Juanu 7:1-52
7 Tátsekua, Jesúsi seguirispti Galileaisï jámani jimboka no uékasïreenga Judeaisï nirani, jimbokaksï judiuecha jámaxapka jirinhakuntani néna uándikuni Jesúsini.
2 Ka niáraxaptia jurhiatikua paraksï judiuecha Kuákuecheeri* kʼuínchikuani úntani.
3 Ísï jimbo, imeeri ermanu jémbeechaksï arhispti: “Uéakunta ixú uératini ka ní Judeaisï parakaksï ístu chiiti chúxapatiicha exeaka ambe engari újka.
4 Jimboka enga nema uéjka mítekateeni, no sïpatikuarku úsïndi ambe ma. Ísï jimbo, engari tʼu ini ambe újka, jiájkani mátirku ú iáminduechani japarini”.
5 Joperu imeeri ermanu jémbeechaksï no jakajkusïreendi* Jesúsini.
6 Jimajkani Jesúsi arhiaspti: “Nótkirini niárachexati jandora, joperu chájtsï sési exesïnga na uéjki jatini.
7 Parhakpini anapuechaksï no jatsisti ambe jimboksïni ikiacheni, joperu jíndentsïni ikiachesïndi jimbokani uandantasïnga ambe engaksï imeecha no sési úni jaka.
8 Níia je chá kʼuínchikuarhu. Ji nótkini karhamaaka kʼuínchikuarhu, jimbokarini nótki janochexaka jandora”.
9 Ísï arhiaspti ka Galilea pakaraspti.
10 Ka engaksï imeeri ermanu jémbeecha na karhamapkia paraksï kʼuínchikuarhu nirani, imajtu karhamaspti joperu sïpatikuarku niraspti.
11 Ísï jimbo, judiuechaksï jámaxapti jirinhantani kʼuínchikuarhu, ka uandasïreendiksï: “¿Nani jámani jaki ima achamasï?”.
12 Ka uánikua kʼuiripu sïpasïpamexapti imeeri ambe. Máruksï uandasïreendi: “Ambakiti kʼuiripuesti”. Máteruechaksï uandasïreendi: “Nómbe, no ísïisti. Ima támisï jánhastaasïndi kʼuiripuechani”.
13 Joperu no nema tekaasïreendi uandani imeeri ambe kʼuiripuni japarini jimbokaksï chérhiasïreenga judiuechani.
14 Tʼámu jurhiatikisï tátsekua, enga na ueenakuarhipkia kʼuínchikua, Jesúsi templurhu karhamaspti ka ueenaspti jorhendaani kʼuiripuechani.
15 Judiuechaksï ísku pakareeraspti ka uandasïreendiksï: “I achamasï no jámasti eskuela,* jiájkani, ¿andisï xáni uánikua ambe míte Karakateecheeri ambe?”.
16 Ka Jesúsi arhiaspti: “No juchiitiisti ambe engani ji jorhentpijka, sánderu sési, imeeriisti engareni axaka.
17 Enga nema uéjka úni ambe enga Tata Diosï uékajka, míteati sini ji Tata Diosïiri ambe jorhentpixaki o imani ambe engani ji újtsïkuarheka.
18 Ima enga újtsïkuarhejka ambe ma ka indeni ambe jorhentpini, uékasïndi kʼéri ambe arhinhani. Joperu ima enga uéjka eska kʼéri ambe arhinhaaka ima enga axaka, méntkisï jurhimbikua ambe uandasïndi ka méntkisï sési jámasïndi.
19 Moisésiksïni íntskusti Leini, ¿no ísïiski? Ka chájtsï no nema úxaka ambe enga Leirhu arhijka. ¿Andijtsïnisï uéjki uándikuni?”.
20 Ka kʼuiripu arhispti: “Tʼungini demoniu ma incharhitixati. ¿Andi nékini uékasïni uándikuni?”.
21 Jimajkani Jesúsi arhiaspti: “Ji ma ambejkusïni úka ka chájtsï iáminduecha ísku pakareeraska.
22 Exe je: Moisésiksïnisï juramuchiti eskajtsï sapiichani pasïri pʼikujtsïkukuauaka tsʼiuerakuarhu, —nájkiruka no Moisésini jimboeka sino chaari ióntki anapu parientiichani jimbo— ka chájtsï pʼindeska sábadu jurhiatikua jimbo indeni ambe úkuani tatakeechani.
23 Engajtsï chá sábadu jurhiatikua jimbo pasïri pʼikujtsïkukujka tatakani ma tsʼiuerakuarhu, parajtsï úni ambe enga Moisésiiri Lei uandajka, jiájkani, ¿andijtsïnisï xáni ikiachejki engani sábadu jurhiatikua jimbo ambakerantaka acheetini ma?
24 Asï jáma je jusgarpini ísï eska na xarharajka ambe ma, sánderu sési, ísï jusgarpi je eska námindu jindeeka”.
25 Jimajkani máru kʼuiripuecha engaksï Jerusaléni anapuepka, ueenasptiksï uandani: “¿Andi no ínksïsï uéjki uándikuni?
26 Joperu exe je, kʼuiripuni japarini jorhentpixati ka nóksï ambe ma arhisïndi. ¿Oksï juramutiicha jakajkia eska inde jindeeska Kristu?
27 Joperu nómbe; juchachi míteska nani anapueski i achamasï, ka jiáni enga Kristu juuaka, no nema míteati nani anapueua”.
28 Jimajkani, enga Jesúsi templurhu jorhentpini japka, uinhachaparini uandaspti: “Chájtsïni míteska jíndeni ka ístujtsï míteska nani engani anapueka ji. Joperuni ji no jutsïkuarheska. Ima engareni axaka meru jarhasti ka chájtsï no míteska imani.
29 Ka ji kʼóruni míteska jimbokani imeeri nombri jimbosïni juka ka imarinisï axati”.
30 Ísï jimbo, ueenasptiksï jirinhakuntani néna jupikani, joperu no nema úspti jupikani jimboka nótki niárakuxapka jandora.
31 Ka nájkiruka ísï úkuarhini japka, uánikua kʼuiripuechaksï niáraspti mintsikani imani ka uandasïreendiksï: “Enga Kristu na juuakia, ima uánikua milagruechani uaauati, ka i achamasï indeni ambesï úni jati”.
32 Fariseuechaksï kurhajchaaspti kʼuiripuechani engaksï imeeri ambe sïpasïpameni japka. Ísï jimbo, imeecha ka kʼérati saserdotiichaksï kuáriichani axaaspti paraksï jupikani.
33 Jimajkani Jesúsi arhispti kʼuiripuni: “Ji nóteruni ióni jauakia chánksïni jingoni, tátsekua niuaka andarhientani imani engareni axaka.
34 Chájtsïni jámaaka jirinhantani, joperujtsïni no exentaaka. Nójtsï uaaka jima nirani nani engani ji jauaka”.
35 Ísï jimbo, judiuechaksï ueenaspti uandani: “¿Andi nani eratseni jaki nirani inde parachi jucha no úni exentani? ¿O judiuechani jingoni uékani jaki nirani engaksï grieguechani jingoni irekani jaka para grieguechani jorhendaani?
36 ¿Ambe arhikuekani japi enga uandaka ‘Chájtsïni jámaaka jirinhantani, joperujtsïni no exentaaka. Nójtsï uaaka jima nirani nani engani ji jauaka’?”.
37 Últimu jurhiatikua enga sánderu kʼéri úkuarhienga kʼuínchikua, Jesúsi anhandespti ka uinhachaparini uandaspti: “Enga nema kʼarhichani jaka, juuerini andarhierani ka itsïmee.
38 Engareni nema niáraska mintsikani jíndeni, imeeri mintsitarhu itsï iorheati, itsï enga tsípikua íntspijka, ísï eska na karakata jaka Karakateecharhu”.
39 Jesúsi imani espiritu santunisï arhikuekani japti engaksï ima kʼuiripuecha intsïnhapiringa engaksï imani mintsikapiringa. Joperu nótkiksï intsïnhaxapti ini espirituni* jimboka Jesúsi nótki karhanchentaxapka auandarhu.
40 Engaksï máru kʼuiripuecha kurhaapka ini ambe, úndasptiksï uandani: “Ísï jindeeti Tata Diosïiri Uandakua Pári”.*
41 Máteruechaksï uandasïreendi: “I jindeesti Kristu”. Joperu máteruechaksï uandasïreendi: “Kristu no Galilea anapueuati, ¿a no?
42 ¿Andi nóksï uandasïni Karakateecha eska Kristu Dabidiiri kʼumanchikuarhu uératini jupiringa ka eska Beléni anapuepiringa, jima enga Dabidi anapuepka?”.
43 Ísï jimbo, kʼuiripuechaksï mámaru ambe uandasïreendi imeeri ambe ka ueenasptiksï arhirperani.
44 Máruksï uékasïreendi jupikani, joperu no nema úspti jupikani.
45 Jimajkani kuáriichaksï ménderu kʼuanhatsentaspti jima engaksï kʼérati saserdotiicha ka fariseuecha japka. Ka fariseuechaksï kurhamarhiaspti: “¿Andijtsïsï no jua?”.
46 Ka kuáriichaksï arhiaspti: “¡No ma achamasï jarhasti enga ísï uandajka eska ima!”.
47 Joperu fariseuechaksï arhiaspti: “¿Oksïni chánksïntu támisï jánhastaskia?
48 ¿O jaki juramuti ma o fariseu ma enga jakajkukia* imani?
49 Joperu Tata Diosï kastigariauati ini kʼuiripuechani engaksï no míteka ambe enga Lei uandajka”.
50 Jimajkani, Nikodemu enga nípka ma xanhari Jesúsini exeni ka enga fariseuecha jingoni jámeenga, arhiaspti:
51 “Juchaari Lei uandasïndi eska para kʼuiripu ma úni jusgarinhani, orheta jatsisti para kurhajchanhani ka sési mítekuarhini ambe enga úni jaka, ¿no ísïiski?”.
52 Engaksï imeecha kurhaapka ini ambe, arhisptiksï: “¿Ori tʼujtu Galilea anapueski? Arhintatkiria Karakateecharhu parakari exekuarhiaka eska Galilea no méni uéraaka Tata Diosïiri uandakua pári ma”.*
Notecha
^ O “Tabernakuluecheeri”.
^ O “no mintsikasïreendi”.
^ Imani eskuelanisï arhikuekajti nani engaksï relijioniiri orhejtsïkutiicha jorhentpienga.
^ Griegu jimbo: “nótki jarhaxapti espiritu”.
^ O “Profeta”.
^ O “mintsikakia”.
^ Ióntki anapu karakateecharhu engaksï mintsinharhikueka, no jukasti bersikulu 53 ka nijtu bersikulu 1 a 11 jamberi kapitulu 8 jimbo.
