Juanu 2:1-25
2 Ísï tanimu jurhiatikua jimbo, tembuchakua ma úkuarhispti Kaná enga Galilea jaka ka jima jámaxapti Jesúsiiri amamba.
2 Ístuksï pʼímarhiaspti tembuchakuarhu Jesúsini ka imeeri chúxapatiichani.
3 Enga xánkueni japkia binu, Jesúsiiri amamba arhispti: “Xánkuestia binu”.
4 Joperu Jesúsi arhispti: “¿Nana, ka jucha ambeia?* Nótkirini niárachexati jandora”.
5 Jesúsiiri amamba arhiaspti imeechani engaksï kéntpini jámani japka: “Ú je iámindu ambe engaksïni inde arhiaka”.
6 Ka seisi jatakuechaksï jarhaspti tsakapueri engaksï itsï jatsiranheenga. Jimaksï jarhaspti paraksï kʼuiripuecha jima jupajkukuarheni ante deksï tʼireni, ísï eskaksï judiuecha na pʼindeka úni. Mándani jatakua jimbo, tsimani o tanimu medida jatasïreendi itsï.*
7 Jesúsi arhiaspti: “Uiniraa je itsï ini jatakuechani”. Ka imeechaksï sési uiniraaspti.
8 Tátsekua arhiaspti: “Pʼita je sáni ka ní je pákuni imani enga tembuchakueri ambe exeni jaka”. Ísï jimbo, imeechaksï niraspti pákuni.
9 Enga ima kʼuiripu enga tembuchakueri ambe exeni japka tsʼémupka imani itsïni enga binu úkuarhintapka, ióarhispti nobiuni jimboka no mítespka nani uéraspi binu —joperu jántspiriicha engaksï itsï pʼitapka, imaksï kʼóru mítespti nani uéraspi binu—
10 ka arhispti: “Iámindu kʼuiripuechaksï orheta ambakiti binu jatsiratspesïndi, ka tátsekua enga na kauinhajkia imani binuksï jatsiratspesïndi enga no káni áspijka. Joperuri tʼu patsaska sánderu ambakiti binu parari últimu jatsiratspeni”.
11 Ambe enga Jesúsi úpka ireta Kaná enga Galilea jaka, jindeespti imeeri primeru milagru. Ísï úparini xarhataspti eska ima kánikua uinhapitiispka ka imeeri chúxapatiichaksï mintsikaspti imani.
12 Enga na i ambe úkuarhipkia, Kapernaúmi kétsemuspti amamba jingoni, ermanu jémbeechani jingoni ka imeeri chúxapatiichani jingoni. Joperuksï máru jurhiatikuajkusï jima pakarapti.
13 Enga na sánderku kueratani japkia paraksï judiuecha úntani Paskuani, Jesúsi Jerusaléni karhamaspti.
14 Templurhu exeantaspti imani kʼuiripuechani engaksï ueechani, karichiichani ka palomasïichani íntspikuarhiani japka ka ístuksï jima uaxakatixapti imeecha engaksï sentabu mójtakuenga.
15 Ísï jimbo, sïndari ma pʼíkuspti* ka indeni jimbo petaantaspti iáminduechani templurhu uératini. Ístu petaantaspti karichiichani ka ueechani, ka imeechani engaksï sentabu mójtakuenga kʼuaniaskakuaspti sentabuni ka menonhakuaspti meseechani.
16 Ka imeechani engaksï palomasïichani íntspikuarhiauenga, arhiaspti: “¡Kéndita je iámu ambe ixú uératini! ¡Ásteru jáma jeia íntspikuarhini* juchiiti Taatiiri kʼumanchikuarhu!”.
17 Imeeri chúxapatiichaksï míjpaaspti* ambe enga karakata jaka: “Jimbokani xénchasïnga chiiti kʼumanchikuani, ísï pʼikuarheraaka enajkini tixanhini* jaki juchiiti mintsitarhu”.
18 Engaksï judiuecha ini ambe exepka, kurhamarhisptiksï: “¿Ambejtsïni uaa exerani parachi jucha exeni eskari juramukua jatsiska parari ini ambe úni?”.
19 Jesúsi arhiaspti: “Xerenta je templuni ka ji tanimu jurhiatikua jimbo úntaaka”.
20 Jimajkani judiuechaksï arhispti: “I templu 46 uéxurhini jimbo únhasti, ¿ka tʼuri uandasïni eskari tanimu jurhiatikua jimbojku uaaka ménderu úntani?”.
21 Joperu enga Jesúsi templueri ambe uandapka, imeeri kuerpunisï arhikuekani japti.
22 Enga Jesúsi tsítanhantapka,* imeeri chúxapatiichaksï miántaspti eska ima ísï uandasïreenga ka ístuksï jakajkuspti ambe engaksï karakateecha uandeenga ka ístu ambe enga Jesúsi uandapka.
23 Ka enga Jesúsi Jerusaléni nípka para Paskueri kʼuínchikuani úntani, uánikua kʼuiripuechaksï mintsikaspti imani jimbokaksï exeasïreenga imani milagruechani enga ima uaauenga.
24 Joperu Jesúsi no kánikua mintsikaasïreendi imeechani, jimboka iáminduechani sési míteaspka
25 ka no nema jatsispti para aianguni na jásïispi kʼuiripu ma, jimboka ima mítetixapkia ambe engaksï kʼuiripuecha jatsipka imeecheeri mintsitarhu.
Notecha
^ Griegu jimbo, i uandakuechaksï úrakuarhisïreendi para uandani eska nómbe. Enga ixú arhijka nana, no arhikuekasïndi eska no janhanharhixapka amambani.
^ Jamberi batu arhinheendi ima medida engaksï úreenga para itsï ambe tsʼéritani ka xániispti 22 litru (5,81 galoni).
^ O “sïndariiri kʼuikirpetarakua ma úkuarhispti”.
^ O “negosiu ambe úni”.
^ O “miántaspti”.
^ O “enajki érhuni”.
^ Griegu jimbo: “jauatanhantapka”.
