Juanu 6:1-71
6 Enga na úkuarhipkia i ambe, Jesúsi Galilea anapu marirhu parhimespti, o Tiberíadesi anapu, para jiniani parhikuteni niárani.
2 Ka uánikua kʼuiripuechaksï chúxapaxapti jimboka kʼuiripu exeasïreenga imani milagruechani enga ima uaauenga para ambakeraantani pʼamenchatiichani.
3 Ísï jimbo, Jesúsi juáta ma jimbo karhamaspti ka jima uaxakaspti imeeri chúxapatiichani jingoni.
4 Ka nóteru ióni kuerataxaptia paraksï judiuecha úntani Paskueri Kʼuínchikuani.
5 Enga Jesúsi exepka eskaksï uánikua kʼuiripuecha jurhaxapka andarhierani, arhispti Felipeni: “¿Nanichi piaa kurhinda para ini kʼuiripuni tʼirerani?”.
6 Ísï arhispti para exeni ambe úpirini Felipe, jimboka Jesúsi tʼuini mítespkia ambe enga úpiringa.
7 Felipe arhispti: “Engachi piápiringa kurhinda 200 moneda plateeri jimbo,* no jamberi andangupirindi paraksï kʼuiripuecha sánhanitu arhani”.
8 Ka Andrési, Simóni Pedrueri ermanu jémba, enga imeeri chúxapatiipka, arhispti:
9 “Ixú jarhasti tataka sapichu ma enga sinko kurhinda sebadeeri kámani jaka ka tsimani kurucha sapirhatiichani. Joperu i méntku no andanguati para xáni uánikua kʼuiripuechani tʼireraani”.
10 Jesúsi uandaspti: “Arhi je kʼuiripuni eskaksï uaxakaaka”. Ka jimaksï uaxaakuspti jimboka kánikua uitsakua jukaspka. Ma 5 mili achamasïichaksï jarhaspti jima.
11 Jesúsi pʼíkuspti kurhindani ka enga na diosmaiamukua arhipkia Tata Diosïni, íntskuaspti imeechani engaksï jima uaxaakupka; májkueni úspti kurucha sapirhatiichani jingoni ka iáminduechaksï arhaspti na engaksï xáni uékapka arhani.
12 Engaksï na sési uiniarhapkia, Jesúsi arhiaspti imeeri chúxapatiichani: “Tánanta je kurhindani enga pakaraka, paraka no ísku ambendurhikuarhiaka”.
13 Ísï jimbo, tánantasptiksï imani kurhindani enga kʼuiripu no ápka ka 12 tsïkiataksï tánantaspti ima sinko kurhinda sebadeeri.
14 Engaksï kʼuiripuecha exepka ini milagruni enga Jesúsi úpka, ueenasptiksï uandani: “Sési jimbo ísï jindeeti Tata Diosïiri Uandakua Pári* enga jatsipka para jurhani parhakpinirhu”.
15 Jesúsi mítetixapti eskaksï kʼuiripuecha jurhaxapka paraksï afuersa páni ka paraksï juramuti úni, jimbosï kéndikupti ka ménderu juátarhu niraspti jandiajku.
16 Enga chúripkia, Jesúsiiri chúxapatiichaksï kétsemantaspti paraksï marirhu niárani,
17 jatasptiksï barkurhu ka ueenasptiksï marirhu parhimeni paraksï Kapernaúmisï nirani. Pápkʼandesptia ka Jesúsi nótki niántaxapti imeecha jingoni.
18 Ka mari ueenaspti kánikua no sési manamini jimboka uinhamu tarhiaxapka.
19 Engaksï na sinko o seisi kilometrisï* pápkia barkuni, exesptiksï Jesúsini marirhisï xanharani jarhani ka eska barkuni andarhieraxapka ka ueenasptiksï kánikua chéni.
20 Joperu Jesúsi arhiaspti: “¡Asï ché je! ¡Jiiska!”.
21 Jimajkani imeechaksï tsípikua jingoni erokaspti barkurhu ka nóteruksï ióndasptia niárani jima engaksï nirani japka.
22 Ísï pauandikua, ima kʼuiripuecha engaksï jiniani parhikuteni pakarapka marirhu, nóteruksï ma barkuni exespti. Jimboka jima jarhaspka barku sapichu ma, joperu Jesúsi no jataspka indeni barkurhu imeeri chúxapatiichani jingoni, imeeri chúxapatiichajkuksïsï nípti.
23 Jimajkani, máru barkuecha engaksï Tiberíadesi anapuepka, jimaksï no iauani niáraspti nani engaksï kʼuiripuecha kurhinda ápka ísï tátsekua enga Tata na diosmaiamukua arhipkia Tata Diosïni.
24 Ísï jimbo, engaksï kʼuiripuecha exepka eska Jesúsi no jima jarhaspka ka nijtu imeeri chúxapatiicha, jatasptiksï barkuecharhu ka nirasptiksï jirinhantani Jesúsini Kapernaúmisï.
25 Engaksï na exentapkia marirhu parhikuteni, kurhamarhisptiksï: “¿Jorhentpiri,* na jatindi janoski ixú?”.
26 Jesúsi arhiaspti: “Sési jimboksïni arhisïnga eskajtsïni chá no jirinhantasïnga jimbokajtsï milagruechani exeaska, sánderu sési, chájtsïni jirinhantasïnga jimbokajtsï kurhinda arhaska astakajtsï na sési uiniarhapka.
27 Asï ánchikuarhi je para imani tʼirekuani andani enga ambendurhikuarhijka, sánderu sési, ánchikuarhi je para imani tʼirekuani andani enga no ambendurhikuarhijka ka enga íntspijka tsípikua para méntkisï, ima jásï tʼirekuani engaksïni Achamasïiri Uájpa íntskuaka. Jimboka Taati imanisï erakuti para ísï úni, jo, Tata Diosïsï erakuti”.
28 Jimajkani kurhamarhisptiksï: “¿Ambe ka ambesï uéjki Tata Diosï eskachi uaaka?”.
29 Ka Jesúsi arhiaspti: “I ambesï uéjti Tata Diosï: eskajtsï mintsikaaka imani enga ima axaka”.
30 Ka ménderuksï arhispti: “Jiájkani ¿amberi uaa tʼu? ¿Ka náki milagruri uaa parachi jucha exeni ka paraksïni jakajkucheni?
31 Juchaari ióntki anapu parientiichaksï maná tʼirespti desierturhu, ísï eska na karakata jaka: ‘Auandarhu anapu kurhinda jingoni tʼireraaspti’”.
32 Jimajkani Jesúsi arhiaspti: “Jíksïni sési jimbo arhisïnga eskaksïni Moisési no íntskuska auandarhu anapu kurhinda, sánderu sési, juchiiti Taati jindeesti engaksïni íntskuni jaka auandarhu anapu kurhinda enga sési jimboeka.
33 Jimboka kurhinda enga Tata Diosï íntspijka, imeesti enga auandarhu uératini juka ka enga tsípikua íntsaani jaka parhakpini anapuechani”.
34 Ísï jimbo, arhisptiksï: “Tata, uékasïngachi eskajtsïni méntkisï íntskuni jauaka indeeni jásï kurhindani”.
35 Jesúsi arhiaspti: “Ji jindeeska kurhinda enga tsípikua íntspijka. Ima engareni jíndeni andarhieraaka nóteru méni kʼarhimaatia, ka ima engareni jíndeni mintsikaaka nóteru méni kʼarhichaatia.
36 Joperu eskaksïni na arhikia, chájtsï no jakajkusïnga na uéjkijtsïni exeni jarhani.
37 Iámindu imeecha engareni juchiiti Taati íntsaaka, juuatijtsïni andarhierani ka ima engareni juuaka andarhierani, ji méntkisï sési jiókaaka.
38 Jimbokani no jurhaska auandarhu uératini parani úni ambe engani ji uéjka, sánderu sési, parani úni ambe enga uéjka ima engareni axaka.
39 I ambesï uéjti ima engareni axaka: eskani no ma tsïtaaka imani engareni ima íntskuka, sánderu sési, eskani tsítantauaka últimu jurhiatikua jimbo.
40 Jimboka i ambesï uéjti juchiiti Taati: eska ima enga jiókuarhiaka Uájpani ka mintsikani, jatsiaka tsípikua para méntkisï ka ji tsítantaaka últimu jurhiatikua jimbo”.
41 Jimajkani judiuechaksï ueenaspti no sési ambe uandani imeeri ambe, jimboka ima uandaspka “Ji jindeeska kurhinda enga auandarhu uératini juka”.
42 Ka ueenasptiksï uandani: “¿Andi i no José uájpeeski? ¿Andi nóchi míteski taati jémbani ka amambani? Jiájkani, ¿andisï ísï uandajkia iásï ‘Ji auandarhu uératini jurhaska’?”.
43 Ka enga Jesúsi kurhajchaapka, arhiaspti: “Ásteru uandauandamini jaia je.
44 No nemarini úsïndi andarhierani enga no Taatini jimboeuaka, ima engareni axaka; ka ji tsítantaaka últimu jurhiatikua jimbo.
45 Tata Diosïiri Uandakua Páriichaksï karasti: ‘Tata Diosï Jeoba jorhendauati iáminduechani’. Ima enga kurhajchajka Taatini ka jorhenguarhini imeeri ambe, jíndeni andarhierasïndi.
46 No nema exexati Taatini, imajkusï exeti enga jima uératini juka nani enga Tata Diosï jaka; ima kʼóru exesti Taatini.
47 Jíksïni sési jimbo arhisïnga eska ima engareni jíndeni jakajkujka, jatsiaka tsípikua para méntkisï.
48 ”Ji jindeeska kurhinda enga tsípikua íntspijka.
49 Chaari ióntki anapu parientiichaksï maná tʼirespti desierturhu ka uarhistiksï.
50 I jindeesti kurhinda enga auandarhu uératini jurhajka, paraka no uarhiaka ima enga ini kurhindani auaka.
51 Ji jindeeska kurhinda enga tsípiti jaka ka enga auandarhu uératini juka. Enga nema arhaska ini kurhindani, irekaati para méntkisï. Ka juchiiti kʼuiripeta jindeesti ima kurhinda engani íntspiaka paraksï tsípikua jatsini parhakpini anapuecha”.
52 Jimajkani judiuechaksï ueenaspti arhirperani: “¿Andisï i achamasï uandajki eskajtsïni indeeri kʼuiripetani íntskuaka parachi jucha arhani?”.
53 Ísï jimbo, Jesúsi arhiaspti: “Jíksïni sési jimbo arhisïnga, eska engajtsï no arhaska Achamasïiri Uájpeeri kʼuiripetani ka nójtsï itsïmani imeeri iurhirini, nójtsï jatsiaka tsípikua.
54 Ima enga juchiiti kʼuiripetani arhajka ka juchiiti iurhirini itsïmani, jatsisti tsípikua para méntkisï ka ji tsítantaaka últimu jurhiatikua jimbo;
55 jimboka juchiiti kʼuiripeta sési jimbo tʼirekueska ka juchiiti iurhiri sési jimbo itsïmakuesti.
56 Ima enga juchiiti kʼuiripetani arhajka ka juchiiti iurhirini itsïmani, jíndeni jingoni jarhasïndi ka ji imani jingoni jarhasïnga.
57 Taatireni axasti, ima enga tsípiti jaka ka ji Taatini jimbo irekaxaka. Májkueni, ima enga juchiiti kʼuiripetani auaka, jíndeni jimbo irekaati.
58 I jindeesti kurhinda enga auandarhu uératini juka. No ísïisti komueska ima kurhinda engaksï chaari ióntki anapu parientiicha ápka ka engaksï uarhikia. Ima enga ini kurhindani auaka, irekaati para méntkisï”.
59 Ini ambe uandaspti jiáni enga Kapernaúmi jorhentpini japka, jima engaksï judiuecha tánguarhijka para Tata Diosïni kómarhini.*
60 Engaksï na kurhaapkia ini ambe, uánikua kʼuiripuecha engaksï imani chúxapeenga, uandasptiksï: “¿Ambeteruchi úni kurhajchaa? No sési ambe uandaxati”.
61 Joperu Jesúsi mítespti eskaksï imeeri chúxapatiicha uandauandamixapka ini ambe jimbo, jimbosï arhiapti: “¿No sésijtsï exeskia?*
62 Jiájkani, ¿nájtsï uandapirini engajtsï exepiringa Achamasïiri Uájpani karhanchentani jarhani jini enga ióntki japka?
63 Espiritusï* tsípikua íntspijti jimboka kʼuiripeta no ma ambe marhuasïnga. Ambe engaksïni arhikia, espiritu santu jimboesti ka tsípikua íntspisïndi.
64 Joperujtsï jarhaska máru engajtsï no jakajkujka”. Jimboka Jesúsi tʼuini mítespkia néksï jindeespi engaksï no jakajkuenga ka nésï traisionaripirini.
65 Ka ístu arhiaspti: “Jimboksïnisï arhipka eskarini no nema uaaka andarhierani enga no Taati sésikua íntskuaka”.
66 Ísï jimbo, uánikua kʼuiripuecha engaksï Jesúsini chúxapeenga jurajkusptiksï paraksï imani ambe úni engaksï ióntki ueenga ka nóteruksï jámasptia imani jingoni.
67 Jimajkani Jesúsi kurhamarhiaspti 12 apostoliichani: “¿Ojtsïni chájtu jurajkua?”.
68 Simóni Pedru arhispti: “Tata, ¿néni jingonchi niua? Chiiti uandakuechaksïsï íntspijti tsípikua para méntkisï.
69 Juchachi jakajkuskia ka míteskachi eskari tʼu jindeeska ima enga Pímbinhasïika ka enga Tata Diosï axaka”.
70 Jesúsi arhiaspti: “¿Andi nóksïni ji erakuski chánksïni 12? Joperujtsï chá máisï uandakua ambe jauatatspesïnga”.*
71 Judasïnisï arhikuekani japti, Simóni Iskariote uájpa, jimboka traisionariipiringa nájkiruka 12 apostoliichani jingoni jámeenga.
Notecha
^ Griegu jimbo: “200 denariu jimbo”.
^ O “Profeta”.
^ O “tanimu o tʼámu miiaisï”. Griegu jimbo: “25 o 30 estadiuisï”.
^ O “Rabí”.
^ O jamberi “jima engaksï uánikua kʼuiripuecha tánguarhijka”.
^ O “¿I ambe úsïni eskajtsï téksarhutaaka?”.
^ O “Espiritu santusï”.
^ O “chá máisï noambakiti máeska”.
