Galasia 3:1-29
-
Andisï no májkuenii úni ambe enga Lei uandajka ka mintsikani (1 a 14)
-
“Ima enga sési jámajka, irekaati jimboka mintsikasïnga” (11)
-
-
Ambe enga Tata Diosï aiakupka Abraánini no Leini jimbo jupirindi (15 a 18)
-
Kristu jindeesti Abraáni uájpa (16)
-
-
Nani uéraski Lei ka ambe jimbosï marhuapi (19 a 25)
-
“Chájtsï Tata Diosï uájpeeska jimbokajtsï mintsikasïnga” (26 a 29)
-
Imeecha engaksï Kristueriika Abraánksï uájpeesti (29)
-
3 A ke chá Galasia anapuecha engajtsï xáni no jánhaskajka, ¿néksïni támisï jánhastaskia chánksïni engajtsï sési kurhangupkia na enga cháparhatanhapka tata Jesukristu chkarirhu ma?
2 Íni ambejkuksïnisï kurhamarhiaka:* ¿intsïnhaskijtsï espiritu santu jimbokajtsï úsïnga ambe enga lei uandajka, o jimbokajtsï mintsikasïnga ambe engajtsï aiangunhaka?
3 ¿Andi xántsï no jánhaskasïni? Chájtsï ueenaspkia ísï jámani eskaksïni Tata Diosïiri espiritu na arhienga, ¿ka iásïjtsï ísï jámaxakiia eskaksï kʼuiripuecha na jámajka?
4 ¿Ojtsï chá ísku jatinisï xáni kómu nitamakuarhi? Ji sési mítetixaka eskajtsï chá no ísku jatinisï xáni kómu nitamakuarhika.
5 Jimajkani, ima engaksïni espiritu santu íntskujka ka enga milagruechani uaajka* chánksïni japarini, ¿andisï ísï újki? ¿Ísï úxaki jimbokajtsï chá úxaka ambe enga lei uandajka, o jimbokajtsï mintsikasïnga ambe engajtsï aiangunhaka?
6 Ísïsï úpti Abraáni: “mintsikaspti Tata Diosï Jeobani ka ima ísï exespti komueska kʼuiripu ma enga sési jámeenga”.
7 Chájtsï mítetini jakaia eskaksï imeecha engaksï méntku no jurajkujka mintsikani, Abraáni uájpeeska.
8 Ka ísï eska na karakata jakaia Karakateecharhu, Tata Diosï uandasptia eska ima ísï exeapiringa no judiuechani komueska kʼuiripuecha engaksï sési jámajka, jimbokaksï mintsikapiringa, ka Tata Diosï tʼuini aiangusptia Abraánini ambakiti aianhperakuani, jiáni enga arhipka: “Iámindu ireteechaksï tʼungini jimbo újchakuranhaati”.
9 Ísï jimbo, imeecha engaksï méntku no jurajkujka mintsikani Tata Diosïni, Abraáni jingonksï újchakuranhasïndi jimboka ima mintsikasïreenga Tata Diosïni.
10 Tata Diosï no jaiapanheantasïndi imeechani* engaksï mintsinharhikuarhijka jimbokaksï úxaka ambe enga lei uandajka, jimboka ísï karakata jarhaska: “Tata Diosï no jaiapanhentasïndi imani enga no jánguarhintajka úni ambe enga xáni karakata jaka Leirhu”.
11 Ístu, sésijtsï mítetixaka eska Tata Diosï no nemani ísï exesïnga komueska kʼuiripu ma enga sési jámajka indeni jimbojku enga újka ambe enga lei uandajka, jimboka ísï karakata jarhaska eska “ima enga sési jámajka, irekaati jimboka mintsikasïnga”.
12 Lei no uandasïndi eska nema jatsiska para mintsikani. Sánderu sési, arhisïndi eska “ima enga ísï uaaka eska Lei na arhijka, niáraati irekani”.
13 Kristujtsïni piántasti ka pʼímutantastijtsïni jimbokajtsïni Tata Diosï no úsïreenga Leini jimbo jaiapanhentani. Ka Tata Diosï imanisï niárati no jaiapanhentani* juchantsïni jimbo, jimboka ísï karakata jarhaska: “Tata Diosï no jaiapanhentasïndi imani enga chkarirhu ma cháparhatanhajka”.
14 I ambe ísï úkuarhisti paraka Kristu Jesúsini jimbo ireteechaksï niárapiringa újchakuranhani ísï eska Abraáni na aiaminhapka, para jucha intsïnhani imani espiritu santu engajtsïni Tata Diosï aiachika jimbokachi mintsikasïnga.
15 Erachiicha,* aianguakaksïni ambe ma engaksï kʼuiripuecha újka: engaksï kʼuiripuecha pakatperajka ambe ma, ka ueenanksïa ísï úni eskaksï na pakatperapka, nóteru nema úsïndia pʼínguani nijtu jukari jatsikuntani nájkirukaksï kʼuiripueka engaksï ísï pakatperaka.
16 Ka Tata Diosï Abraáninisï uánikua ambe aiakupti ka ístu imeeri uájpani. No arhisïndi “ka chiiti uájpeechani” enajki uánikua kʼuiripuepirini, sánderu sési, arhisïndi “ka chiiti uájpani” jimboka máechakuantkusï arhikuekani jati, enga jindeeka Kristu.
17 Ístuksïni arhiaka ambe ma: Tata Diosï ísï pakatperaspti, ka 430 uéxurhinisï tátsekua, íntspispti Leini, joperu Lei no pʼínguspti ambe enga Tata Diosï pakatperapkia, ísï jimbo, Lei no pʼíngusïndi ambe enga Tata Diosï aiatspeka.
18 Jimboka enga Tata Diosï leini jimbo íntspipiringa erensia, nóteru jindeepirindia jimboka aiatspespka, joperu jimboka Tata Diosï xénchasïreenga Abraánini, íntskuspti erensia jimboka ísï aiakuspka.
19 Jiájkani, ¿andisï Tata Diosï íntspipi Leini? Íntspispti para xarhatani na engaksï xáni no sési úriika kʼuiripuecha asta jiáni jamberi enga janopiringa Abraáni uájpa, ima enga aiaminhapka ambe ma, ka Tata Diosï ánjeliichani úraasti para Moisésini íntskuni Leini ka Moisési iretani íntskuntaspti.
20 Joperu enga ma kʼuiripujku aiatspejka ambe ma, no uétarhisïndi eska máteru nema jauaka, jiájkani enga Tata Diosï ísï aiatspipka, no uétarhispti eska máteru nema japiringa jimboka imajkusï aiatspeni japka.
21 Jiájkani, ¿Lei ójkutpixaki para no úkuarhini ambe enga Tata Diosï aiatspeka? ¡Méntku nómbe! Jimboka enga japiringa lei ma enga úpiringa tsípikua íntspini, jiájkani Tata Diosï leini jimbosï úpirindi ísï exeni nemani komueska kʼuiripu ma enga sési jámajka.
22 Joperu Tata Diosïiri Uandakua, pekaduni jurajkukusti iámindu ambe, parakaksï imeecha engaksï mintsikajka, intsïnhaaka ambe engaksï aiaminhaka jimbokaksï mintsikasïnga tata Jesukristuni.
23 Joperu ante dechi ueenani tata Jesukristuni mintsikani, leijtsïni kuájchakuxapti ka imani ambechi úsïreenga ambe enga lei uandajka, jimbokachi erokuarhixapka ambe engajtsïni Tata Diosï aiangupiringa.
24 Ísï jimbo, Lei jindeesti engajtsïni jarhuataka* ka engajtsïni Kristu jingoni páka, parakajtsïni Tata Diosï úpiringa ísï exeni komueska kʼuiripuecha engaksï sési jámajka jimbokachi mintsikasïnga.
25 Joperu iásï engachi mintsikani jakaia Kristuni, nóteruchi uétarhinchasïngia eskajtsïni Lei jarhuataaka.
26 Jiájkani, chájtsï Tata Diosï uájpeeska jimbokajtsï mintsikasïnga Kristu Jesúsini.
27 Jimbokajtsï chá itsï atakuarhiska* ka Kristu jingontsï jarhaskia, ka iásïjtsï ísï jámasïngia eska Kristu.
28 Jimbokaksï májkueniiska judiuecha ka grieguecha, jántspiriicha ka imeecha engaksï no jántspiriika, ka ístuksï májkueniisti tatakeecha ka nanakeecha jimbokajtsï chá májkueska ka Kristu jingontsï jarhaska.
29 Ka engajtsï Kristueriika, jiájkani chájtsï Abraáni uájpeeska ka chájtsï pʼiuaka erensiani ísï eska Tata Diosï na aiatspeka.
Notecha
^ Griegu jimbo: “Chájtsïni jorhenda je ini ambe”.
^ O “enga kʼéri ambe újka”.
^ O “Kastigarinhaatiksï imeecha”.
^ O “niárati kastigarini”.
^ O “Ermanuecha”.
^ Uandakua enga ixú úrakuarhika griegu jimbo, indenisï arhikuekani jati kʼuiripuni ma enga sapini ma kuájchakujka.
^ Exe je Glosario, itsï atakuarhini; itsï atani.
