Apokalipsisi 9:1-21
9 Máteru ánjeli kústaspti imeeri trompetani, ini jingonksï sinkoesptia. Jimajkani exespka eska auandarhu uératini, jóskua ma uekorhespka echerirhu ka intsïnhaspti iabeni posurhu anapu enga xáni jauanhika.*
2 Jóskua* mítaspti posuni jima enga xáni jauanhika, ka posurhu uératini sïraata uéraspti, ísï eska kʼéri jornarhu ma na nirajka uérani sïraata. Jurhiata ka tarhiata turhipesptiksï indeni sïraata jimbo enga posurhu uéreenga.
3 Sïraatarhu uératinksï chochuecha* uéraspti paraksï echerirhu nirani ka intsïnhasptiksï juramukua, indeni juramukua engaksï echerirhu anapu alakraniicha jatsika.
4 Arhinhasptiksï eskaksï no ma ambe úkupiringa echerirhu anapu uitsakuani ka nijtu xúxunhasï planteechani ka nijtu anhatapuechani, sino imani kʼuiripuechantku engaksï no jukaka tsʼérukuarhu Tata Diosïiri seiuni.
5 Chochuechaksï no intsïnhaspti sésikua paraksï kʼuiripuechani uándikuani, joperuksï sésikua intsïnhaspti paraksï sinko kutsï no sési úkuani. Xánksï no sési pʼikuastaasïreendi eska alakrani ma na no sési pʼikuastajka kʼuiripuni ma enga atajka.
6 Imani jurhiatikuechani jimbo, kʼuiripuechaksï uarhikuani jámaati jirinhani, joperuksï méntku no nani exentaati; uarhinchanksï jauati, joperu uarhikua sïpakuarhikuauati.
7 Chochuechaksï xáxespti eska kabaiuecha engaksï listu jarhajkia para uarhipeni nirani. Koroneeni járhatiichanksï jukajtsïaspti orueri, ka xánharhisptiksï eska kʼuiripuecha.
8 Xásï jauiriksï jukaspti eska uarhiiti ma ka xárhati sïniichanksï jukaaspti eska leoni ma;
9 ka iáminduechaksï inchanhikua ma jukarixapti enga xáxepka eska tiámueri inchanhikua ma, engaksï iámu kʼénhikuani kuájchakujka. Ka imeecheeri kʼésïichaksï* ísï kurhaakuarhisïreendi eska karreteecha engaksï kabaiuecha antsitaajka jiáni engaksï uarhiperakuarhu nirani jarhajka.
10 Ístu, tʼenarpetarakuechanksï jukaasti chʼétiicharhu ísï eska alakraniicha; ka imeecheeri chʼétiicharhuksï kámaxati juramukuani paraksï sinko kutsï no sési úkuani kʼuiripuechani.
11 Juramutinksï ma jatsisti: ima ánjeli enga juramukua jatsika jima enga xáni jauanhika. Ebreu jimbo, Abadóni* arhinhasïndi ka griegu jimbo Apolióni.*
12 Ka nitamastia orheta kʼéri uandanhiata. ¡Jingontku ja je! Jimboka enga na i ambe nitamaakia, juuatiksï máteru tsimani.
13 Máteru ánjeli kústaspti imeeri trompetani, ini jingonksï seisiisptia. Jimajkani kurhachakuspka nemani enga uandeenga sïuanguecharhu uératini enga altari jukaaka, inde altari enga orueriika ka enga Tata Diosïiri orhepatini jimbo jaka.
14 Arhispti ini ánjelini* enga trompetani kámani japka: “Kuerataa imani tʼámu ánjeliichani engaksï jótakuarhetini jaka kʼéri iurhekuarhu Éufratesi uanamukuteni”.
15 Ka ima tʼámu ánjeliicha engaksï tʼuini listu jatsinhapkia para inde jandora, inde jurhiatikua, inde kutsï ka inde uéxurhini, kueratanhasptiksï paraksï tersera parti kʼuiripuechani uándikuani.
16 Sondaduecha engaksï kabaiu jatarini nirani japka, 200 miioniisptiksï;* ji kurhaaspka eskaksï xániispka.
17 Inde kabaiuecha ka kabaiu jatariicha engani exeapka jánhaskakua ma jimbo, xáxesptiksï: inchanhikuechanksï jukaaspti kʼénhikuarhu paraksï kuájchakukuarhini, inde inchanhikuechaksï charhapispti komueska chpiri, asuliisptiksï komueska jasintu ka tsïpambisptiksï komueska asufri; kabaiuecheeri éjpuechaksï xáxespti eska leoniiri éjpu, ka chpiriksï uéchasïreendi, sïraata ka asufri.
18 Tersera parti kʼuiripuechaksï uarhispti ini tanimu kastiguecha jimbo: chpiri, sïraata ka asufri jimbo engaksï kabaiuecha uécheenga.
19 Jimbokaksï kabaiuecha imeecheeri penchumikuarhu ka chʼétiicharhuksï kámaxati juramukua, jimbokaksï chʼétiicha xáxeska komueska akuitsi ma ka éjpuksï jukasti, ka chʼéti jingonksï no sési útspisïndi.
20 Joperu máteru kʼuiripuecha engaksï no uarhika ini kastiguecha jimbo, nóksï móantasti engaksï xáni no sési niátaka. Nóksï jurajkusti demoniuechani kómarhiani ka nijtu diosï úkatechani engaksï orueriika, plateeri, kobriiri, tsakapueri ka chkariiri, ka engaksï no újka exeni, nijtu kurhandini ka nijtu xanharani.
21 Nóksï móantasti engaksï ísï uándikpijka, engaksï sïkuamikua ambe kámajka, engaksï ísku jándikua ambe niátajka* ka engaksï sïpani jámajka.
Notecha
^ Exe je Glosario, abismu.
^ O “Ima”.
^ O “langosteecha”. Animali sapichu ma enga iámindu ambe kʼamajkujka ka enga xáxeka eska chochu.
^ O “aleechaksï”.
^ Enga arhikuekajka ‘kʼamajperata’.
^ Enga arhikuekajka ‘enga kʼamajpijka’.
^ Ixú sekstu ánjelini arhikuekaxati.
^ O “tsimani miriada miriadeecheeri”, “xániisptiksï 20 mili xanhari 10 mili”.
^ Griegu jimbo pornéia. Exe je Glosario, ísku jándikua ambe.
