Juanu 16:1-33
16 ”Jíksïni ini ambe arhixaka parajtsï chá no jámani ísku jatini nóteru mintsikania.*
2 Chájtsï petanhantaaka jima uératini engaksï judiuecha tánguarhijka para Tata Diosïni kómarhini. Ka janoxamtia ima jandora engaksïni uándikuaka eratseparini eskaksï ísï úparini Tata Diosïnisï marhuakuni jaka.
3 Joperuksïni ísï kámaati jimbokaksï nótki mítexaka Taatini nijtujtsïni jíndeni míteni jaki.
4 Jíksïni ini ambe arhixaka paraka jiáni enga ísï úkuarhiaka, chájtsï miántani eskaksïni ji tʼuini aianguspkia.
”Jíksïni no arhispka ini ambe ueenani jámani jimbokani chánksïni jingoni jarhaspka.
5 Joperuni iásï niraxamka andarhientani imani engareni axaka ka chájtsïni no kurhamarhixaka ‘¿Naniri niraxamki?’.
6 Nómbe, chájtsï masi úska kómu pʼikuarherani jimbokaksïni ini ambe arhiska.
7 Joperuksïni sési jimbosï arhini jaka: chaari sési jimboeuati engani níntaaka. Jimboka engani no níntaaka, ima engaksïni jarhuataaka nóksïni juuati andarhierani; joperu engani níntaaka, jíksïni axacheaka.
8 Ka enga na juuakia, ima xarhataati ambe engaksï parhakpini anapuecha no sési úni jaka,* xarhataati eskani ji sési jámasïnga ka xarhatakuauati parhakpini anapuechani nénisï jusgarijki Tata Diosï.
9 Orheta xarhataati ambe engaksï no sési úni jaka parhakpini anapuecha* jimbokajtsïni imeecha no mintsikasïnga jíndeni;
10 tátsekua, xarhatakuauati parhakpini anapuechani eskani ji sési jámasïnga, jimbokani niraxamka Taatini andarhientani ka chájtsïni nóteru exeakia
11 ka ístu xarhataati nénisï jusgarijki Tata Diosï, jimboka jusgariskia ini parhakpini anapu juramutini.
12 ”Uánikua ambeteruni jatsiska paraksïni arhini, joperujtsï iáiasï nótki uaaka kurhanguni.
13 Joperu enga na juuakia ima,* espiritu santu enga xarhatajka jurhimbikua ambe, imaksïni jarhuataati parajtsï chá jurhimbikua ambe míteni, jimboka ima no ísku pʼitsïkuarhiaka uandani, imani ambesï uandaati ambe enga kurhauaka ka aianguatiksïni ambe enga no ióni jimbo úkuarhiaka.
14 Imarini kʼéri ambe arhiati jimboka pʼiuaka imani ambe enga juchiitiika ka chánksïni aianguati.
15 Ambe enga xáni jatsika Taati, ístu juchiitiisti. Jimbosïni ísï uandaka eska ima pʼiuaka ambe enga juchiitiika ka eskaksïni chánksïni aianguaka.
16 No ióni jimbo chájtsïni nóteru exeakia, joperu ménderu no ióni jimbo chájtsïni exeaka”.
17 Engaksï imeeri chúxapatiicha máru kurhaapka ini ambe, ueenasptiksï arhijperani: “¿Andisï ísï uandani jaki ‘No ióni jimbo chájtsïni nóteru exeakia, joperu ménderu no ióni jimbo chájtsïni exeaka’? ¿Ka andisï uandajki ‘Jimbokani niraxamka andarhientani Taatini’?”.
18 Ka uandasïreendiksï: “¿Andisï uandajki ‘No ióni jimbo’? Nóchi kurhangukusïnga ambesï arhikuekani jaki”.
19 Míteparini eskaksï uékasïreenga kurhamarhini, Jesúsi arhiaspti: “¿Chájtsï kurhamarperaxaki jimbokani uandaska ‘No ióni jimbo chájtsïni nóteru exeakia, joperu ménderu no ióni jimbo chájtsïni exeaka’?
20 Jíksïni sési jimbo arhisïnga eskajtsï chá ueraaka ka eskajtsï no sési pʼikuarheraaka, joperuksï parhakpini anapuecha tsípiati; chájtsï kánikua no sési pʼikuarheraaka joperujtsï tátsekua kánikua tsípiaka.
21 Enga uarhiiti ma kánguarhini jámajkia charhakuni, kánikua no sési pʼikuarherasïndi jimboka niárakuskia jandora. Joperu enga na kánguarhijkia charhakuni, kánikua tsípisïndi jimboka sapi ma* andajpenuska ka nóteru jamberi miásïndia na enga xáni no sési pʼikuarherapka.*
22 Ka chájtujtsï ísï jarhaska. Iáiasïjtsï kómu pʼikuarheraxaka, joperuksïni ji ménderu exentaaka ka chájtsï mintsita jingoni tsípiaka ka engaksïni nema uékaaka ójkutani parajtsï chá no tsípini, no uaati ísï úni.
23 Ka ima jurhiatikua, chájtsïni nóteru ambe ma kurhamarhiakia. Jíksïni sési jimbo arhisïnga eska ambe uéjki engajtsï kurhakuaka Taatini juchiiti nombri jimbo, imaksïni íntskuati.
24 Iáiasï jamberi chájtsï no ma ambe kurhajkuarhixaka juchiiti nombri jimbo. Kurhajkuarhi je ka intsïnhaakajtsï ka ísï úparini, chájtsï kánikua tsípiaka.
25 ”Jíksïni ejempluechani jingoni jorhendaska ini ambe. Joperu niáraati jandora engaksïni nóteru ejempluechani jingoni jorhendaakia, sánderu sési, jurhimbitkuksïni aianguaka Taatiiri ambe.
26 Ima jurhiatikua, chájtsï kurhakuaka ambe ma Taatini juchiiti nombri jimbo. Joperuni no uandaxaka eskaksïni ji arhijpicheaka.
27 Jimbokaksïni Taati xénchasïnga indeni jimbo engajtsïni xénchajka jíndeni, ka ístu jimbokajtsï jakajkuska eskani ji Tata Diosïiri nombri jimbo jurhaska.
28 Ji jurhaska parhakpinirhu Taatiiri nombri jimbo. Ka iásï, nóteruni parhakpinirhu jauakia jimbokani niraxamka Taatini andarhientani”.
29 Imeeri chúxapatiichaksï arhispti: “Iásï kʼóruksïni sési kurhangucheskia jimbokari nóteru ejempluechani jingoni uandaskia.
30 Iásï kʼóruchi kurhanguskia eskari tʼu iámindu ambe míteska ka eskari no uétarhinchasïnga eskakeni nema kurhamarhini jauaka ambe ma. Ísï jimbochisï jakajkujka eskakeni Tata Diosï axaska”.
31 Jesúsi arhiaspti: “¿Iásïjtsï kʼóru jakajkusïnia?
32 Kurhaa je. Niáraati jandora, jo, janostia, engajtsï chá etsandurhikuarhiaka. Táchanisïjtsï nitsïkuarhintaaka ka jandiajkujtsïni jurajkuaka. Joperuni no jandiajku jarhaska, jimboka Taati jíndeni jingoni jarhaska.
33 Jíksïni ini ambe arhixaka parajtsï chá sési pʼikuarherantani* jíndeni jimbo. Chájtsï kánikua no sési nitamakuarhiaka ini parhakpinirhu. Joperu ¡asï ché je!, ji andaska ini parhakpinini”.
Notecha
^ O “ísku jatini téksarhutani”.
^ O “parhakpini anapuecheeri pekaduni”.
^ O “parhakpini anapu pekaduni”.
^ Uandakua “ima” enga bersikulu 13 ka 14 jimbo jaka, indenisï arhikuekani jati enga bersikulu 7 jimbo arhijka “ima engaksïni jarhuataaka”. Enga Jesúsi uandapka “ima engaksïni jarhuataaka” ísï uandaspti enajki espiritu santu kʼuiripu máepi, joperu uinhapikuanisï arhikuekani japti ka no meru kʼuiripuni ma.
^ O “kʼuiripu ma”.
^ O “no sési nitamakuarhipka”.
^ O “pínandikua jatsini”.
