Galasia 1:1-24
1 Ji apostoli Pablu, jíksïni karachixaka. Jíndeni no ma kʼuiripu erakusti parani apostoliini, sánderu sési, tata Jesukristurenisï erakuti ka ístu Tata Diosï enga jindeeka juchaari Taati, ima enga tsítantaka imani.
2 Ji Pablu ka erachiicha* engaksï jíndeni jingoni jaka, karachixakaksïni chánksïni engajtsï imani kúnguarhikuecharhu jaka engaksï Galasiaisï jaka:
3 Ji kómarhisïnga eskaksïni Tata Diosï, enga jindeeka juchaari Taati, ka ístu Tata Jesukristu kánikua kóndentaaka* ka eskaksïni jarhuataaka parajtsï pínandikua jatsini.
4 Ima íntspisti imeeri tsípikuani juchaari pekaduechani jimbo parajtsïni euajpintani ini parhakpini jimbo* enga xáni no sési jánhaskuarhini jaka, ísï eska juchaari Tata Diosï ka Taati na uéjka,
5 ima enga jukanchaka para kʼéri ambe arhinhani para méntkisï. Eska ísï úkuarhiaka.
6 Ji no uandaspka eskajtsï chá xáni sóntku jarharini japiringa Tata Diosïni,* imani engaksïni erakuka jimbokaksïni Kristu kánikua kóndentaska, ka eskajtsï iásï máteru ambakiti aianhperakuani jakajkuni japiringia.
7 Ka no jimboka jarhaska máteru ambakiti aianhperakua, sánderu sési, jarhastiksï máru engaksï támisï jánhastpini jaka, jimbokaksï ménderueni jorhentpixaka ambakiti aianhperakuani Kristueri ambe.
8 Joperu enga juuaka nema, na uéjki jucha máeni o auandarhu anapu ánjeli ma, ka ménderuenksïni aianguni ambakiti aianhperakuani, ka no ísï eskaksïni jucha na aianguka, jatsisti para kʼamajkunhani.
9 Ka jurajkuksïni ménderu arhini ambe engaksïni arhikia: né uéjki engaksïni máteru ambe aianguaka, ka no indeni ambakiti aianhperakuani engajtsï chá jakajkukia, jatsisti para kʼamajkunhani.
10 ¿Ji kʼuiripuechanisïni jámani jaki jaiapanheraantani o Tata Diosïni? ¿Andi ji kʼuiripuecha jingonisïni uéjki sési pakarani? Engani ji útasï uékapiringa kʼuiripuechani jingoni sési pakarani, jiájkani ji no Kristueri jántspiriipiringa.
11 Ísï jimbo, erachiicha, ji uékasïnga eskajtsï chá mítetini jauaka eska inde ambakiti aianhperakua engaksïni ji aianguka no kʼuiripuechani jimboeska
12 jimbokarini no kʼuiripusï ma aianguka ka nijturini nema jorhenda, sánderu sési, tata Jesukristurenisï aianguti jiáni engareni exeraka ambe ma.
13 Ísïisti, chájtsï míteska na engani jásï kʼuiripuepka jiáni engani judiuecheeri relijionirhu jámeenga. Chájtsï niáraska míteni eskani ji jukari no sési kámasïreenga Tata Diosïiri kúnguarhikuani ka eskani uékasïreenga kʼamajkuni.
14 Ístu, ji sánderuni kʼéri ambeexapkia judiuecheeri relijionirhu eska uánikua juchiiti iretarhu anapuecha engaksï májkueni jatiriipka eskani ji, jimbokani mintsita jingoni jánguarhintasïreenga úni ambe engaksï juchiiti taatiicha pʼindepka úni.
15 Joperu jiáni enga Tata Diosï sési exeka, ima Tata Diosï engareni íntskuka sésikua parani ji andajpenuni* ka engareni ióarhika jimbokarini xáni kóndentaska,
16 jíndeni úrasti parani nirani aianguani no judiuechani ambakiti aianhperakuani, parakaksï imeecha úpiringa míteni imeeri Uájpani, ka ji no ma kʼuiripu* jingoni niraska parareni arhistachini ambesïni úpirini.
17 Nijtuni Jerusaléni karhamapi parani nirani exeani imeechani engaksï tʼuini apostoliipkia ante de ji apostoliini. Sánderu sési, Arabia niraspka ka tátsekua Damasku kʼuanhatsentaspka.
18 Jimajkani, ísï tanimu uéxurhini tátsekua, ji Jerusaléni karhamaspka parani Sefasini* nirani pʼorhembini ka imani jingoni pakaraspka 15 jurhiatikua.
19 Joperuni no ma apostolini exespka; Santiaguntku, enga Tateeri ermanu jémbeeka.
20 Tata Diosïni japarini, jíksïni sési jimbo arhisïnga eska no chkuanderakua ambeeska i ambe engaksïni karachini jaka.
21 Ísï tátsekua, Siria ka Silisiaisï niraspka.
22 Joperu Kristueri kúnguarhikuecha engaksï Judea jaka, nótkijtsïni mítexapti.
23 Imaksï nomasi kurhandisïreendi: “Ima achamasï enga ióntki uékeenga kʼamajkuani kúnguarhikuechani,* iásï uandantani jámaxatiia ini ambakiti aianhperakuani”.
24 Ísï jimbo, imaksï ueenaspti kʼéri ambe arhini Tata Diosïni jíndeni jimbo.
Notecha
^ O “ermanuecha”.
^ Exe je Glosario, Tata Diosï kánikua kóntpintasïndi.
^ O “ini tiempu jimbo”. Exe je Glosario, tiempu.
^ O “eskaksïni sánhani arhini japiringa jarharitani Tata Diosïiri”.
^ Griegu jimbo: “ima enga úka eskani ji nóteruni juchiiti naandiri matrisirhu japiringia”.
^ Griegu jimbo: “ka ji no ma kʼuiripeta ka iurhiri”.
^ Enga ístu arhinheenga Pedru.
^ Griegu jimbo: “enga uékeenga eskachi nóteru mintsikapiringia”.
