Ebreu 6:1-20
-
“Ju je seguiriini jarhani sánderu jánhaskani” (1 a 3)
-
Imeecha engaksï nóteru mintsikajkia, chkarirhuksï ma cháparhatasïndi ménderu Tata Diosïiri Uájpani (4 a 8)
-
Méntkisï mintsikani eska úkuarhiaka ambe engachi erokuarhini jaka (9 a 12)
-
Tata Diosï ísï uaati eska na aiatspeka (13 a 20)
-
Ambe enga Tata Diosï aiatspejka ka jurariini, no mójtakurhisïndi (17 ka 18)
-
6 Ísï jimbo, jimbokachi jorhenguarhiskia ambe enga ma orheta ueenajka jorhenguarhini Kristueri ambe, ju je seguiriini jarhani sánderu jánhaskani ka nóchi méntku úndani jarhani indeni ambejku jorhenguarhini ambe engachi ueenani jámani jorhenguarhijka, enga jindeeka móantani ka nóteru jámania ísku ambe ma úni, mintsikani Tata Diosïni,
2 ambe enga xáni jorhentpinhajka itsï atakuarhikueri* ambe, ístu indeeri ambe engaksï pʼájtsïkuajka máru achamasïichani, tsíntskueri ambe ka na enga Tata Diosï jusgarpijka para méntkisï.
3 Ka enga Tata Diosï ísï uékaska, ísïchi uaaka.
4 Jimbokaksï jarhaska máru enga Tata Diosï tʼíntskakuapka, indeechaksï intsïnhaspti auandarhu anapu intsïmperatani, intsïnhasptiksï espiritu santu
5 ka intsïnhasptiksï Tata Diosïiri uandakua enga xáni ambakiti ambeeka ka ístu imani kóntperateechani* engaksï imani parhakpinirhu* jauaka enga jurhani jaka.
6 Joperuksï indeecha nóteru mintsikasptia Tata Diosïni ka nóteruksï uaatia tsítanhantani paraksï móantani, jimbokaksï chkarirhu ma cháparhataska ménderu Tata Diosïiri Uájpani parakaksï kʼuiripuecha kʼuratsetaaka.
7 Jimboka Tata Diosï janikua jingoni újchakurasïnga echerini, jimboka enga ísï someni janijka, itsï inchatsesïndi ka tátsekuaksï planteecha andarasïndi ka imeechaksï marhuatasïndia engaksï echerini ánchitajka.
8 Joperu enga chekamikua ka aparhita* ambe andarajka, nóteru nema jaiapanhentasïndia, ísku exenhaati ka tátsekuaksï kurhiraati.
9 Joperu juchiiti erachiicha* engaksïni ji xáni xénchajka, nájkirukaksïni ísï arhini jaka, jucha sési mítetixaka eskajtsï chá kʼóru sánderu ambakiti ambe jatsiaka, indeni ambe engaksïni pʼímutantaaka.
10 Jimboka Tata Diosï méntkisï sési úsïnga iámindu ambe ka no mirikurhiati ambe engajtsï xáni újka ka nijtu na engajtsï xáni xénchajka imeeri nombrini, jimbokajtsï jarhuataaska pímbinharhatiichani ka útasïjtsï jarhuataaxaka.
11 Joperuchi jucha uékasïnga eskajtsï chá kánikua jánguarhintaaka, parakajtsï chá uaaka méntkisï mintsikani eska úkuarhiaka ambe engajtsï erokuarhini jaka,
12 parakajtsï no xépiti úkuarhiaka, sánderu sési, májkueni jáma je eska imeecha engaksï pʼirajka ambe enga Tata Diosï aiatspijka jimbokaksï mintsikaska ka tekaantani.
13 Jimboka enga Tata Diosï ísï aiakupka Abraánini, imeeri nombri jimbosï jurariikupti ka no úpirindi máteru nemani jimbo jurariikuni, jimboka no nema jarhaska enga sánderu kʼéri ambeeka eska ima.
14 Arhispti: “Jíkeni sési jimbo újchakuraaka ka sési jimbo uaaka eskari uánikua sapiichani káuaka”.
15 Ka jimboka Abraáni xáni ióni tekaantaspka, jimbosï Tata Diosï ísï aiakupti.
16 Jimbokaksï kʼuiripuecha imani jimbosï jurariijka enga sánderu kʼéri ambeeka eska imeecha ka jurariisïndiksï paraksï no jámani arhirperani ka ísï jimboksïsï mintsikajti eskaksï ísï uaaka eskaksï na uandaka.
17 Tata Diosï uékaspti sánderu sési xarhatakuani imeechani engaksï pʼiuaka ambe enga ima aiatspeka eska no mójtakurhisïnga ambe enga ima uéjka úni,* ísï jimbosï imajtu májkueni úpti, jurariispti parakaksï mintsikapiringa eska ima ísï úpiringa eska na uandani japka.
18 Ka ima ísï aiatspesti ka ísï jurariisti parakachi juchajtu, engachi imani andarhierajka parachi kuájchakukuarhini, uaaka méntkisï mintsikani eska úkuarhiaka ambe engachi erokuarhini jaka jimbokachi uinhaperanhantaska; ima no chkuanderasïndi jimboka no méni mójtakurhiaka ambe enga ima jurariika ka ambe enga aiatspipka.
19 I ambe engachi erokuarhini jaka, jarhuatasïndijtsïni parachi jucha* sési anhaxurhitini jarhani ísï eska ankla ma na xáni sési pʼíngujka barkuni ma ka inde ambe meru ísï úkuarhiati ka sési uaxastakata jauati; ka ístu inde ambe engachi erokuarhini jaka, jarhuataatijtsïni parachi inchani jima enga kortina jukaka,
20 nani enga Jesúsi inchaka parajtsïni jarhuatani, imajtsïni orhechepaxati, ima niárasti jindeeni sánderu kʼéri saserdoti para méntkisï ísï eska Melkisedeki.
Notecha
^ Exe je Glosario, itsï atakuarhini; itsï atani.
^ Griegu jimbo: “ka ístu uinhapikua ambe”.
^ O “imani tiempu jimbo”. Exe je Glosario, tiempu.
^ O “aparhikua”.
^ O “ermanuecha”.
^ O “ambe enga uandajka”.
^ O “para juchaari alma”, “para juchaari tsípikua”.
