Ebreu 9:1-28
9 Ka imani orheta pakatperakua jimbo, jarhasptiksï leiicha engaksï uandeenga na engaksï kʼuiripuecha jatsipka para kómarhini Tata Diosïni ka tabernakulu* ma jarhaspti echerirhu nani engaksï kómarhienga Tata Diosïni.
2 Ka indeni tabernakulu jimbo, jarhaspti kuartu ma nani enga kandela jatakua ma japka, mesa ma, ka kurhindeecha engaksï jindeepka para kéjtsïtani; jima arhinhasïreendi Pímbinhasï Kuartu.
3 Joperu jima incharini nani enga máteru kortina japka, jarhaspti máteru kuartu tabernakulurhu enga ísï arhinheenga Sánderu Pímbinhasï Kuartu.
4 Jima jarhaspti kʼuájtsïtakua* jatakua enga orueriipka ka ístu jima jarhaspti arka pakatperakueri enga oru jingoni úkata japka. Ka jima, tsúntsu ma jatarixapti maná jingoni, inde tsúntsu orueriispti; ístu jima jarhaspti Aaróniiri pirimu enga tsïpapka ka ima tsakapuecha nani engaksï karanharhikukata japka Tata Diosïiri mandamientuecha,
5 ka jima karhakua, sési járhati kerubiniichaksï jarhaspti engaksï jima jamberi kʼumantskeenga nani enga kéjtsïtanheenga para ménderu sési pájperantani Tata Diosïni jingoni. Joperu iáiasï no jindeesti paraksïni méntku iámindu ambe sési aianguni.
6 Enga na i ambe únhapkia, iásïksï saserdotiicha someni inchani jarhasïndia primeru kuarturhu enga tabernakulurhu jaka paraksï indeni ambe úni enga jindeeka para Tata Diosïni kómarhini;
7 joperu máteru kuartu jimbo, sánderu kʼéri saserdoti jandiajku inchasïndi, ma xanharkusï inchajti mándani uéxurhini, ka méntkisï iurhiri incharasïndi para kéjtsïtani imeeri pekaduecha jimbo ka ístu imani pekaduecha jimbo engaksï iretarhu anapuecha no míteparini újka.
8 Ísï jimbo, espiritu santu uandasïndi eska enga útasï japka ima tabernakulu enga ióntki japka, nótki mítekuarhixapti inde xanharu enga pímbinhasï kuarturhu pájpejka.
9 I tabernakulu xarhatasïndi ambe enga úkuarhini jaka iásï, ka májkueni úkuarhixati, jimbosï intsïmperata ambe ka kéjtsïtakua ambe únhajti. Joperu inde ambe no úsïndi jarhuatani imani kʼuiripuni enga Tata Diosïni kómarhijka para nóteru méni ísï pʼikuarherania eska pekadoriiska.*
10 Inde ambe xánkusï marhuajti, tʼirekua ambe jimbo, itsïmakua ambe jimbo ka na engaksï jikuajka kʼuiripuecha o juparhintani ambe ma.* Ka ini ambesï uandeendi lei para kuerpurhu anapu ambe, ka kʼuiripu jatsispti para ísï úni asta jiáni jamberi enga uaxastakata jakaia para sési peenhantani iámindu ambe.
11 Joperu Kristu jurhasti para jindeeni sánderu kʼéri saserdoti ka uánikua ambakiti ambejtsïni íntskustia engachi iásï jamberi jatsikia, inchasti imani tabernakulurhu enga sánderu kʼéri ambeeka ka enga sánderu sési jaka, ka indeni tabernakulunksï no kʼuiripuecha ústi ka no echerirhu únhasti.
12 Ima ma ueltajkusï inchati ka para méntkisï imani kuartu jimbo enga pímbinhasïika, joperu no chibuecheeri iurhiri jingonisï inchati nijtu beserruecheeri iurhiri jingoni; sánderu sési, imeeri iurhiri jingonisï inchati, ka ísï úparini, ústijtsïni pʼímutantani* para méntkisï.
13 Saserdotiichaksï chibuecheeri iurhiri ka toruecheeri iurhiri ka baka sapichueri tʼupuri jápu* atarhiasïreendi imeechani engaksï ikichakueni jásï ambe ueenga, ka inde ambe marhuasïreendi paraksï pímbinhasï jarhani Tata Diosïni japarini.
14 Jiájkani na xáni sánderu marhuaua Kristueri iurhiri parajtsïni pímbinhajkuntani ka nóteruchi no sési pʼikuarherania* imani ambe jimbo engachi ióntki no sési úka, parachi iásï únia sési kómarhini Tata Diosïni, imani enga tsípiti jaka. Jimboka espiritu santu jarhuataska para ima úni kéjtsïtakuni Tata Diosïni imeeri tsípikuani enga iámindu ambe jimbo sési japka.
15 Ísï jimbosï ima jarhuajpejti* indeni jimbanhi pakatperakua jingoni parakaksï imeecha engaksï ióarhinhaka intsïnhaaka ambe engaksï aiaminhaka, indeni erensiani engaksï para méntkisï jatsiaka, jimboka uarhiska nema para euajpiantani ka parakaksï puáminhantapiringa engaksï ísï no sési ambe niátapka jiáni enga máteru pakatperakua japka.
16 Enga kʼuiripu ma pakatperajka ambe ma máteru kʼuiripu jingoni, uétarhisïndi eska uarhiaka ima kʼuiripu enga ísï aiatspeni jaka,
17 jimboka inde pakatperakua jiáni ueenasïndia marhuani enga uarhijka ima kʼuiripu enga ísï aiatspeni jaka ka no marhuauati enga inde kʼuiripu útasï irekani jauaka.
18 Ísï jimbo, ima pakatperakua enga ióntki japka ueenaspti marhuani,* jimboka iurhiri tsïtanhaspka.
19 Jimboka ísï tátsekua enga Moisési na aianguapkia iámindu iretarhu anapuechani iámindu Leiiri mandamientuechani, pʼíkuspti beserruecheeri iurhiri ka ístu chibuecheeri iurhiri ka itsï jingoni jeuetaspti, ístu pʼíkuspti sununda* charhapiti ka isopueri chkurhiichani ka indeni ambe úraspti para tskárhetani libruni* ka ístu iámindu iretarhu anapuechani,
20 ka uandaspti: “I jindeesti iurhiri enga újka eska Tata Diosïiri pakatperakua ueenaaka jarhani ka ima uékasïndi eskajtsï chá uaaka ambe enga ima uandani jaka”.
21 Ístu iurhiri jingoni tskárhetaspti tabernakuluni ka ambe enga xáni úranheenga para Tata Diosïni kómarhini.
22 Ísïisti, Lei uandasïndi eska sáno iámindu ambe iurhiri jingoni pímbinhajkunhantasïnga, ka enga no tsïtanhajka iurhiri, Tata Diosï no puákuantasïndi kʼuiripuechani engaksï no sési ambe niátajka.
23 Ísï jimbo, uétarhispti ini ambe úrani para pímbinhajkuntani iámindu ambe enga auandarhu anapu ambe arhikuekani japka, joperu para auandarhu anapu ambe pímbinhajkuntani, uétarhisïndi sánderu ambakiti ambe kéjtsïtani.
24 Jimboka Kristu no inchaska imani pímbinhasï kuarturhu engaksï kʼuiripuecha úka ka enga imani arhikuekajka enga meru jaka; sánderu sési, ima auandarhusï inchati, jimbosï iásï újtia andarhierani Tata Diosïni* parajtsïni juchantsïni jarhuatani.
25 Ka no ísï úkuarhisti paraka ima someni íntspini japiringa imeeri tsípikuani komueska kéjtsïtakua ma, ísï eska sánderu kʼéri saserdoti na mándani uéxurhini inchajka animalicheeri iurhiri jingoni imani kuarturhu enga pímbinhasïika.
26 Ka enga no ísï úpiringa, ima jatsipirindi para someni no sési nitamakuarhini jarhani desde jiáni uératini enga ueenaka jarhani parhakpini. Joperu iásï enga nóteru ióni kueratani jakaia para kʼamajkunhani* parhakpini,* ima xarhantasti ma uelta ka para méntkisï para kʼamajkuni pekaduni ka ísï ústi enga kéjtsïtaka imeeri tsípikuani.
27 Ka ísï eskaksï kʼuiripuecha na ma ueltajku uarhijka joperuksï tátsekua jusgarinhani,
28 Kristujtu ma ueltajkusï íntspiti imeeri tsípikuani komueska kéjtsïtakua ma para ima pʼíkuani ka paani uánikua kʼuiripuecheeri pekaduechani; ka enga ménderu juuaka, no juuati pekaduni kénditani, sánderu sési, imeechani juuati pʼímutaantani engaksï erontani jaka.
Notecha
^ Griegu jimbo: “indeni kʼumanchikua sapichu jimbo”.
^ O “insiensu”.
^ O “para ambakiti konsiensia ma jatsini”. Exe je Glosario, konsiensia.
^ Griegu jimbo: “na engaksï mámaru itsï atajpijka”.
^ Griegu jimbo: “euajpintani”.
^ O “jápu tʼupuri”, “echeri jápu”.
^ O “ka para pímbinhajkuntani juchaari konsiensiani”. Exe je Glosario, konsiensia.
^ I uandakua griegu jimbo imani kʼuiripuni arhikuekasïndi enga jarhuataajka tsimani kʼuiripuechani paraksï pakatperani ambe ma.
^ Griegu jimbo: “ueenaspti jarhani”.
^ O “lana”.
^ O “roiuni”.
^ Griegu jimbo: “iásï újtia Tata Diosïni japarini jarhani”.
^ Exe je Glosario, enga kʼamakurhini jauakia tiempu.
^ O “para kʼamakurhini tiempu”. Exe je Glosario, tiempu.
