Ebreu 1:1-14
1 Ióntki, Tata Diosï uandajpaasïreendi juchaari ióntki anapu parientiichani ka úraasïreendi imeeri uandakua páriichani,* someni uandajpaasïreendi ka mámaru uandajpaasïreendi.
2 Ka ini jurhiatikuecha jimbo,* iásï imeeri Uájpani úrasïndia parajtsïni uandajpani, imani enga erakuka para iámindu ambe pʼirani komueska erensia, ka imani jimbosï niárati iámindu ambe kueraani echerirhu ka auandarhu.*
3 Ima xarhatasïndi na enga xáni kʼéri ambeeka Tata Diosï ka sésimindu xarhatasïndi na enga jásïika Tata Diosï, ka iámindu ambe pʼínguxati imeeri uíuinhasï uandakua jingoni. Ka ísï tátsekua engajtsïni na pímbinhajkuntapkia juchaari pekaduecheeri, Tata Diosïiri jurhijkandani jimbo uaxakasti jini auandarhu.
4 Ísï jimbo, ima iásï sánderu kʼéri ambeestia eskaksï ánjeliicha, jimboka iásï ima sánderu ambakiti nombri ma intsïnhaskia eskaksï ánjeliicha.
5 ¿Jimboka Tata Diosï náki ánjelini arhiski: “Tʼuri jindeeska juchiiti sapi* ka iásï uératini ji jindeeskia chiiti taati”? ¿O: “Ji indeeri taatiuaka ka inde juchiiti sapiuati”?
6 Ka enga ménderu axaaka imeeri Orheta Uájpani ixú echerirhu nani engaksï kʼuiripuecha irekaka, uandaati: “Eskaksï iámindu Tata Diosïiri ánjeliicha kʼéri ambe arhiaka”.*
7 Ístu, ísï uandasïndi ánjeliicheeri ambe: “Ima úsïndi eskaksï imeeri ánjeliicha uíuinhasï espiritueuaka, ka eskaksï imeecha engaksï imani marhuakujka ísïiuaka komueska chpiri ambe”.
8 Joperu Uájpeeri ambe, ísï uandasïndi: “Tata Diosïkenisï íntskujti juramukua* parari tʼu méntkisï juramuni ka chiiti Reinu jimbo tʼuri méntkisï sési juramuaka.
9 Tʼuri kánikua tsitiska* sési ambe úni ka ikichaskari no sési ambe niátani. Jimbokenisï Tata Diosï, chiiti Tata Diosï, tʼungini erakuti ka aseitikini atajtsïkusti ka ústi eskari tʼu sánderu tsípipiringa ka eska máteru juramutiicha”.
10 Ístu uandasïndi: “Oh, juchiiti Tata, ueenakuarhu tʼuri uaxastaaska pítsekuechani echerirhu ka chiiti jájkiicha jingondi úska auandani.
11 Auanda ka echeri nóteruksï jauatia, joperuri tʼu útasï irekani jauaka; auanda ka echeri ísï jiánguarhiati komueska takusï ma
12 ka tʼuri ísï irhiauaka komueska takusï ma ka ísïri uaaka enajkiri mórhetaua ka ménderuenksï jáxentaati. Joperuri tʼu no méni mójtakurhiaka ka nóri méni uarhiaka”.
13 Joperu, ¿náki ánjeliiri ísï uandaspi: “Uaxaka juchiiti jurhijkandani jimbo asta jiáni engakeni chiiti jantsiricharhu peerachiauaka imeechani engaksïni ikiachejka parakari jatanduauaka”?
14 Iámindu ánjeliichaksï espirituesti ka jántspinksï jámasïndi ka Tata Diosï axaasïndi paraksï nirani jarhuataani imeechani engaksï pʼímutanhantaaka.
Notecha
^ O “imeeri profeteechani”.
^ Griegu jimbo: “Ka engaksï na kʼamakurhini jauakia i jurhiatikuecha”.
^ O “ka imani jimboksïsï jati tiempuecha”. Exe je Glosario, tiempu.
^ O “uátsïti”.
^ O “tinguixurhikuaka”.
^ Griegu jimbo: “Tata Diosï jindeesti chiiti tronu”.
^ O “xénchaska”.
