Juanu 15:1-27
15 ”Ji jindeeska ubasïiri anhatapu enga sési jimboeka ka juchiiti Taati jindeesti tarheri.
2 Ima chʼapandikuasïndi rameechani* engani ji jukaajka, imeechani engaksï no jukajka frutu; ka imeechani engaksï frutu jukajka, sési ambarheasïndi parakaksï sánderu jukaaka.
3 Chájtsï ambarhekata jarhaskia imani ambe jimbo engaksïni aianguka.
4 Jíndeni jingoni ja je ka ji chánksïni jingoni jauaka. Rama ma jatsisti para ubasïiri anhatapurhu jukarini jarhani para úni frutu jukani, jimboka jandiajku no úsïnga jukani. Májkueni, chájtujtsï no uaaka frutu jukani engajtsï no jíndeni jingoni jauaka.
5 Ji jindeeska ubasïiri anhatapu ka chájtsï jindeeska rameecha. Ima enga jíndeni jingoni jarhajka ka jíjtuni imani jingoni, ima kánikua frutu jukasïndi. Jimbokajtsï chá no ma ambe úsïnga úni engajtsï no jíndeni jingoni jauaka.
6 Enga nema nóteru jíndeni jingoni jarhajkia, ísï chʼapanhasïndi komueska rama ma ka niárasïndi kʼarhini. Indeksï rameecha tánanhantasïndi, tátsekuaksï chpirirhu kʼuanijpanhasïndi ka jimaksï kurhisïndi.
7 Engajtsï jíndeni jingoni jauaka ka úni ambe engaksïni ji arhijka, uaakajtsï kurhajkuarhini ambe engajtsï uékaaka ka intsïnhaakajtsï.
8 I ambe kʼéri ambe arhisïndi juchiiti Taatini: eskajtsï méntkisï kánikua frutu jukaaka ka eskajtsï xarhataaka eskajtsï juchiiti chúxapatiiska.
9 Ísï eskarini Taati na xénchajka jíndeni, jíjtuksïni májkueni xénchasïnga, ísï jimbo, jánguarhinta je paraksïni ji méntkisï xénchani.
10 Engajtsï ísï úska eskaksïni ji na juramuchijka, jíksïni méntkisï xénchaaka, ísï eskani ji na újka ambe engareni Taati juramuchijka jimborenisï ima xénchajti.
11 ”Jíksïni aianguska ini ambe parajtsï chá kánikua tsípini ísï eskani ji na tsípijka.
12 I ambeksïnisï juramuchini jaka: eskajtsï xénchperaaka máteru ka máteruni jingoni ísï eskaksïni ji na xénchajka.
13 No nema jarhasti enga sánderu xénchpejka eska ima enga íntspijka imeeri tsípikuani* imeeri amiguechani jimbo.
14 Engajtsï úska ambe engaksïni ji arhijka, chájtsï juchiiti amigueuaka.
15 Nóteruksïni arhisïngia eskajtsï juchiiti jántspiriiska, jimboka jántspiri ma no mítesïnga ambe enga újka kʼumanchikuarhu anapu achamasï. Jíksïni arhisïnga eskajtsï juchiiti amigueska, jimbokaksïni ji iámu ambe aianguskia ambe engareni juchiiti Taati arhika.
16 Nójtsïni chásï erakuka jíndeni, jíksïnisï erakuka chánksïni. Jíksïni erakuska parajtsï nirani ka parajtsï kánikua frutu jukani, frutu enga jindeuaka para méntkisï. Ka ísï úparini, Taatiksïni íntskuati ambe uéjkijtsï kurhajkuarhini juchiiti nombri jimbo.
17 ”Íni ambeksïni juramuchixaka parakajtsï xénchperaaka máteru ka máteruni jingoni.
18 Engaksïni parhakpini anapuecha ikiachejka, mítetixakajtsïa eskajtsïni jíndeni ueenaska ikiacheni.
19 Engajtsï ísï jámapiringa eska parhakpini anapuecha, parhakpini anapuechaksïni xénchapirindi. Joperuksïni ji erakuska ka chájtsï no ísï jámasïnga eska parhakpini anapuecha, ísï jimboksïnisï parhakpini anapuecha ikiachejti.
20 Miá je ambe engaksïni arhika: jántspiri no sánderu kʼéri ambeesti eska kʼumanchikuarhu anapu achamasï; engajtsïni imeecha ísï no sési kámaka jíndeni, chánksïntuksïni no sési kámaati; engajtsïni imeecha kurhajchaska jíndeni, ístuksïni kurhajchaati chánksïni.
21 Ísïksïni kámaati jimbokajtsï chá juchiiti chúxapatiiska ka ístu jimbokaksï no míteska imani engareni axaka.
22 Engani ji no jupiringa ka engani no ma ambe aianguapiringa, imeechaksï no no sési ambe úni japirindi.* Joperu iásïksï no uaati uandani eskaksï no no sési ambe úska.
23 Ima engareni jíndeni ikiachejka, ístu ikiakusïndi juchiiti Taatini.
24 Engani ji no úpiringa imeechani japarini imani ambe enga no nema úni japka, nóksï ambe ma no sési úni japirindi;* joperu iásïjtsïni exestia ka ikiachestijtsïni ka ístuksï ikiakusti juchiiti Taatini.
25 Joperu i ambe ísï úkuarhisti paraka úkuarhipiringa ambe enga imeecheeri Leirhu karakata jaka: ‘Ísku jatintsïni ikiachesti’.
26 Engajtsï jatsiakia imani engaksïni jarhuataaka, engaksïni ji axacheaka juchiiti Taatini jimbo, espiritu santu enga xarhatajka jurhimbikua ambe, ka enga juchiiti Taatini jimbo jurhajka, imasï uandantaati juchiiti ambe;
27 ka chájtujtsï jatsiska para juchiiti ambe uandantani jimbokajtsï chá desde ueenakuarhu jíndeni jingoni jarhaska.
Notecha
^ O “tsikixkurhiteechani”.
^ O “almani”.
^ O “no ma pekadu jatsipirindi”.
^ O “nóksï ma pekadu jatsipirindi”.
