Juanu 19:1-42
19 Jimajkani Pilatu uandaspti eskaksï pápiringa Jesúsini paraksï kʼuikirhini.
2 Ka sondaduechaksï korona ma tepekuspti chekamikua ambe jingoni ka jatsijtsïkusptiksï ka tátsekuaksï takusï moradu ma jatsikuntaspti.
3 Ka engaksï andarhiereenga, uandasïreendiksï: “¡Nári erandeski judiuecheeri juramuti!”. Ka ístuksï páksanharhikusïreendi.
4 Pilatu ménderu uéraspti ka arhiaspti kʼuiripuechani: “¡Exe je! Ixúani juáska paraksïni arhini eska para ji, i achamasï no ma ambe no sési ústi”.
5 Ísï jimbo, Jesúsi uéraspti korona jukarini enga chekamikua ambe jingoni úkata japka ka takusï moradu jukarini. Ka Pilatu arhiaspti: “¡Exe je ini achamasïni!”.
6 Joperu engaksï kʼérati saserdotiicha ka kuáriicha exepka, uinhachasptiksï: “¡Chkarirhu ma cháparhata! ¡Chkarirhu ma cháparhata!”. Ka Pilatu arhiaspti: “Pántsï je ka chá uándiku je,* jimboka para ji, i achamasï no ma ambe no sési ústi”.
7 Ka judiuechaksï arhispti: “Jucha jatsiska juramukua ma ka ísï eska na arhijka juchaari juramukua, i achamasï jatsisti para uarhini, jimboka uandasïnga eska Tata Diosïiri uájpeeska”.
8 Ka enga Pilatu ísï kurhajchaapka kʼuiripuechani, sánderu chérakuarhespti
9 ka ménderu juramutiiri kʼumanchikuarhu inchantaspti ka kurhamarhispti Jesúsini: “¿Tʼu nani anapueski?”. Joperu Jesúsi méntku no kurhakuspti.
10 Ísï jimbo, Pilatu arhispti: “¿Nóreni kurhachea? ¿Andi nóri míteski eskani jatsiska juramukua parakeni jurajkuni o parakeni uándikutarkuarhini?”.*
11 Ka Jesúsi arhispti: “Tʼureni no úpiringa indeni ambe úchini engaksïni no auandarhu uératini íntskupiringa juramukua. Ísï jimbo, ima achamasï engareni tʼungini jingoni juáka, sánderu no sési ambe niátasti”.*
12 Jimbosï Pilatu útasï jánguarhintani japti jurajkuni Jesúsini. Joperuksï judiuecha uinhachaspti: “¡Engari jurajkuska, jiájkandi nóri amigu jémbeeska Roma anapu juramutiiri!* ¡Ima enga juramuti úkuarhijka, Roma anapu juramutinisï no janhanharhini jarhajti!”.*
13 Ka enga Pilatu ísï kurhaapka, petaspti Jesúsini ka jima uaxakaspti engaksï juesiicha jarhajka, nani enga tsakapu jatandeka, enga ebreu jimbo arhinhajka Gábbatha.
14 Ima jurhiatikuespti enga iámu ambe listu jatsinheenga para Paskueri kʼuínchikua, teruxutinisïispti.* Ka arhiaspti judiuechani: “¡Exe je! ¡I jindeesti chaari juramuti!”.
15 Joperuksï imeecha uinhachaspti: “¡Kéndita! ¡Kéndita! ¡Chkarirhu ma cháparhata!”. Ka Pilatu kurhamarhiaspti: “Jiájkani, ¿uándikutarkuarhia chaari juramutini?”. Ka kʼérati saserdotiichaksï uandaspti: “Jucha Roma anapu juramutintkusïni* jatsika”.
16 Tátsekua, imeechani jurajkukuaspti paraksï chkarirhu ma cháparhatani Jesúsini.
Ka imaksï pásptia.
17 Jimajkani Jesúsi tarhataspti chkarini enga jindeeka para no sési nitamakuarhini* ka úndaspti xanharani para jima niárani enga Kalabera arhinhajka, enga ebreu jimbo arhinhajka Gólgota.
18 Ka jimaksï cháparhataspti Jesúsini chkarirhu, ka ístuksï tsimani acheetiichani tirhipaaspti máekandachani ka Jesúsi terujkani pakaraspti.
19 Ístu, Pilatu karakata ma karaspti ka chkarirhu jatsikuspti. Jima arhisïreendi: “Jesúsi Nasareti anapu, judiuecheeri juramuti”.
20 Uánikua judiuechaksï arhintaspti imani karakatani jimboka jima uératini enga Jesúsi cháparhatanhapka chkarirhu, no iauani pakarasïreendi ireta. Ístu, inde karakata ebreu jimbo karanhaspti, latini jimbo ka griegu jimbo.
21 Joperuksï judiuecheeri kʼérati saserdotiicha arhispti Pilatuni: “Asï kara ‘Judiuecheeri juramuti’, sánderu sési, kara eska inde uandaska ‘Ji judiuecheeri juramutiiska’”.
22 Ka Pilatu arhiaspti: “Karaskia ka ísï pakaraati”.
23 Ka engaksï na cháparhatapkia Jesúsini chkarirhu, sondaduechaksï pʼíkuspti imeeri xukuparhakuani ka tʼápuruksï arhukuspti jimbokaksï tʼámuespka, ka ístuksï pʼíkuspti imani takusïni* enga Jesúsi jukarini japka. I xukuparhakua no sïrikukata jarhaspti jimboka májku úkata jarhaspka.
24 Ísï jimbo, arhijperasptiksï: “Nóchi karukuaka. Suerte jimbochi exeaka aberi né pakatakuarhia”. I ambe ísï úkuarhispti paraka úkuarhipiringa ísï eska na karakata jaka Karakateecharhu: “Arhukutsperasptiksï juchiiti takusïni ka suerte jimboksï pakatakuarhespti juchiiti xukuparhakuani”. Ka ísïminduksï úspti sondaduecha.
25 Jesúsiiri amamba ka imeeri jingonikua, jimajkuksï jarhaspti enga Jesúsi cháparhatanhapka chkarirhu; ístuksï jima jarhaspti María Klopasi témba ka María Magdalena.
26 Enga Jesúsi exepka eska amamba jimajku no iauani jarhaspka ka ístu imeeri chúxapati enga xáni xéncheenga, arhispti amambani: “¡Nana, iásï inde chiiti uájpeuatia!”.
27 Tátsekua, arhispti imeeri chúxapatini: “¡Iásï inde chiiti naandiuatia!”. Ka jiáni uératini, ima chúxapati chéni jémbo páspti para jima irekani.
28 Tátsekua, míteparini eska iámindu ambe ísï úkuarhispkia, Jesúsi uandaspti: “Kʼarhichaxaka”. Ka ísï niáraspti úkuarhini ambe enga arhijka Karakateecharhu.
29 Ka jimboka jima jarhaspka jatakua ma enga uinirini japka binu xarhipiti, pʼíkusptiksï xurhata ma ka binu xarhipitirhuksï inchamaspti ka pʼatamu* ma jimboksï jatsirhukuspti ka pímutasptiksï Jesúsini.
30 Enga Jesúsi tsʼémupka binu xarhipitini, uandaspti: “¡Úkuarhistia iámindu ambe!”. Tátsekua tʼénksataspti éjpuni ka uarhispti.*
31 Judiuechaksï niraspti arhini Pilatuni eska kuarhajtakuapiringa imani achamasïichani ka eska késkuantapiringa jimboka ima jurhiatikua iámindu ambe listu jatsinhasïreenga para sábadu jurhiatikua ka nóksï uékasïreendi eskaksï uarhiriicha chkarirhu pakarapiringa tirhipakuarhetini sábadu jurhiatikua jimbo —jimboka ima sábadu, sábadu kʼéripiringa—.
32 Ísï jimbo, sondaduechaksï niraspti ka kuarhajtakusptiksï imani achamasïni enga orhetku japka ka ístu máteru achamasïni enga Jesúsiiri máekandu jimbo tirhipakuarhetini japka.
33 Joperu engaksï Jesúsini andarhierapka, exesptiksï eska ima tʼuini uarhispkia, jimboksïsï no kuarhajtakupti.
34 Joperu sondadu ma lansa ma jimbo ataspti tsirinirisï ka jirejiresï iurhiri ka itsï uéraspti.
35 Ka ima enga exeka, uandantasti ini ambe ka ambe enga uandantajka jurhimbikua ambeesti, ka ima mítesti eska jurhimbikua ambesï uandantajka parajtsï chájtu jakajkuni.
36 Ka i ambe ísï úkuarhisti paraka niárapiringa úkuarhini ambe enga karakata jaka Karakateecharhu: “Nóksï ma úni kuarhakukuati”.*
37 Ka ístu karakata jarhasti Karakateecharhu: “Exeatiksï imani engaksï lansa jimbo ataka”.
38 Ísï tátsekua, José Arimatea anapu, niraspti kurhamarhini Pilatuni sini úpirini pántani Jesúsiiri kuerpuni ka Pilatu jiárhitaspti. Ísï jimbo, jurhaspti ka pántaspti Jesúsiiri kuerpuni. —I achamasï sïpatikuarku jámasïreendi Jesúsini chúxapani jimboka chérhiasïreenga judiuechani—.
39 Ístu jima niáraspti Nikodemu, ima achamasï enga ma xanhari nípka exeni Jesúsini chúrikua jimbo. Páspti ma 30 kilu* mirra, uitsakua jingoni jeuetakata* enga sési jájkundejka.
40 Késkuntasptiksï Jesúsiiri kuerpuni ka atarhisptiksï uitsakua enga sési jájkundejka ka linueri takusï jingonksï irhirespti, ísï eskaksï judiuecha na pʼindeka uarhiriichani jatsiantani.
41 Ka jima enga Jesúsi chkarirhu cháparhatanhapka, tarhekata ma jarhaspti ka imani tarhekata jimbo, jimbanhi tumba ma jarhaspti nani enga nótki nema peeranhani japka.
42 Ka jimboka ima jurhiatikua judiuechaksï iámindu ambe listu jatsisïreenga para sábadu jurhiatikua, ka jimboka jima no iauani jarhaspka ima tumba, ísï jimboksïsï jima jatsintapti Jesúsini.
Notecha
^ O “chá cháparhata je chkarirhu”.
^ O “parakeni chkarirhu ma cháparhatani”.
^ O “sánderu pekariisti”.
^ Griegu jimbo: “Sésariiri”. Ísïksï arhiasïreendi máru Roma anapu juramutiichani.
^ O “no sési arhini jarhajti”.
^ Griegu jimbo: “jindeespti ora para sáno seisi úni jámani”.
^ O “Sésarintkusïni”.
^ Exe je Glosario, chkari enga jindeeka para no sési nitamakuarhini.
^ O “tánhikuani”.
^ Exe je Glosario, pʼatamu.
^ O “últimu jirejtaspti”. Griegu jimbo: “íntspintaspti imeeri espirituni”.
^ O “No ma úni kuarhakukateuati”.
^ Griegu jimbo: “ma 100 libra”.
^ O jamberi “irhikukata”.
