Ebreu 8:1-13
8 Jucha arini ambechisï uéjka eska kurhangunhaaka: eskachi jatsiska sánderu kʼéri saserdotini ma enga meru xásïika, ka inde uaxakastia Tata Diosïiri kʼéri uaxantskuarhu* jurhijkandani jimbo.
2 Ka jima jántspisïndi nani enga pímbinhasïika ka imani tabernakulurhu* enga sési jimboeka ka enga Tata Diosï Jeoba úka ka no kʼuiripuecha.
3 Jimboka imeecha engaksï sánderu kʼéri saserdotiika, erakunhasïndiksï paraksï intsïmperata ambe ka kéjtsïtakua ambe úkuni Tata Diosïni; jimbosï uétarhiendi eska i sánderu kʼéri saserdotijtu kéjtsïtapiringa ambe ma.
4 Ka enga ima parhakpinirhu japiringa, no saserdotiipirindi jimbokaksï jarhaskia máru achamasïicha engaksï kéjtsïtajka ísï eska Lei na uandajka.
5 Na engaksï i achamasïicha marhuakuni jaka Tata Diosïni, auandarhu anapu ambe arhikuekasïndi ka auandarhu anapu ambe xarhatasïndi, ísï eska Tata Diosï na arhipka Moisésini jiáni enga ueenani japkia úni tabernakuluni: “Jánguarhinta ísïmindu úni iámindu ambe eskaksïni na exeraka juátarhu”.
6 Joperu iásï Jesúsi sánderu kʼéri ánchikuarhita ma intsïnhastia, jimboka ístu jarhuajpesïnga* indeni pakatperakua jingoni enga sési uaxastakata jaka leiicha jimbo, ka jimini jupindaskuarhisïndi enga Tata Diosï sánderu ambakiti ambe aiatspeka.
7 Enga orheta pakatperakua méntku sési marhuapiringa, jiájkani nóteru uétarhipirindia eska japiringa máteru pakatperakua.
8 Jimbokachi jucha kurhangusïnga eska ima no sési ambe exekuasïnga iretarhu anapuechani enga ísï uandajka: “‘Exe, nóteru ióni kuerataxatiia, ísï uandasïndi Tata Diosï Jeoba, engani ji ménderuni pakatperaaka* Israeliiri kʼumanchikuarhu anapuecha jingoni ka Judeeri kʼumanchikuarhu anapuecha jingoni.
9 Nóteruchi ísï pakatperaakia eska imeecheeri ióntki anapu parientiicha jingoni jiáni engani jupijtaapka parani Ejiptu petaatantaani. Ka jimbokaksï no úspka ísï eskachi na pakatperapka, jimbosïni ískuni exeapkia ka jurajkuaspkaʼ,* ísï uandasïndi Tata Diosï Jeoba.
10 ”‘Jimboka ísïsïni pakatperaaka Israeliiri kʼumanchikuarhu anapuecha jingoni engaksï na nitamaakia inde jurhiatikuecha, ísï uandasïndi Tata Diosï Jeoba. Ambe engani xáni juramujka ji, imeecheeri eratsekuarhu peeraaka ka imeecheeri mintsitarhu karaaka. Ji imeecheeri Tata Diosïuaka ka imaksï juchiiti ireteuati.
11 ”’Ka nóteru nema jauatia enga jorhendauaka imeecheeri iretarhu anapuechani, nijtu imeeri ermanu jémbeechani arhiaparini: “¡Jatsiskari para míteni Tata Diosï Jeobani!”. Jimbokajtsïni iáminduecha míteakia, sapirhatiicha ka kʼératiicha jamberi.
12 Ka ji pʼamojkuauaka engaksï no sési ambe uaaka ka méntkuni no miáuaka ambe engaksï no sési ambe niátaakaʼ”.*
13 Enga ima uandajka eska jauaka “jimbanhi pakatperakua ma”, arhikuekasïndi eska máteru ióntki anapueskia. Ka enga ambe ma ióntki anapuejkia, jiánguarhisïndi ka nóteru ióni jimbo xántkuesïndia.
Notecha
^ O “tronurhu”.
^ Griegu jimbo: “imani kʼumanchikua sapichu jimbo”.
^ I uandakua griegu jimbo imani kʼuiripuni arhikuekasïndi enga jarhuataajka tsimani kʼuiripuechani paraksï pakatperani ambe ma.
^ Griegu jimbo: “jimbanhi pakatperakua ma uaaka”.
^ O “jimbosïni nóteruni uandanhiapkia imeechani jimbo”.
^ O “no miáuaka imeecheeri pekaduechani”.
