Juanu 5:1-47
5 Ísï tátsekua, judiuechaksï kʼuínchikua ma úntaspti ka Jesúsi Jerusaléni karhamaspti.
2 Ka Jerusaléni kʼéri pila ma jarhasti enga ebreu jimbo arhinhajka Betsata, jima máekandu jarhasti enga arhinhajka Karichiicheeri Puerta. Jima enga pila jaka sinko portaliichaksï jarhasti.
3 Ka jima, uánikua kʼuiripuechaksï jarhaspti engaksï pʼamenchani japka, engaksï no ueenga exeni, engaksï rengejteenga ka ístu ima kʼuiripuecha engaksï no ueenga jájki o jantsiri ambe manatani.
4 *
5 Ka jima jarhaspti acheeti ma enga 38 uéxurhini páni japkia pʼamenchani.
6 Enga Jesúsi exepka ini acheetini jima apondetini jarhani ka míteparini eska ióni pʼamenchaspkia, kurhamarhispti: “¿Uékasïndi sési pʼikuarherantani?”.
7 Acheeti arhispti: “Tata, no nema jarhasti engareni uaaka jarhuatani pilarhu inchameni jiáni enga itsï manamijka, engani nirani jarhajkia inchameni, máteru nema tʼuini inchamesïndia”.
8 Jesúsi arhispti: “Jauara, tarhata chiiti kʼuírakuani ka ueenia xanharani”.
9 Ima achamasï jirejiresï ambakentaspti, tarhataspti imeeri kʼuírakuani ka ueenaspti xanharani.
Ima jurhiatikua sábaduespti.
10 Ísï jimbo, judiuechaksï úndaspti arhini imani acheetini enga ambakeranhantapka: “Iásï sábaduesti. No sési jarhasti engari ísï páni jaka chiiti kʼuírakuani”.
11 Acheeti arhiaspti: “Ima achamasï engareni ambakerantaka, arhistirini ‘Tarhata chiiti kʼuírakuani ka ueenia xanharani’”.
12 Imeechaksï kurhamarhispti: “¿Neeski ima achamasï engakeni arhika ‘Tarhatia ka ueenia xanharani’?”.
13 Joperu acheeti no mítespti nésï ambakerantapi, jimboka uánikua kʼuiripu jámaxapka ka ima no jamberi erangueraspti Jesúsini.
14 Ísï tátsekua, Jesúsi templurhu exentaspti ka arhispti: “Exe, ambakentaskaria. Ásteru jámia no sési ambe niátani parari no sánderu no sési ambe úkuarhinchani”.
15 Acheeti niraspti aianguani judiuechani eska Jesúsisï ambakerantapka.
16 Jimboksïsï judiuecha no sési ambe uékeendi úkuni Jesúsini jimboka ima sábadu jurhiatikua jimbo úsïreenga ini ambe.
17 Joperu Jesúsi arhiasïreendi: “Juchiiti Taati iásï jamberi útasï ánchikuarhixati ka jíjtuni útasï ánchikuarhixaka”.
18 Ísï jimbo, judiuechaksï sánderu jánguarhintaxaptia para uándikuni, jimbokaksï eratsesïreenga eska ima no janhanharhisïreenga sábadu jurhiatikuani ka jimbokanha uékasïreenga eskaksï kʼuiripuecha eratsepiringa eska ima májkueniispka eska Tata Diosï jimboka uandasïreenga eska Tata Diosï imeeri Taati jémbeespka.
19 Jimajkani Jesúsi arhiaspti: “Jíksïni sési jimbo arhisïnga eska Uájpa no ísku pʼitsïkuarhisïnga úni ambe ma, imani ambejkusï újti ambe enga Taatini exejka úni. Jimboka ambe enga xáni újka Taati, Uájpajtu májkueni úsïndi.
20 Jimboka Taati xénchasïnga Uájpani ka jorhendasïndi ambe enga ima xáni újka ka útasï sánderu kʼéri ambe jorhendaati parakajtsï chá ísku pakaraaka.
21 Jimboka ísï eska Taati na tsítantaajka* uarhiriichani ka tsípikua íntsaani, Uájpajtu tsípikua íntskusïndi néni enga ima uékaaka íntskuni.
22 Jimboka Taati méntku no nemani jusgarisïndi, sánderu sési, Uájpani mintsinharhisti ka imani arhisti para kʼuiripuechani jusgariuani,
23 paraksï iáminduecha janhanharhini Uájpani ísï eskaksï na janhanharhijka Taatini. Ima enga no janhanharhijka Uájpani, no janhanharhini jarhasïndi Taatini, imani enga Uájpani axaka.
24 Jíksïni sési jimbo arhisïnga eska ima enga kurhaajka ambe engani ji uandajka ka jakajkuni imani engareni axaka, jatsisti tsípikua para méntkisï ka no jusgarinhaati,* sánderu sési, ísïisti komueska ima kʼuiripu enga uarhirini japka ka iásï tsípiti jarhania.
25 ”Jíksïni sési jimbo arhisïnga eska niáraaka ima jandora —jo, niárastia— engaksï uarhiriicha kurhachakuaka Tata Diosïiri Uájpani, ka imeecha engaksï kurhajchaka, jatsiatiksï tsípikua.
26 Jimboka ísï eska Taati na jatsika tsípikua,* ístu sésikua íntskusti Uájpani para imajtu tsípikua jatsini.
27 Ka juramukua íntskusti para jusgariuani kʼuiripuechani jimboka ima jindeeska Achamasïiri Uájpa.
28 Asï eratsentani pakara je ini ambe jimbo, jimboka niáraaka ima jandora engaksï iámindu imeecha engaksï tumbeecharhu jaka,* kurhachakuaka
29 ka uéntaatiksï: imeecha engaksï ambakiti ambe úka, tsíntaatiksï paraksï irekani; ka imeecha engaksï no sési ambe niátaka, tsíntaatiksï paraksï jusgarinhani.
30 Ji no ísku jatini pʼitsïkuarhisïnga parani úni ambe ma. Ísï eskani na kurhajchajka Taatini, ísïsïni jusgarpijka ka sési jusgarpisïnga jimbokani no uékasïnga úni ambe engani ji uéjka, sánderu sési, úsïnga ambe enga uéjka ima engareni axaka.
31 ”Engani jíjkuni aianguapiringa kʼuiripuechani juchiiti ambe, imeechajtsïni no jakajkuchepirindi.
32 Joperu jarhasti máteru nema enga aianguajka kʼuiripuechani juchiiti ambe ka ji míteska eska ísïiska ambe enga ima uandantajka juchiiti ambe.
33 Chájtsï axaaska máru kʼuiripuechani paraksï Juanuni kurhamarhini ka ima jurhimbikua ambe uandantasti.
34 Ji no uétarhinchasïnga eska máteru nema uandantani jauaka juchiiti ambe, joperuni ini ambe uandaxaka parajtsï chá pʼímutantskata uérani.
35 Inde achamasï ísïispti komueska kandela* ma enga tixarani* japka ka enga tʼíntskeenga, ka chájtsï uékaska ma tiempu kánikua tsípini imeeri tʼíntskua jimbo.
36 Joperu ambe engani ji uandantajka, sánderu jukaparhakuesti eska ima ambe enga Juanu uandanteenga, jimboka i ambe engani ji úni jaka, ima ambeesti engareni juchiiti Taati arhika eskani uaaka ka i ambe xarhatasïndi eskarini Taati axaska.
37 Ka Taati, ima engareni axaka, imasï uandantati juchiiti ambe. Ka chájtsï no méni kurhachakuxaka ka nijtujtsï méni exeni jaki na enga jáxeka ima
38 ka chájtsï no jatsiska imeeri uandakuani chaari mintsiteecharhu jimbokajtsï no jakajkusïnga imani enga ima axaka.
39 ”Chájtsï sési jorhenguarhisïnga ambe engaksï Karakateecha arhijka, jimbokajtsï eratsesïnga eskajtsï ísï uaaka jatsini tsípikua para méntkisï, joperu jiminisï uandajti juchiiti ambe.
40 Ka chájtsïni no uékasïnga jíndeni andarhierani parajtsï tsípikua jatsini.
41 Ji no uékasïnga eskajtsïni kʼuiripuecha kʼéri ambe arhini jauaka.
42 Joperuni kʼóru sési mítetixaka eskajtsï chá no sáni xénchasïnga Tata Diosïni.
43 Ji jurhaska jimbokarini juchiiti Taati axaska ka chájtsïni no jiókasïnga. Joperu enga máteru nema jutsïkuarhepiringa imantsï kʼóru sési jiókapiringa.
44 ¿Ka nénajtsïni jakajkuchia chá engajtsï jiókuarhijka eskaksïni kʼuiripuecha kʼéri ambe arhiaka, ka jinijtsï no jánguarhintani paraksïni jaiapanhentani* ima máechakua Tata Diosï enga jaka?
45 Asï eratsi je eskani ji aianguaka juchiiti Taatini ambe engajtsï chá no sési úni jaka. Moisésisï aianguni jati ambe engajtsï no sési úni jaka, ima engajtsï chá mintsikajka.
46 Joperu engajtsï chá jakajkukupiringa Moisésini, ístujtsïni jakajkuchepiringa jíndeni, jimboka ima juchiiti ambe karaska.
47 Joperu engajtsï chá no jakajkujka ambe enga ima karaka, ¿nénajtsï jakajkua ambe engani ji uandajka?”.
Notecha
^ Exe je ambe enga arhijka nota enga Mateu 17:21 jimbo jaka.
^ Griegu jimbo: “jauataantajka”.
^ O “kastigarinhaati”.
^ O “uinhapikua para tsípikua íntspini”.
^ O “tumbeecharhu jaka nani enga jatsinhantajka kʼuiripu ma para no mirikurhinhani”.
^ O “lámpara”.
^ O “érhuni”.
^ Griegu jimbo: “kʼéri ambe arhini”.
