Ebreu 12:1-29
-
Jesúsijtsïni jarhuatasïndi parachi jucha méntku sési sési mintsikani (1 a 3)
-
“Uánikua kʼuiripuecha engaksï uandantajka ambe engaksï exekia ka kurhandini” (1)
-
-
No jámani ísku kurhandini engajtsïni Tata Diosï Jeoba xukaaka (4 a 11)
-
“Seguirii je imani xanharuecha jimbo jámani engaksï jurhimbiti nirajka” (12 a 17)
-
Andarhierani auandarhu anapu Jerusalénini (18 a 29)
12 Jiájkani, jimbokajtsïni uirhipandatixaka uánikua kʼuiripuecha engaksï uandantajka ambe engaksï exekia ka kurhandini, ju je jurajkuni iámindu indeni ambe engajtsïni kuatajkujka ka pekaduni engajtsïni sóntku jupikajka,* ka ju je no kuatantani parachi seguiriini jarhani uiriini indeni karrerarhu engachi jimbo nirani jaka,
2 ka ístu, ju je méntku exeni jarhani Jesúsini enga jindeeka Sánderu Kʼéri Orhejtsïkuti ka engajtsïni jarhuatajka parachi jucha méntku sési sési mintsikani. Ka jimboka mítespka eska sánderu orhepatini kánikua tsípipiringa, ima tekaantaspti enga ísï cháparhatanhapka chkarirhu ma para no sési nitamakuarhini* nájkiruka kánikua kʼuratsetanhapka ka iásï uaxakastia Tata Diosïiri kʼéri uaxantskuarhu* jurhijkandani jimbo.
3 Ka parakajtsï chá no kuataraaka ka nijtujtsï kuatantani,* méntku miántani ja je imani, jimboka ima tekaantaska nájkirukaksï kʼuiripuecha xáni no sési arhipka, ka engaksï ísï úka, inde kʼuiripuechaksï jandiajku jirinhakuarhisti paraksï kastigarinhani.
4 Ka nájkirukajtsï chá no jurajkutakuarheni jaka paraksïni pekadu andani, chájtsï útasï no niáraxaka chaari iurhirini jamberi tsïtani xáni tekaantani.
5 Ka chájtsï méntku mirikurhiskia engajtsï ísï arhistaminhapka enajkijtsï chá uájpeepirini, engajtsï arhinhapka: “Iju, asï jáma ísku kurhandini engakeni Tata Diosï Jeoba xukaaka* ka asï chkétakuarhi engakeni arhiaka eskari no sési úxaka,
6 jimboka Tata Diosï Jeoba imanisï xukajti* enga xénchajka, ka ístu imanisï kastigarijti* enga ísï jiókajka komueska imeeri uájpa”.
7 Ka engaksïni xukaaka,* chájtsï jatsiska para tekaantani. Tata Diosïksïni ísï kámasïndi komu enajkijtsï chá imeeri uájpeepirini. Jimboka no ma sapi jarhaska enga imeeri taati jémba no xukajka, ¿a no?
8 Joperu engaksïni Tata Diosï no xukaaka* ísï eska máteruechani na xukaaka, jiájkani chájtsï no imeeri uájpeeska, sino máteru nemeeri.
9 Jimbokajtsïni juchaari taatiicha xukasïreenga* ka juchachi janhanharhiasïreenga, jiájkani, ¿nóchi jatsipirini para sánderumindu kurhajchani juchaari Taatini engajtsïni imeeri espiritu santu jingoni orhechepajka juchaari irekuarhu?
10 Jimbokajtsïni juchaari taatiicha no ióni xukaska* ka ísïjtsïni xukasïreendi eskaksï ima na sési exeenga, joperujtsïni Tata Diosï juchaari sési jimbosï xukajti parakachi pímbinhasïuaka ísï eska ima.
11 Joperu ísïisti, juchachi no tsípisïnga engachi xukanhajka,* sánderu sési, no sésichi pʼikuarherasïnga.* Joperu engachi jurajkutakuarhejka parachi xukanhani, kánikuajtsïni jarhuatasïndi jimbokachi niárasïnga sési jámani ka sésichi pʼikuarherasïnga.*
12 Jiájkani, uinhaperantaa je chaari jájkiichani ka chaari jurhintskuechani engaksï chkérini jaka
13 ka seguirii je imani xanharuecha jimbo jámani engaksï jurhimbiti nirajka, paraka ambe enga rengejtajka no pitsirhutaaka únini, sánderu sési, paraka sési niántaaka.
14 Jánguarhinta je sési pájperani iáminduecha jingoni ka jánguarhinta je pímbinhasï jarhani, jimboka ima enga no pímbinhasï jauaka, no uaati exeni Tatani.
15 Ka jingontku jáma je paraksïni Tata Diosï kánikua kóndentani iámindu chánksïni, paraka no andaraaka sïrangua ma enga kánikua no sési útspijka,* jimboka inde ambe uaaka eskajtsï uandanhiata ambe jatsiaka ka ikichakueni jásï ambe uaauati uánikuechani,
16 ka xéparini jáma je paraka no nema jauaka enga ísku jándikua ambe niátaaka* o nema enga ísku exeaka Tata Diosïiri ambe, ísï eska na úpka Esaú enga ma tʼirekua jimbojku máteruni jurajkukupka indeni kóntperatani enga jatsipka jimboka orheta uájpeespka.
17 Jimbokajtsï chá míteska eskaksï tátsekua nóteru jaiapanhentaspkia enga ima uékani japkia eska újchakuranhapiringa. Ka ísku jatinisï xáni uekupti taati jémbani jimboka ima no mójtakuspka ambe enga uandarini japkia.
18 Jimbokajtsï chá no andarhieraska imani ambe enga ma újka pʼárhini ka enga tixarani* jaka, ka nijtu nubeni ma enga iámu ónhastajka ka nijtu kʼéri janikuani ma,
19 nijtu trompetani ma enga kúskajka ka nijtu uandakuani ma. Engaksï iretarhu anapuecha kurhaaka indeni uandakuani, méntkuksï úndaspti arhini Moisésini eska nóteru ambe ma kurhaakuarhipiringia.
20 Jimbokaksï kánikua chéspka engaksï ísï juramuminhapka: “Enga animali ma niáraska ini juáta jimbo jámani, jatsiskajtsï para tsakapu jimbo atani”.
21 Ka xáni no sési jánhaskuarhispti enga jamberi Moisési uandapka: “Méntkuni ísï manaraxaka* xáni chéni”.
22 Joperujtsï chá Sioni juátanisï andarhieraka ka iretani ma enga Tata Diosïiriika, imeeri enga tsípiti jaka, inde ireta jindeesti auandarhu anapu Jerusaléni, ka ístujtsï andarhieraaska uáni joperu uánikua ánjeliichani
23 engaksï jima jaka nani engaksï iáminduecha tánguarhintatini jaka ka imani kúnguarhikuani nani engaksï Tata Diosïiri orheta uájpeecha jaka ka engaksï imeecheeri nombriicha karakata jakaia auandarhu, ka Tata Diosïni enga iáminduechani jusgariuajka, ka imeechani engaksï sési jámajka ka engaksï ísï irekajka eska espiritu santu na uéjka ka engaksï iásï kʼóru iámindu ambe sési újkia,
24 ka Jesúsini enga jarhuajpejka jimbanhi pakatperakua jingoni ka imani iurhirini enga tskarhetanhaka* ka enga sánderu ambakeka eska Abeliiri iurhiri.
25 Xéparini jáma je parajtsï no jámani no kurhajchani* imani enga auandarhu uératini uandajka. Ióntki, parhakpini anapuechaksï no uékaspti kurhandini ambe enga Tata Diosï uandanteenga ka niárasptiksï kastigarinhani. Ísï jimbo, ¡na xáni sánderuminduchi kastigarinhaa jucha engachi no kurhajchaaka imani enga auandarhu uératini uandajka!
26 Ka jiáni enga uandapka, jencheraspti* echerini, joperu iásï ima aiatspesti: “Ménderuni jencheraaka, joperu no echerintku, auandani jamberi jencheraaka”.
27 Ka enga uandajka “ménderu”, arhikuekasïndi eska Tata Diosï kénditaaka iámindu indeni ambe enga manatanhajka,* enga jindeeka inde ambe enga no Tata Diosï úka, paraka inde ambejku pakaraaka enga no manatanhajka.
28 Jiájkani, jimbokachi jucha pʼiuaka Reinu ma enga no újka manatanhani,* ju je seguiriini jarhani jánguarhintani parajtsïni Tata Diosï kánikua kóndentani, jimbokajtsïni indesï jarhuataaka parachi jucha ísï marhuakuni Tata Diosïni eska ima na uéjka, chénharhiparini Tata Diosïni ka kánikua janhanharhiparini.
29 Jimboka juchaari Tata Diosï ísïiska komueska chpiri enga méntku iámu ambe kʼamajkujka.
Notecha
^ O “engajtsïni sóntku matokujka”.
^ Exe je Glosario, chkari enga jindeeka para no sési nitamakuarhini.
^ O “tronurhu”.
^ O “nijtuksï iámu chkéni chaari almeecha”.
^ O “arhistachiaka”.
^ O “arhistakujti”.
^ O “atajti”.
^ O “arhistachiaka”.
^ O “arhistachiaka”.
^ O “arhistachisïreenga”.
^ O “arhistachiska”.
^ O “arhistaminhajka”.
^ Griegu jimbo: “ka pínandikuachi jatsisïnga”.
^ O “pʼamerasïngachi”.
^ O “enga ísïika komueska uarhirakua”.
^ Exe je Glosario, ísku jándikua ambe.
^ O “érhuni”.
^ O “tsirintsirirhikuarhixaka”.
^ O “tskárhetanhapka”.
^ O “no jámani ísku exeni”, “no jámani no uékani kurhandini”.
^ O “manataspti”.
^ O “enga jencheranhajka”.
^ O “jencheranhani”.
