Galasia 4:1-31
-
Nóterujtsï jántspiriiskia, sánderu sési, Tata Diosïiri uájpeeskajtsïa (1 a 7)
-
Pablu uandanhiaxati Galasia anapuechani jimbo (8 a 20)
-
Agari ka Sara xarhatasïndiksï na enga Tata Diosï tsimani xanhari pakatperapka kʼuiripuechani jingoni (21 a 31)
-
Jerusaléni enga karhakua jaka, no jántspiriisti ka juchaari naandiisti (26)
-
4 Ka iásïksïni arhisïnga eska enga útasï tataka sapichuejka ima enga pʼiuaka erensiani, no sánderu kʼéri ambeesïndi eska jántspiri ma nájkiruka imeeriika iámindu ambe,
2 jimbokaksï jarhasïnga máru kʼuiripuecha engaksï exeni jarhajka tataka sapichuni ka ístu imeeri kʼumanchikuani, asta ima jurhiatikua jamberi enga taati jémba uaxastakia.
3 Juchajtuchi májkueni, engachi sapiipka, juchajtuchi jántspiriispka jimbokachi ísï eratsesïreenga ka ísïchi jámasïreenga eskaksï parhakpini anapuecha.
4 Joperu enga na niárapkia ima jurhiatikua enga uaxastakata japkia, Tata Diosï axaspti imeeri Uájpani ka uarhiiti ma kánguarhispti imani, ka imajtu jatsispti para úni ambe enga lei uandajka,
5 para piaantani ka pʼímutaantani imeechani engaksï úni japka ambe enga lei uandajka, ka indeni jimbo, Tata Diosïjtsïni iásï ísï pʼíkuntani komueska imeeri uájpeecha.
6 Ka jimbokajtsï chá Tata Diosïiri uájpeeska, ima juchaari mintsitarhu peerasti imeeri Uájpeeri espiritu santuni ka i espiritu uandasïndi: “¡Abba,* Taati!”.
7 Jiájkani tʼuri iásï nóteru jántspiriiskia, sánderu sési, tʼuri Tata Diosïiri uájpeeskia. Ka jimbokari Tata Diosïiri uájpeeska, ima uékasïndi eskari tʼujtu pʼiuaka erensia.
8 Joperu engajtsï chá nótki míteni japka Tata Diosïni, chájtsï imeecheeri jántspiriispka engaksï no diosïika.
9 Joperu iásï engajtsï mítekia Tata Diosïni, o sánderu sési, iásï engaksïni Tata Diosï mítekia, ¿andijtsïsï ménderu uéjki kʼuanhatsentani parajtsï imani ambe úni enga no marhuajka ka enga ísku ambe máeka, indeni ambe engaksï parhakpini anapuecha eratsejka ka úni, ka andijtsïsï uéjki ménderu imeecheeri jántspiriini?
10 Chájtsï eratsesïnga eskaksï jarhaska jurhiatikuecha, kutsïicha, tiempuecha ka uéxurhiniicha engaksï sánderu ambakitiika, ka chájtsï afuersa uékasïnga jiáni kʼuínchini.
11 Ji kánikua uandanhiasïnga chánksïni jimbo, jamberini ísku jatini xáni jánguarhintaka paraksïni chánksïni jarhuatani.
12 Erachiicha,* jíksïni kurhachexaka eskajtsï ísïiuaka eskani ji jimbokani jíjtuni ísïispka eska chá. Chájtsïni no méni no sési kámaska jíndeni.
13 Joperujtsï chá míteska eskani ji pʼamenchaxapka jiáni engani chánksïni jingoni pakarapka ka jíksïni jiánisï ueenapka aianguni ambakiti aianhperakuani.
14 Ka nájkirukajtsï chá úkua jukanchapka jiáni engani ji ísï pʼamenchani japka, chájtsïni no ísku exespka nijtujtsïni ikichapi.* Sánderu sési, chájtsïni sési erokaspka komueska Tata Diosïiri ánjelini ma, komueska Kristu Jesúsini.
15 Jiájkani, ¿andijtsïsï nóteru tsípijkia? Jimbokani ji sési míteska* eska, enga ísï kʼuanipiringa, chájtsï pʼitanharhiapiringa chaari éskuechani ka jíndentsïni íntsaapiringa.
16 ¿Ka iásïjtsï chá uandasïnia eskaksïni ikiachesïnga jimbokaksïni arhinharhikuxaka?
17 Imeechaksïni méntku arhini jarhasïndi eskajtsï imeecha jingoniuaka, joperu no jimbokaksïni sési jimbo uékasïnga jarhuatani. Imaksï uékasïndi eskajtsïni chá jurajkuaka jíndeni parajtsï imeechani nirani chúxapaani.
18 Joperu sési jarhasti eska jauaka nema engaksïni méntku arhini jauaka parajtsï chá imani jingoni jámani ka sési jimboksïni uékani jarhuatani, ka nóksïni jiántku ísï arhini jarhani engani ji chánksïni jingoni jauaka.
19 Juchiiti uátsïtiicha, ji ménderuni kánikua no sési pʼikuarheraxaka chánksïni jimbo ísï eska uarhiiti ma na xáni no sési pʼikuarherajka enga kánguarhini jarhajkia charhakuni, ka ísï pʼikuarherani jauaka asta jiáni jamberi engajtsï chá na ísïiuakia eska Kristu.
20 Ji uékapiringa iáiasï chánksïni jingoni jarhani ka sánderuksïni sési arhini, jimbokani nóteruni jánhaskasïngia ambe úni chánksïni jingoni.
21 Joperu iásï, arhijtsïni je chá engajtsï uéjka úni ambe enga lei uandajka, ¿andi nójtsï kurhaasïni ambe enga Lei uandajka?
22 Exe je ambe ma, karakata jarhasti eska Abraáni tsimani uájpeechani kaaspka: ma imani uarhiitini jingoni kámaspti enga jántspiriipka ka máteru imani uarhiitini jingoni enga no jántspiriipka.
23 Jántspiriiri uájpa, ísï andajpenuspti eska náki uéjki charhaku ma, joperu ima uarhiitiiri uájpa enga no jántspiriipka, niáraspti andajpenuni jimboka Tata Diosï ísï aiatspespka.
24 Iámindu i ambe enga úkuarhipka, xarhataxapti ambe enga sánderu orhepatini úkuarhipiringa, jimbokaksï i uarhiitiicha xarhataxapka na enga Tata Diosï tsimani xanhari pakatperapka kʼuiripuechani jingoni. Ma xanhari jiániispti Sinaíiri juáta jimbo, jimbokaksï japiringa uájpeecha engaksï jántspiriipiringa, ísï eska Agari.
25 Agari, Sinaíni arhikuekasïndi, juáta ma enga Arabia jaka, ka ísïisti komueska iásï anapu Jerusaléni, jimboka Jerusaléni jántspiriiska ka uájpeechajtuksï ísï.
26 Joperu ima Jerusaléni enga karhakua jaka, ima no jántspiriisti ka imasï jindeeti juchaari naandi.
27 Jimboka ísï karakata jarhaska: “Tʼu uarhiiti engari no újka kánguarhiani sapiichani, kánikua tsípi. Tʼu uarhiiti engari no pʼikuarherani jaka na enga xáni no sési pʼikuarherakuarhijka charhakuni ma kánguarhini, uinhacha xáni tsípini. Jimboka ima uarhiiti enga jurajkunhaka, sánderu uánikua uájpeechani kánguarhiaska eska ima uarhiiti enga kámajka acheetini”.
28 Jiájkani erachiicha, chájtujtsï uájpeeska jimboka Tata Diosï ísï aiatspeska, májkueni eska Isaaki.
29 Joperu ióntki, ima uájpa enga ísï andajpenupka eska náki uéjki charhaku ma, no sési kámaspti imani enga espiritu santu jimbo kánguarhinhapka, ka ísï eska ióntki, májkueni úkuarhixati iásï.
30 Joperu, ¿ambe arhisïni Karakateecharhu? “Chútanta indeni uarhiitini enga jántspiriika ka ístu uájpani. Ima uarhiitiiri uájpa enga no jántspiriika, no arhungurhiati erensia jántspiriiri uájpa jingoni”.
31 Ísï jimbo erachiicha, jucha no jántspiriiri uájpeeska, sánderu sési, juchachi ima uarhiitiiri uájpeeska enga no jántspiriika.
Notecha
^ Uandakua ma enga ebreu o arameu jimbo jaka ka enga arhikuekajka ‘¡oh, juchiiti taati!’, joperu májkueniisti enga ma pʼurhe jimbo uékperakua jingoni arhijka taatini pa.
^ O “Ermanuecha”.
^ O “tʼuarhipi”.
^ O “ji uaaka uandantani”.
