Ebreu 7:1-28
7 Jimboka inde achamasï enga Melkisedeki arhinheenga, Salemi anapu juramutiispti ka saserdotiispti auandarhu anapu Tata Diosïiri; inde niraspti kúntani Abraánini enga ima junguani japkia jiáni enga na uándikuapkia máru juramutiichani; inde újchakuraspti
2 ka Abraáni arhukuspti ambe enga xáni kámani japka ka diesmu íntskuspti. Imeeri nombri arhikuekasïndi “juramuti enga iámindu ambe sési újka”, ka ístu jindeesti Salemi anapu juramuti enga arhikuekajka “juramuti enga pínandikua íntspijka”.
3 Nájkiruka no mítekuarhika neespi taati jémba, nijtu neespi amamba, nijtu néksï jindeespi imeeri ióntki anapu parientiicha, nijtu na enga jatini andajpenupka ka nijtu na enga jatini uarhika, ima niáraspti ísï únhani komueska Tata Diosïiri Uájpa, jimbosï iásï jamberi saserdotiiti para méntkisï.
4 Exe je na enga xáni kʼéri ambeepka i achamasï enga juchaari taati* Abraáni ísï íntskupka diesmu ka sánderu ambakiti ambe íntskuspti enga guerrarhu andapka.
5 Ísïisti, Lei uandasïndi eskaksï Lebí uájpeecha, imeecha engaksï saserdotiika, jatsiska para diesmu euaani ermanu jémbeechani engaksï iretarhu anapueka, nájkirukaksï iicha Abraáni uájpeeka.
6 Joperu i achamasï enga no Lebí uájpeepka,* euaspti Abraánini diesmu ka újchakuraspti imani enga Tata Diosï aiakupka ambe ma.
7 Ka iáminduechaksï mítesti eska sánderu kʼérisï újchakurajka imani enga sánderu sapichueka.
8 Ístu, ima achamasïicha engaksï diesmu intsïnhajka uarhisïndiksï, joperu máteru achamasïiri kʼóru uandanhasïndi eska irekaxaka.
9 Ka úpiringachi uandani eska Lebí jamberi íntspispka diesmu Abraánini jimbo nájkiruka iásï inde intsïnhajkia diesmu,
10 jimboka jiáni enga Melkisedeki nípka kúntani Abraánini, Lebí nótki andajpenuxapti Abraánini jimbo, enga jindeeka imeeri ióntki anapu parienti.
11 Lei engaksï iámindu iretarhu anapuecha intsïnhapka, uandasïndi eskaksï máru lebiteecha saserdotiipiringa, ísï jimbo enga saserdotiicheeri ánchikuarhita jarhuataapiringa kʼuiripuechani paraksï nóteru pekadoriinia, jiájkani, ¿uétarhipirini eska japiringa saserdoti ma enga ísï mítekateepiringa eska saserdotiiska ísï eska Melkisedeki ka no ísï eska Aaróni?
12 Iásï enga mójtakunhani jaka na engaksï ánchikuarhiakia saserdotiicha, jimajkani uétarhisïndi eska Leijtu mójtakunhaaka.
13 Jimboka inde achamasï engachi uandani jaka, máteru kʼumanchikuarhu anapuesti ka no nema marhuaxati altarirhu enga indeni kʼumanchikuarhu anapueka.
14 Ka ísïisti, jimboka juchaari Tata, Judá uájpeeska ka Moisési no méni uandasti eskaksï japiringa saserdotiicha engaksï Judeeri kʼumanchikuarhu* anapuepiringa.
15 Ka ístuchi míteska eska ísïiska jimboka xarhantaskia máteru saserdoti enga ísïika eska Melkisedeki;
16 ima saserdotiisti nájkiruka no imani kʼumanchikuarhu anapueka enga Lei uandajka, sánderu sési, imani uinhapikua jimbo enga tsípikua íntspijka enga no újka kʼamakurhini.
17 Jimboka ísï uandanhasïnga imeeri ambe: “Tʼuri jindeeska saserdoti para méntkisï ísï eska Melkisedeki”.
18 Ísï jimbo, ióntki anapu mandamientu kʼamakurhistia, jimboka no marhuasïnga ka nójtsïni úsïndi jarhuatani.
19 Jimboka Lei no úska eska iámindu ambe sési japiringa, joperu ambe enga kʼóru ísï úka, jindeesti ima ambe enga Tata Diosï juaaka ka juchachi indeni ambesï erokuarhini jaka ka indeni ambe jimbochisï újka andarhierani Tata Diosïni.
20 Ka Tata Diosï jurariisti jiáni enga peeraka Jesúsini para ima saserdotiini
21 —jimbokaksï jarhaska máru achamasïicha engaksï saserdotiika nájkiruka Tata Diosï no ma ambe jurariika, joperu ini achamasïni jimbo kʼóru jurariisti enga uandapka: “Ji, Tata Diosï Jeoba jurariiskia, ka no mójtakuaka ambe engani uandarini jakaia:* ‘Tʼuri jindeeska saserdoti para méntkisïʼ”—,
22 ísï jimbo, Jesúsi jindeesti ambe enga íntspinhaka para maiampinhani sáni, para xarhatani eska úkuarhiaka sánderu ambakiti pakatperakua ma.
23 Ístu, saserdotiichaksï no úsïreendi ióni marhuani komueska saserdotiicha jimbokaksï uarhisïreenga, jimboksïsï máteruecha niáreendia paraksï saserdotiini.
24 Joperu jimboka Jesúsi méntkisï irekaaka, nóteru uétarhisïndia eska máteru nema saserdotiuaka.
25 Ísï jimbo, ístu sési jorhendakata jarhasti para pʼímutaantani para méntkisï imeechani engaksï Tata Diosïni andarhierajka imani jimbo, jimboka ima méntkisï tsípiti jauaka para imeechani uandapikuani.
26 Jimbokachi jucha uétarhinchaxaka eska jauaka sánderu kʼéri saserdoti ma enga xásïuaka eska inde, jimboka inde no jurajkusïnga Tata Diosïni, no no sési ambe úsïndi, pímbinhasïisti, no májkueni jámasïndi eska imeecha engaksï pekadoriika ka sánderu iótakuarhu peeranhasti eska auanda.
27 Ima no ísïisti eskaksï máteru sánderu kʼéri saserdotiicha, jimboka no jatsiska para pauani pauani kéjtsïtakuni Tata Diosïni, orheta imeeri pekaduechani jimbo kéjtsïtakuni ka tátsekua iretarhu anapuechani jimboia, jimboka jiáni enga ima imeeri tsípikuani íntspipka, ma ueltajkusï kéjtsïtati ka para méntkisï.
28 Ka ima achamasïicha engaksï niárajka jindeeni sánderu kʼéri saserdoti Leini jimbo, niárasïndiksï no sési ambe úni, joperu ísï tátsekua engajtsïni Tata Diosï na íntskupkia Leini, ima jurariispti eska imeeri Uájpani erakupiringa para jindeeni sánderu kʼéri saserdoti, nemani enga ísïmindueka eska Tata Diosï na uéjka, enga iámu ambe mítekia ka nóteru ambe ma kueratanchania.
Notecha
^ O “juchaari familieri orhejtsïkuti”.
^ O “enga no imeecheeri kʼumanchikuarhu anapuepka”.
^ O “triburhu”.
^ O “no pʼamondakuarhiaka”.
