Juanu 18:1-40
-
Judasï traisionariisïndi Jesúsini (1 a 9)
-
Pedru espada jimbo atajpisïndi (10 ka 11)
-
Anási jingonksï pásïndi Jesúsini (12 a 14)
-
Primeru xanhari enga Pedru uandajka eska no míteska Jesúsini (15 a 18)
-
Jesúsi Anási jingoni jarhasïndia (19 a 24)
-
Pedru ménderu tsimani xanhari uandasïndi eska no míteska Jesúsini (25 a 27)
-
Jesúsi Pilatu jingoni jarhasïndi (28 a 40)
-
“Juchiiti Reinu no ini parhakpini anapuesti” (36)
-
18 Enga na ísï uandapkia, Jesúsi ka imeeri chúxapatiichaksï kauaru ma jimbo parhikuspti enga Sedróni arhinhajka ka tarhekata ma jimboksï inchaakuspti.
2 Judasï, ima enga traisionariipiringa, imajtu miiuspti jima jimboka Jesúsi someni jima tánguarhisïreenga imeeri chúxapatiichani jingoni.
3 Ísï jimbo, Judasï jimajkisï niáraspti sondaduechani jingoni, kʼérati saserdotiicheeri kuáriichani jingoni ka fariseuecheeri kuáriichani jingoni. Ka jimajkuksï niáraspti kʼueramu* ka kandela ambe jingoni ka ístu espada ka chkariicha ambe jingoni.
4 Jesúsi tʼuini mítesptia ambe enga úkuarhinchapiringa, jimbosï orhepani niárakuapti ka arhiaspti: “¿Néntsï jámaxaki jirinhantani?”.
5 Ka imeechaksï arhispti: “Jesúsini enga Nasareti anapueka”. Ka ima arhiaspti: “Jiiska”. Ka Judasï, ima enga traisionariipka, imajtu imeecha jingoni jámaxapti.
6 Ka enga Jesúsi arhiapka “Jiiska”, imaksï tátsepanisï niraspti ka méntkuksï jiniani andatseeraspti.
7 Ísï jimbo, ménderu kurhamarhiaspti: “¿Néntsï jámaxaki jirinhantani?”. Ka imeechaksï arhispti: “Jesúsini enga Nasareti anapueka”.
8 Jesúsi arhiaspti: “Arhiskaksïnia eskani jiiska. Ka engajtsïni jíndeni jámani jaka jirinhantani, jiájkani jurajkua je ini achamasïichani paraksï níntani”.
9 I ambe úkuarhispti paraka ísï úkuarhipiringa eska na uandapka ima: “No ma tsïtaska engareni tʼu íntsaaka”.
10 Ka Simóni Pedru espada ma kámaxapti, pʼitajtarhaspti ka imani jimbo ataspti sánderu kʼéri saserdotiiri jántspirini ka méntku pʼikueeraspti jurhijkandani anapu kutsïkuani. Ima jántspiri Malku arhinhasïreendi.
11 Joperu Jesúsi arhispti Pedruni: “Inchajtarhantsï indeni espadani. ¿Andi ji no jatsiski para itsïmani indeni kopa engareni Taati íntskuka?”.
12 Jimajkani sondaduecha, sondaduecheeri orhejtsïkuti ka judiuecheeri kuáriichaksï jupikaspti Jesúsini ka jójkusptiksï.
13 Orheta, Anási jingonksï páspti jimboka Kaifásiiri suegru jémbeespka, ka ima sánderu kʼéri saserdotiispti ima uéxurhini.
14 Ka Kaifási jindeespti ima achamasï enga arhiapka judiuechani eska sánderu sésipiringa eska ma achamasï uarhipiringa iámu iretani jimbo.
15 Ka Simóni Pedru ka máteru Jesúsiiri chúxapati, jimajkuksï no iauani chúxapaxapti Jesúsini. Ka ima chúxapati mítespti sánderu kʼéri saserdotini, jimbosï Jesúsi jingoni inchaakupti sánderu kʼéri saserdotiiri kʼumanchikuarhu ka ekuarku pakaraspti.
16 Joperu Pedru uérakua pakaraspti, puertarhu jamukuteni. Ka Jesúsiiri chúxapati, ima enga mítepka sánderu kʼéri saserdotini, uéakuspti para uarhiiti jingoni uandontskuarheni enga puertarhu jarheenga ka inchaataspti Pedruni.
17 Jimajkani uarhiiti enga jántspiriipka ka enga puertarhu jarheenga, arhispti Pedruni: “¿Andi tʼujtu no jámasïreeni indeni achamasïni chúxapani?”. Ka Pedru arhispti: “Nómbe, no jiiska”.
18 Jántspiriicha ka kuáriichaksï turhiri jingoni kurhikaspti, jimboka kánikua tsʼirakuarhixapka ka jimaksï jarhaspti jorhentani. Pedrujtu imeecha jingoni jorhentaxapti.
19 Kʼéri saserdoti* ueenaspti mámaru ambe kurhamarhini Jesúsini, imeeri chúxapatiicheeri ambe ka imeeri ambe enga xáni jorhentpienga.
20 Jesúsi arhispti: “Ji iáminduechani japarini jorhentpiska ka méntkisï jorhentpisïreenga jima engaksï judiuecha tánguarhijka para Tata Diosïni kómarhini ka templurhu, jima engaksï iámindu judiuecha tánguarhijka ka no méni sïpatikuarku uandaska ambe ma.
21 ¿Andirenisï jíndeni kurhamarhini jaki? Imeechani kurhamarhia engajtsïni kurhachakuka. Jiminksï jarhasti, indeechaksï sési mítesti ambe engani uandaka”.
22 Ka kuári ma kurhaaspti enga Jesúsi ísï uandapka, ka jimajku páksanharhikuspti ka arhispti: “¿Andiresï ísï mókukujki kʼéri saserdotini?”.
23 Jesúsi arhispti: “Engani no sési ambe uandaka, arhireni* ambe no sési uandaski; joperu enga ísïika ambe engani uandaka, ¿andirenisï atajki?”.
24 Tátsekua Anási jójkuspti ka Kaifásini axakuspti, ima enga sánderu kʼéri saserdotiipka.
25 Enga jiniani ísï úkuarhini japka, Simóni Pedru útasï jima jorhentaxapti anhandetini. Jimajkani kurhamarhisptiksï: “¿Andi tʼujtu no jámasïreeni imani chúxapani?”. Ima uandaspti eska nómbe. Uandaspti: “Nómbe, no jiiska”.
26 Sánderu kʼéri saserdotiiri jántspiri ma enga parientiipka ima acheetiiri enga Pedru kutsïkua pʼikupka, arhispti Pedruni: “¿Andi no tʼuespi engari imani jingoni jámani japka tarhekatarhu? Jíkeni jima exespka”.
27 Joperu Pedru ménderu uandaspti eska no ísïispka ka jimajku pirespti tʼarhechu ma.
28 Jimajkani pásptiksï Jesúsini juramutiiri kʼumanchikuarhu, Kaifásiiri kʼumanchikuarhu uératini, útasï xarhentkuespti, joperu imeechaksï no inchaspti juramutiiri kʼumanchikuarhu paraksï pímbinhasï jarhani ka únksï Paskueri tʼirekuani arhani.
29 Jimbosï Pilatu uérapti ka niraspti arhiani imani kʼuiripuechani: “¿Ambe no sési úski i achamasï?”.
30 Arhisptiksï: “Enga i achamasï no ma ambe no sési úpiringa, juchaksïni no tʼungini juáchepiringa”.
31 Ísï jimbo, Pilatu arhiaspti: “Pánta je ka ísï jusgari je eska chaari lei na uandajka”. Ka judiuechaksï arhispti: “Jucha no sésikua jatsiska uándikuni nemani”.
32 I ambe ísï úkuarhispti paraka úkuarhipiringa ísï eska Jesúsi na uandarini japkia eska uarhipiringa.
33 Pilatu ménderu inchantaspti juramutiiri kʼumanchikuarhu, uandajpaspti Jesúsini ka kurhamarhispti: “¿Tʼu jindeeski judiuecheeri juramuti?”.
34 Jesúsi arhispti: “¿Sési jimborisï uéjki míteni okeni nema aianguski juchiiti ambe?”.
35 Ka Pilatu arhispti: “¿Andi ji judiueski? Chiiti iretarhu anapuecha ka kʼérati saserdotiichaksïnisï juáti jíndeni jingoni. ¿Amberi úski?”.
36 Jesúsi arhispti: “Juchiiti Reinu no ini parhakpini anapuesti. Enga juchiiti Reinu ini parhakpini anapuepiringa, juchiiti chúxapatiichaksï uarhipepirindi parani ji no judiuecheeri jájki jimbo jurajkunhani. Joperu juchiiti Reinu no ixú anapuesti”.
37 Ísï jimbo, Pilatu kurhamarhispti: “¿Jiájkani, tʼu juramutiiski?”. Jesúsi arhispti: “Jo, tʼuri mismu uandaxaka eskani ji juramutiiska. Ísï jimbosïni andajpenuka ka ísï jimbosïni juka parhakpinirhu: parani uandantani jurhimbikua ambe. Ima enga tsitijka jurhimbikua ambe, kurhajchasïndireni”.
38 Pilatu kurhamarhispti: “¿Ambeeski jurhimbikua ambe?”.
Enga na ísï arhipkia, ménderu uéraspti ka arhiaspti judiuechani: “Para ji, i achamasï no ma ambe no sési ústi.
39 Chaari pʼindekua jindeesti eskani Paskueri kʼuínchikua jimbo, ji jurajkuaka kʼuiripuni ma enga ónhakuarhetini jaka. ¿Uékasïntsï eskani jurajkuaka judiuecheeri juramutini?”.
40 Imaksï ménderu uinhachaspti: “¡Nómbe, asï jáma indeni jurajkuni! ¡Barrabásini jurajku!”. Ka Barrabási sïpani jámasïreendi.
