Juanu 21:1-25
21 Enga na ísï úkuarhipkia, Jesúsi ménderu xarhakuaspti imeeri chúxapatiichani Tiberíadesi anapu marirhu uanamukutenisï. Arisï xarhakuaspti.
2 Jimaksï jarhaspti Simóni Pedru, Tomási —ima engaksï arhienga Jemelu—, Natanaeli Kaná anapu enga Galilea jaka, Sebedeu uájpeecha ka máteru tsimani chúxapatiicha.
3 Simóni Pedru arhiaspti: “Nipa ji kurucha pʼitamaani”. Ka imeechaksï arhispti: “Juchajtuchi niuaka tʼungini jingoni”. Ísï jimbo, nirasptiksï barkurhu jatani, joperuksï no ma kurucha pʼitamaspti ima chúrikua.
4 Enga na erandepkia, Jesúsi marirhu uanamukuteni jarhaspti, joperu imeeri chúxapatiichaksï no mítentaspti.
5 Jimajkani Jesúsi arhiaspti: “Juchiiti uátsïtiicha, nójtsï ambe ma* kámaxaka para arhani, ¿a no?”. Ka imeechaksï arhispti: “Nómbe”.
6 Ka Jesúsi arhiaspti: “Jatsima je kurucha pʼitamatarakuani* barkurhu jurhijkandani jimbo, jiminksï jatamesti kurucheecha”. Engaksï na jatsimapkia, nóteruksï jamberi úxaptia pʼímantani jimboka uánikua kurucheechanksï jupiaspka.
7 Jimajkani ima chúxapati enga Jesúsi xáni xéncheenga, arhispti Pedruni: “¡Tateesti!”. Enga Simóni Pedru kurhaapka eska Tateespka, seguiriispti takusï jukantani,* jimboka patsïki jásï* jámaxapka ka marirhu kʼuanimespti.
8 Joperu máteru chúxapatiichaksï barku sapichu ma jimbo antsikupaspti kurucha pʼitamatarakuani engaksï uinirini japka kurucheecha, jimbokaksï no iauani jámaxapka inchametini; ma 90 metrisï* iauanksï jámaxapti.
9 Engaksï na andantapkia, exesptiksï eska kurucha jatajpetixapka turhirirhu, ka eska ístu kurhinda jarhaspka.
10 Ka Jesúsi arhiaspti: “Jua je máru kurucheechani engajtsï iáiasï pʼitamaaka”.
11 Ísï jimbo, Simóni Pedru barkurhu jataspti ka marirhu uanamukutenisï antsimaspti kurucha pʼitamatarakuani engaksï uinirini japka kʼérati kurucheecha: 153 kurucheechanksï pʼitamaaspti. Joperu kurucha pʼitamatarakua no karukurhispti nájkirukaksï xáni uánikua kurucheechani pʼitamaapka.
12 Jesúsi arhiaspti: “Ju je tʼireni”. Ka no nema tekaasïreendi kurhamarhini: “¿Neeskiri tʼu?”, jimbokaksï mítespka eska Tateespka.
13 Jesúsi andarhieraaspti, pʼíkuspti kurhindani ka intsïtaaspti ka ístu pʼíkuspti kuruchani ka imantu íntsaaspti.
14 Ini jingoni, tanimu xanharisptia enga Jesúsi xarhakuapka imeeri chúxapatiichani enga na tsítanhantapkia.*
15 Engaksï na kʼamarapkia tʼireni, Jesúsi kurhamarhispti Simóni Pedruni: “Simóni, Juanu uájpa, ¿sánderureni xénchasïni jíndeni eska iichani?”. Ima arhispti: “Jo, Tata, tʼuri míteska eskakeni uékasïnga”. Jesúsi arhispti: “Jiájkani tʼireraa juchiiti karichiichani”.
16 Ka Jesúsi ménderu kurhamarhispti, ini jingoni tsimani xanhariisptia: “Simóni, Juanu uájpa, ¿tʼureni xénchasïni?”. Ima arhispti: “Jo, Tata, tʼuri míteska eskakeni uékasïnga”. Jesúsi arhispti: “Jiájkani tʼu eranguani ja juchiiti karichi sapirhatiichani”.
17 Ka Jesúsi ménderu kurhamarhispti, ini jingoni tanimu xanhariisptia: “Simóni, Juanu uájpa, ¿tʼureni uékasïni?”. Pedru kómu pʼikuarheraspti jimboka tanimu xanhariispkia enga Jesúsi kurhamarhipka “¿Tʼureni uékasïni?”. Ísï jimbo, arhispti: “Tata, tʼuri iámindu ambe míteska; tʼuri míteska eskakeni uékasïnga”. Ka Jesúsi arhispti: “Jiájkani tʼireraa juchiiti karichi sapirhatiichani.
18 Jíkeni sési jimbo arhisïnga eska engari sapichku japka, tʼuri jandiajku mórhekuarhisïreenga ka nani uéjkisïri jámasïreenga; joperu engari jatiriuakia, ióxurhantaakari ka máteru nemakini mórhetaati ka jimeesïsïksïni páati nani engari no uékaaka nirani”.
19 Ísï uandaparini, arhikuekaxapti na enga uarhipiringa Pedru ka eska imeeri uarhikua jimbo, kʼéri ambe arhipiringa Tata Diosïni. Ka tátsekua arhispti: “Seguirireni chúxapuni”.
20 Jimajkani Pedru pʼirhikuarhispti ka exespti eska jima jurhaxapka ima chúxapati enga Jesúsi xáni xéncheenga, ima enga andanharhikuerapka Jesúsini jiáni engaksï senarini japka ka enga kurhamarhipka: “Tata, ¿nékini traisionariua?”.
21 Ísï jimbo, enga Pedru exepka, kurhamarhispti Jesúsini: “Tata, ¿ka i ambe úkuarhinchaia?”.
22 Jesúsi arhispti: “Engani ji uékaaka eska inde ixú jauaka asta jiáni engani ji juuaka, ¿tʼungini ambeia? Tʼureni seguirii chúxapuni”.
23 Ísï jimbo, erachiichaksï* ueenaspti uandani eska ima chúxapati no uarhipiringa. Joperu Jesúsi no arhispti eska no uarhipiringa. Sánderu sési, Jesúsi uandaspti: “Engani ji uékaaka eska inde ixú jauaka asta jiáni engani ji juuaka, ¿tʼungini ambeia?”.
24 Inde chúxapatisï uandantani jati ini ambe ka ístu karantasti ka míteskachi eska jurhimbikua ambesï uandantajka.
25 Ka mámaru ambeteru jarhasti enga Jesúsi úka, ka enga ma jurhiani karanhapiringa iámindu ambe, ji exejka eska no jatanhepiringa iámu parhakpinirhu xáni uánikua karakateecha* engaksï karanhapiringa.
Notecha
^ O “nójtsï ma kurucha”.
^ O “cheremakuani”.
^ O “jónguarhini”.
^ O “sáno patsïki jásï”.
^ Ma 300 piesisï. Griegu jimbo: “ma 200 kodisï”.
^ Griegu jimbo: “jauatanhantapkia”.
^ O “ermanuechaksï”.
^ O “roiuecha”.
