Juanu 10:1-42
10 “Jíksïni sési jimbo arhisïnga eska ima enga no puertarhisï inchajka karichi jatakuarhu ka máteru nanisï inchaakuni, inchatspini jámasïndi ka ístu sïpani jámasïndi.
2 Joperu ima enga puertarhisï inchajka, ima jindeesti karichi eranguti.
3 Kuári, karichi erangutinisï mítakujti ka karichichaksï kurhachakusïndi. Karichi eranguti mándani arini uandajpaasïndi imeecheeri nombri jimbo ka petaasïndi.
4 Ka enga na iámu petaajkia karichiichani, orhekupaasïndi. Ka karichiichaksï nirasïndi chúxapani jimbokaksï míchakusïnga.
5 Nóksï méni niuati chúxapani imani engaksï no míteka, sánderu sési, sïpakuarhikuatiksï jimbokaksï no méni kurhachakuxapka”.
6 Jesúsi aianguaspti ini ejempluni, joperu imeechaksï no kurhanguspti ambe enga arhiani japka.
7 Ísï jimbo, Jesúsi ménderu arhiaspti: “Jíksïni sési jimbo arhisïnga eskani ji jindeeska puerta nani engaksï karichiicha inchantajka.
8 Iámindu imeecha engaksï juka uandaparini eskaksï karichi erangutiiska, sïpanksï jámasïndi ka inchatspinksï jámasïndi, joperu karichiichaksï ísku kurhachakuasti.
9 Ji jindeeska puerta ka ima enga ini puerta jimbo inchaakuaka, pʼímutantskata uéraati; uaati inchani ka uéntani ka uitsakua ambe exentaati.
10 Sïpari, sïpantkusï jurhajti, jurhasïndi para uándikpini ka para iámu ambe kʼamajkuni. Ji jurhaska paraksï karichiicha tsípikua jatsini ka paraksï ióni irekani.
11 Ji jindeeska ambakiti karichi eranguti, ka ambakiti karichi eranguti ma, íntspisïndi imeeri tsípikuani* karichiichani jimbo.
12 Joperu ima enga ánchikuarhintku jámajka ka no karichi erangutiini niksï imeeriini karichiicha, sïpakuarhisïndi enga exejka jiuatsïni ka jima jurarkuasïndi karichiichani. Ísï jimbo, jiuatsï jupiasïndi ka etsandurhiasïndi karichiichani.
13 Ima enga ánchikuarhintku jámajka, sïpakuarhisïndi jimboka sentabu jimbojkusï ánchikuarhijka ka no uandanhiasïndi karichiichani jimbo.
14 Ji jindeeska ambakiti karichi eranguti. Míteaska juchiiti karichiichani ka imajtujtsïni mítesti jíndeni,
15 ísï eskarini Taati na míteka jíndeni ka jíjtuni míteni Taatini; ka ji íntspisïnga juchiiti tsípikuani karichiichani jimbo.
16 ”Ka kaasïnga máteru karichiichani engaksï no ini karichi jatakuarhu anapueka; ka imeechantuni juánguauaka ka imeechajtsïni míchakuati. Ka iáminduechani májku kʼéri jatsiauaka ka májku karichi eranguti jauati.
17 Ini ambe jimborenisï Taati xénchajti: jimbokani ji íntspisïnga juchiiti tsípikuani parani ménderu intsïnhantani tátsekua.
18 Jísïni uékajka íntspini tsípikuani ka no jimbokarini nema uékasïnga euantani. Jatsiska sésikua parani íntspini juchiiti tsípikuani ka parani ménderu intsïnhantani. Jimbokarini juchiiti Taati indeni ambesï juramuchika”.
19 Ka engaksï judiuecha ini ambe kurhaapka, ménderuksï ueenaspti mámaru ambe uandani ka úndasptiksï arhirperani.
20 Ka uánikuechaksï uandasïreendi: “¿Andijtsïsï indeni kurhajchani jaki? Indeni demoniu ma incharhitixati ka iámu xerejtsïstia”.
21 Ka máteruechaksï uandasïreendi: “Inde no indeni ambe uandapirindi enga demoniu ma incharhitini japiringa. ¿Andi demoniu ma úpirini éskataraantani imeechani engaksï no újka exeni?”.
22 Imani jurhiatikuecha jimbo, Kʼuínchikua úkuarhixapti Jerusaléni para Miántani na enga jatini Pímbinhajkunhantapka Templu. Jiánisï iauaxapti*
23 ka Jesúsi templurhu jarhaspti, inchajchukurhinisï jámaxapti, jimeesïsï enga arhinhajka Salomóniiri Portali.
24 Jimajkani judiuechaksï uirhipandaspti ka arhisptiksï: “¿Na jatini jamberijtsïni ísï kámani jaua? Engari tʼu jindeeka Kristu, mátirkujtsïni aiangu”.
25 Jesúsi arhiaspti: “Arhiskaksïnia, joperujtsïni chá no jakajkuchesïnga. Ambe engani ji újka juchiiti Taatiiri nombri jimbo, xarhatasïndi eska ísïiska ambe engani ji uandantajka.
26 Joperu chájtsï no jakajkusïnga jimbokajtsï no juchiiti karichiicheska.
27 Juchiiti karichiichajtsïni míchakusïndi; ji míteaska ka imajtsïni chúxapasïndi.
28 Ka ji íntsaasïnga tsípikua para méntkisï; ka nóksï méni kʼamajkunhaati ka nóreni nema euajkuauati.
29 Ambe engareni juchiiti Taati íntskuka, sánderu jukaparhakua ambeesti eska máteru ambe. Ka Taatini no nema uaati euajkuantani karichiichani.
30 Ji ka Taati, májkueskachi”.*
31 Ka judiuechaksï ménderu tsakapuechani kʼarhaantaspti paraksï Jesúsini kʼuanirani.
32 Jimajkani Jesúsi arhiaspti: “Ji uánikua ambakiti ambe úskia chánksïni japarini, imani ambe engareni Taati arhika. Ka indeni ambe jimbo engani xáni úkia, ¿andijtsïnisï uékani jaki atani?”.
33 Judiuechaksï arhispti: “Nóksïni indeni ambe jimbosï ataaka engari ambakiti ambe újka, sino jimbokari no sési ambe uandaska Tata Diosïiri ambe. Tʼuri ísku nemeeska ka jiniri ísï exekuarhisïnga komueska diosï ma”.
34 Jesúsi arhiaspti: “¿Andi no karakata jarhaski chaari Leirhu ‘Ji uandaska: “Chájtsï diosïiska”’?
35 Enga ima arhiapka diosïicha imeechani enga Tata Diosïiri uandakua arhiapka ambe engaksï no sési úni japka —ka iámindu ambe enga Karakatecharhu arhijka, jatsisti para ísï úkuarhini—
36 ka jíndeni engareni Taati erakuka parani marhuakuni ka engareni parhakpinirhu axaka, ¿chájtsïni arhixaki eskani no sési ambe uandaska Tata Diosïiri ambe, jimbokani uandaska ‘ji Tata Diosï Uájpeeska’?
37 Engani ji no úni jaka ambe enga juchiiti Taati uéjka, jiájkani asïjtsïni jáma je jakajkucheni.
38 Joperu engani ji úni jaka ambe enga uéjka juchiiti Taati, nájkirukajtsïni no jakajkucheaka jíndeni, imani ambe jimbo jakajku je engani úni jaka. Ísïjtsï míteaka ka méntkisïjtsï mítetini jauaka eska juchiiti Taati jíndeni jingoni jarhaska ka eskani ji juchiiti Taati jingoni jarhaska”.
39 Ka ménderuksï jámaspti jupikani, joperuksï no úspti jimboka Jesúsi kéndikukuaspka.
40 Jesúsi ménderu Jordánirhu parhikuteni niraspti, jima enga Juanu ueenapka itsï ataani* kʼuiripuechani ka jima pakaraspti.
41 Uánikua kʼuiripuechaksï niraspti exeni ka ueenasptiksï uandani: “Juanu no ma milagru úspti, joperu ísïisti ambe enga xáni uandapka Juanu i achamasïiri ambe”.
42 Ka jimaksï uánikua kʼuiripuecha niáraspti mintsikani Jesúsini.
Notecha
^ O “almani”.
^ O “iéstaxapti”.
^ O “márkuchi jarhaska”.
^ Exe je Glosario, itsï atakuarhini; itsï atani.
