Ebreu 3:1-19
3 Ísï jimbo erachiicha* engajtsï pímbinhasïika, chá engajtsï ióarhinhaka* parajtsï auandarhu nirani, méntku eratsentani ja je Jesúsiiri ambe, imani engachi jucha ísï míteka* eska apostoliiska ka sánderu kʼéri saserdoti.
2 Ima méntkisï kurhajchaspti imani enga erakuka, ísï eska Moisési na méntkisï kurhajchapka jiáni enga Tata Diosïiri kʼumanchikuarhu marhuani japka.
3 Jimboka ima* jukanchaska para sánderu kʼéri ambe exenhani eska Moisési, ísï eska na sánderu kʼéri ambe exenhajka ima enga kʼumanchikuani újka ka eska kʼumanchikua.
4 Ísïisti, kʼuiripusï uaajti kʼumanchikuechani, joperu Tata Diosïsï úti iámindu ambe.
5 Ka ísïisti, Moisési méntkisï kurhajchaspti Tata Diosïni enga imeeri kʼumanchikuarhu jántspini jámeenga ka i ambe xarhatasti ambe enga Tata Diosï uandapiringa sánderu orhepatini.
6 Joperu Kristu, Tata Diosïiri uájpeesti ka méntkisï kurhajchaspti enga Tata Diosï imeeri kʼumanchikuani jurajkukupka. Juchachi Tata Diosïiri kʼumanchikueuaka engachi seguiriini jauaka no sáni chéparini uandantani ka engachi méntku no jurajkuaka mintsikani indeni ambe engachi erokuarhini jaka.
7 Ísï jimbo, ísïisti eska espiritu santu na uandajka: “Engajtsïni iásï chá kurhajchani jaka,
8 asï jáma je tátsekua ísï no kurhanguni* komueska chaari ióntki anapu parientiicha engajtsïni xáni ikiatapka desierturhu jiáni engajtsïni tsʼéjkupka,
9 jima, chaari ióntki anapu parientiichajtsïni tsʼéjkuspti ka nójtsïni uékaspti kurhajchani nájkirukaksï 40 uéxurhini exepkia ambe engani xáni úpka ji.
10 Jimbosïni ikichaapka indeni kʼuiripuechani engaksï jiánisï irekapka ka uandaspka: ‘Indeecheeri mintsita méntkisï támisï nirasïndi ka nótkijtsïni úxati míteni’.
11 Ka jimbokani xáni ikiaxapka ísï uandaspka:* ‘Imeechaksï no mintsikuarhiati ísï eskani ji na mintsikuarhini jaka’”.
12 Erachiicha, jingontku jáma je, paraka no ma repentku chaari mintsita ueenaaka no sési ambe niátani ka nóteru mintsikania jimbokajtsï jarhariska Tata Diosïni, imani Tata Diosïni enga tsípiti jaka.
13 Sánderu sési, seguirii je pauani pauani uinhaperperantani, ini tiempu jimbo engachi arhijka “iásï”, parakaksïni pekadu no choperachiaka chaari mintsitani, jimboka inde jirinhakuntasïnga nénaksïni támisï páni.
14 Jimbokachi juchajtu intsïnhaaka ambe enga Kristu intsïnhakia, joperu engachi juchajtu méntkisï mintsikaaka ísï eska ueenani jámani.
15 Ísï eska na uandapka: “Engajtsïni iásï chá kurhajchani jaka, asï jáma je tátsekua ísï no kurhanguni* komueska chaari ióntki anapu parientiicha engajtsïni xáni ikiatapka”.
16 ¿Jimboka neechaksïsï kurhachakupi ka tátsekuaksï ísï ikiatani? ¿Andi nóksï imeespi enga Moisési Ejiptu uératini petaatantaapka?
17 Ístu, ¿neechanisï ikichaapi Tata Diosï 40 uéxurhini? ¿Andi no imeechanisï ikichaapi engaksï no sési ambe niátapka, imeechani engaksï desierturhisï uarhika?
18 ¿Ka neechanisï arhiapi eskaksï no mintsikuarhipiringa ísï eska ima na mintsikuarhini jaka? ¿Andi no imeechanisï arhiapi engaksï no kurhajchapka?
19 Ísï jimbo, exeskachia eskaksï no úspka imani jingoni mintsikuarhini, jimbokaksï no kánikua mintsikasïreenga.
Notecha
^ O “ermanuecha”.
^ O “pʼímarhinhaka”.
^ O “engachi jucha uandantajka”.
^ Ixú Jesúsinisï arhikuekani jati.
^ Griegu jimbo: “asï jáma je choperani chaari mintsitani tátsekua”.
^ O “jurariispka”.
^ Griegu jimbo: “asï jáma je choperani chaari mintsitani tátsekua”.
