enga ísï xarhareenga komueska juáta ma enga kurhini japka, marirhu kʼuanimanhaspti. Ka tersera parti mari iurhiri úkuarhintaspti;
9 uarhisptiksï tersera parti marirhu anapu animaliicha, ka tersera parti barkuechaksï iámu xerenhantaspti.
10 Máteru ánjeli kústaspti trompetani, ini jingonksï tanimuesptia. Jimajkani, kʼéri jóskua ma uekorhespti auandarhu uératini enga ísï kurhini japka komueska chpiri.* Tersera parti iurhekuecharhu andameeraspti ka jima enga itsï uérajka.
11 Inde jóskua arhinhasïndi Kʼameri.* Ka tersera parti itsï iámu kʼamespti. Uáni kʼuiripu uarhispti indeni itsï jimbo, jimboka itsï iámu kʼamespka.
12 Máteru ánjeli kústaspti trompetani, ini jingonksï tʼámuesptia. Jimajkani, pátakuarhispti tersera parti jurhiata, tersera parti luna ka tersera parti jóskuechaksï. Jiájkanksï iicha tersera parti nóteru tʼíntskapirindia, ka tersera parti jurhiakua iámu pápkʼandepirindi ka chúrikuajtu májkueni.
13 Eraaspka ka águilani ma kurhachakuspka enga auandarhisï kárani japka ka enga uinhachaparini uandeenga: “¡Imeecha engaksï echerirhu irekani jaka kʼérati uandanhiatechanksï jatsiauati, jimbokaksï máteru tanimu ánjeliicha listu jarhaskia paraksï kústaani imeecheeri trompeteechani!”.
Notecha
^ O “insiensu”.
^ O “tronurhu”.
^ Griegu jimbo: “chpiri”.
^ O “komueska lámpara ma”.
^ Griegu jimbo: “Ajenju”.
