Ebreu 13:1-25
13 Seguirii je ísï xénchperani enajkijtsï iáminduecha ermanutiipirini.
2 Asï mirikurhi je méntkisï sési kámpini, jimbokaksï no míteparini, máru kʼuiripuechaksï ánjeliichani jamberi sési erokaaspti, jimbokaksï sési kámpisïreenga.
3 Asï mirikurhia je imeechani engaksï ónhakata jaka,* enajkijtsï ambe chájtu imeecha jingoni ónhakata jaki, ka ístu, asï mirikurhia je imeechani engaksï no sési kánhani jaka, enajkijtsï ambe chájtu imeecha jingoni no sési nitamakuarhini jaki.
4 Ka iáminduechaksï jatsisti para janhanharhini temungurhiriikuani. Ka no nema jatsisti para ikichakua ambe úni temungurhiriikuani, jimboka Tata Diosï jusgariuauaka imeechani engaksï ísku jándikua ambe niátajka* ka ístu imeechani engaksï tembuchatiikia o uambuchatiini ka ísku jándikua ambeksï niátani.
5 Asï jáma je jukari sentabu tsitini, sánderu sési, tsípi je xáni ambe jingontku engajtsï jatsikuarheka. Jimboka ima uandaska: “Jíkeni no méni jurajkuaka ka méntkisï tʼungini jingoni jauaka”.
6 Jiájkani, ju je no sáni chéparini uandani: “Tata Diosï Jeobareni jarhuatasïndi. Méntkuni no sáni chéaka. ¿Ambejturini uaa úchini kʼuiripu?”.
7 Asï mirikurhia je imeechani engaksïni orhechepajka ka engaksïni Tata Diosïiri uandakueri ambe aianguka, ka májkueni mintsika je eskaksï imeecha exeparini na enga sési nikuajka engaksï ísï sési jámajka.
8 Tata Jesukristu no mójtakurhisïndi, seguiriixati májkueniini eska uitsindekua, iásï ka para méntkisï.
9 Asï jurajkutakuarhi je eskaksïni támisï jánhastaaka indeni jimbo engaksï kʼuiripuecha mámaru ambe jorhentpijka ka imani ambe jingoni engachi jamberi no méni kurhandini japka, jimboka sánderu sésiiska eskaksïni Tata Diosï kánikua kóndentaaka para chá uinhapikuarhintani ka no tʼirekua jimbojku jámani,* jimboka no marhuakuasïnga tʼirekua imeechani engaksï tʼirekua ambejku eratseni jarhajka.
10 Juchachi altari ma jatsiska ka imeecha engaksï tabernakulurhu* marhuakujka Tata Diosïni, nóksï sésikua jatsisti para* arhani ambe enga jima kéjtsïtanhajka;
11 animaliicheeri kuerpu enga kéjtsïtanheenga, uéramanisï kurhiranhasïreendi; joperu iurhirini kʼóru, sánderu kʼéri saserdoti pímbinhasï kuarturhu pásïreendi para pekaduni jimbo kéjtsïtani.
12 Jimbosï Jesúsijtu no sési nitamakuarhipti iretarhu uéramanisï, para imeeri iurhiri jingoni pímbinhajkuntani iretani.
13 Ísï jimbo, ju je iretarhu uéramanisï parachi imani andarhierani ka májkuenchi kʼuratsetanhani eska ima.
14 Jimbokachi ixú no jatsiska iretani ma enga para méntkisï jauaka, sánderu sési, tsípikua jingonchi erokaxaka imani iretani enga sánderu orhepani jauaka.
15 Jesúsini jimbo, ju je méntkisï kéjtsïtakuni jarhani Tata Diosïni parachi kʼéri ambe arhini, ka juchaari penchumikua jingonchisï uandantajka na enga arhinhajka ima.
16 Asï mirikurhi je sési ambe úni ka intsïmbiani máteruechani ambe engajtsï jatsikuarheka, jimboka i ambe ísïiska eska kéjtsïtakuni jarhani Tata Diosïni, ka ima kánikua jaiapanhentasïndi ini ambe.
17 Kurhajchaa je ka méntkisï janhanharhia je imeechani engaksïni orhechepajka, jimbokaksïni imeecha chánksïnisï exeni jaka* ka imeechaksïsï kuenta íntspintaati chánksïni jimbo. Paraksï imeecha tsípikua jingoni ísï úni ka nóksï kuatantani, jimbokajtsï tátsekua chásï no sési uéranchapiringa.
18 Méntkujtsïni kómarhijpicheni ja je juchantsïni, jimbokani jucha mítetixaka eskachi sési jámaxaka Tata Diosïni japarini,* jimbokachi uékasïnga méntkisï jurhimbitku jámani.
19 Joperu ambe engaksïni sánderu uékani jaka kurhacheni, jindeesti eskajtsï kómarhiaka Tata Diosïni paraksïni ji kókuani nirani exeni.
20 Tata Diosï tsítantasti Jesúsini enga jindeeka juchaari Tata, ima kámaxapti iurhirini enga újka eska pakatperakua ma ueenaka jarhani, enga jindeeka para méntkisï; ka ima jindeesti ambakiti karichi eranguti. Ísï jimbo, eska Tata Diosï enga pínandikua íntspijka,
21 íntskuakaksïni ambe engajtsï chá xáni uétarhinchajka parajtsï úni ambe enga ima uéjka, ka eska tata Jesukristuni jimbo ima uaaka juchantsïni jingoni ambe enga ima sési exeaka. Eska ima kʼéri ambe arhinhaaka para méntkisï. Eska ísï úkuarhiaka.
22 Ka iásïksïni kurhachexaka erachiicha,* eskajtsï iatsitakuarhu arhintaaka ambe engaksïni karachika paraksïni uinhaperantani, jimbokaksïni sántku ambesï arhini jaka ini karakata jimbo.
23 Ka uékasïngaksïni aianguni eska juchaari erachi Timoteu nóteru ónhakata jarhaskia. Ka enga ima no ióndaska jurhani, márkuksïni niuaka exeni.
24 Aiangua je imeechani engaksïni orhechepajka ka ístu iámindu pímbinharhatiichani eskani ji uandajperata ma axakuaxaka. Italia anapu erachiichaksïni uandajperata ma axachexati.
25 Eskaksïni Tata Diosï kánikua kóndentaaka iámindu chánksïni.
Notecha
^ Griegu jimbo: “engaksï kadena jingoni jótakata jaka”.
^ Exe je Glosario, ísku jándikua ambe.
^ Indenisï arhikuekani jati ambe enga uétarhienga úni tʼirekua ambe jingoni.
^ O “engaksï templurhu”.
^ Griegu jimbo: “nóksï úsïndi”.
^ O “jimbokaksï imeecha chaari almeechanisï kuaani jaka”.
^ O “eskachi ambakiti konsiensia ma jatsiska”. Exe je Glosario, konsiensia.
^ O “ermanuecha”.
