Kolosasi 1:1-29
-
Ueenasïndi uandajpaani (1 ka 2)
-
Pablu diosmaiamukua arhisïndi Tata Diosïni jimbokaksï Kolosasi anapuecha mintsikasïnga (3 a 8)
-
Kómarhisïndi parakaksï Kolosasi anapuecha sánderu sési míteaka Tata Diosïni (9 a 12)
-
Kristueri kʼéri ánchikuarhita (13 a 23)
-
Pablu uinhamu ánchikuarhisïndi kúnguarhikuani jimbo (24 a 29)
1 Ji Pablu, Kristu Jesúsiiri apostoliiska jimboka Tata Diosï ísï uékaska; jíksïni karachixaka ka juchaari erachi* Timoteu jíndeni jingoni jarhasti.
2 Ji karakuaxaka pímbinharhatiichani engaksï Kolosasi jaka, engaksï mintsinharhikueka ka engaksï chúxapani jaka Kristuni:
Ji kómarhisïnga eskaksïni Tata Diosï, enga jindeeka juchaari Taati, kánikua kóndentaaka* ka eskaksïni jarhuataaka parajtsï pínandikua jatsini.
3 Engaksïni kómarhijpichejka, méntkisïchi diosmaiamukua arhisïnga Tata Diosïni enga jindeeka juchaari Tata Jesukristueri Taati,
4 jimbokachi míteska na engajtsï xáni mintsikajka Kristu Jesúsini ka na engajtsï xáni xénchaajka iámindu pímbinharhatiichani
5 jimbokajtsï chá indeni ambe erokuarhixaka ambe engajtsï míndanhaka auandarhu. Chájtsï míteskia ambe engajtsï erokuarhini jaka jimbokajtsï kurhandiskia jurhimbikua ambe, indeni ambakiti aianhperakuani
6 engajtsï chá mítekia. Ísï eska ambakiti aianhperakua na sánderu mítekuarhini jaka ka ísï eska na iápurisï etsakuarhini jaka, chájtujtsï sánhani arhixaka sánderu sési míteni ambakiti aianhperakuani, jiáni uératini engajtsï kurhandika ka engajtsï míteka na enga xáni kóntpintajka Tata Diosï.
7 Indeni ambeksïnisï jorhendati Epafrasi, juchaari erachi engachi jucha xáni xénchajka ka enga ísï marhuani jaka komueska jántspiri ma ka enga sési úni jaka Kristueri ánchikuarhitani, indeni ánchikuarhitani engani jucha úpiringa engachi jima japiringa.
8 Ístujtsïni aiangusti eskaksïni espiritu santu jarhuataxaka parajtsï chá xénchpeni.
9 Ísï jimbo, jiáni uératini engani jucha míteka indeni ambe, méntkuksïni kómarhijpichexaka ka kurhakuxakachi Tata Diosïni eskaksïni jarhuataaka parajtsï chá sánderu sési míteni ambe enga Tata Diosï uéjka ka paraksïni espiritu santu jarhuatani parajtsï chá iámindu ambe jánhaskani ka kurhanguni,
10 parakajtsï ísï jámaaka eska Tata Diosï Jeoba na jaiapanhentajka ka parajtsï méntkisï sési pʼikuastani ka ístujtsï ambakiti ambe úni ka sánhani arhintsï sánderu sési míteni Tata Diosïiri ambe.
11 Ístuchi kómarhixaka eskaksïni Tata Diosïiri uinhapikua, enga xáni kʼéri ambeeka, uinhaperantaaka parajtsï chá seguiriini jarhani tekaantani ka tsípikua jingoni jámani ka parajtsï no kuatantani,
12 ka ístu diosmaiamukua arhi je Taatini engaksïni jorhendaka parajtsï chájtu imani erensiani pʼirani engaksï pímbinharhatiicha intsïnhaaka, imeecha engaksï tʼíntskuarhu jaka.
13 Imajtsïni euajpintasti parajtsïni pápkʼandekua nóteru juramuchinia ka jimajtsïni pásti nani enga juramujka imeeri Uájpa enga ima xáni xénchajka,
14 imani jimbochisï iásï nóteru jántspiriikia, jimbokajtsïni ima pʼímutantaska engajtsïni euajpintaka, jo, puáminhaantaskachia pekaduechani.
15 Ima orheta kueraanhasti jiáni enga nótki ambe ma kueraanhani japka* ka ima jindeesti engajtsïni exerajka na engamindu jásïika Tata Diosï enga no nema újka exeni;
16 jimboka imani jimbosï kueraanhati iámindu máteru ambe, ambe enga auandarhu jaka ka ístu ambe enga echerirhu jaka, ima ambe enga xarharajka ka ambe enga no xarharajka, komueska reiicha, imeecha engaksï uinhapikua jatsika, juramukuecha ka juramutiicha. Jo, imani jimbosï iámindu máteru ambe kueraanhati ka imeeriisti iámindu ambe.
17 Ístu, ima tʼuini jarhasptia jiáni enga nótki ambe ma jarhani japka ka imani jimbosï niárati jarhani iámindu máteru ambe,
18 ima jindeesti kuerpurhu anapu éjpu enga jindeeka kúnguarhikua. Ima orheteesti, imasï orheta tsíntati* paraka ima orheteuaka iámindu ambe jimbo;
19 jimboka Tata Diosï sési exeska eska Kristu méntku iámindu ambe jimbo xásïipiringa eska ima,
20 Kristuni jimbo, imani iurhirini jimbo enga ima tsïtaka engaksï chkarirhu* cháparhatapka, Tata Diosï ústi eska iámindu máteru ambe sési japiringa* imani jingoni, ambe enga xáni jaka auandarhu ka ístu ambe enga xáni jaka echerirhu.
21 Ka ióntki, chájtsï iauani jarharitixapka Tata Diosïni ka nójtsï úsïreenga sési pájperani imani jingoni, jimbokajtsï méntku eratseni jarhasïreenga no sési jásï ambe úni
22 ka enga Kristu ísï uarhika imeeri kuerpurhu, chájtsï iásï sési pájperantaskia Tata Diosï jingoni paraksïni pímbinhasï peentani imani japarini, parajtsï méntku iámindu ambe jimbo sési jarhani ka nójtsï no sési ambe exeminhani.
23 Chájtsï uaaka ísï jarhani engajtsï seguiriini jauaka mintsikani, engajtsï sési uaxastakata jauaka pítsekuarhu ka uíuinhasïjtsï jarhani, ka engajtsï no méni jurajkuska mintsikani ambe engajtsï erokuarhini jaka, indeni ambakiti aianhperakuani engajtsï iásï chá kurhandikia ka enga iámu parhakpinirhu uandanhantakia. Ji Pablu, erakunhaska parani indeni ambakiti aianhperakuani uandantani.
24 Ka iásï kánikua tsípixaka engani ísï no sési nitamakuarhini jaka chánksïni jimbo; májkueni no sési nitamakuarhixaka eska Kristu, joperuni útasï jatsiska parani no sési nitamakuarhini Kristueri kuerpuni jimbo enga jindeeka kúnguarhikua.
25 Ji Tata Diosïiri iretani marhuakuxaka, jimbokarini ima ísï jimbosï erakuka ka i jindeesti paraksïni chánksïni jarhuatani; jimbosïni jánguarhintajka uandantani Tata Diosïiri uandakueri ambe,
26 indeni ambe enga Tata Diosïiriika,* enga ióntki* jískakata japka ka engaksï ióntki anapuecha no niárapka míteni. Joperu iásï imeeri pímbinharhatiichaksï mítestia,
27 Tata Diosï uékasti aianguani imeeri pímbinharhatiichani engaksï ireteecharhisï jaka kánikua ambakiti ambe, jo, ambe ma enga Tata Diosïiriika.* Ka inde ambe enga Tata Diosïiriika, jindeesti Kristu, ima enga chánksïni jingoni jaka, ka indeni ambejtsïsï erokuarhini jaka parajtsï kʼéri ambeeni ísï eska ima.
28 Imeeri ambechisï uandantani jaka ka aianguasïngachi iámu parhakpini anapuechani ambesï úkuarhia, ka jánhaskakua jingonchi jorhendaasïnga iámu parhakpini anapuechani, parakaksï ima kʼuiripuecha engachi Tata Diosïni japarini peerauaka, Kristueri chúxapatiuaka ka eratsekua jukariinksï.*
29 Jimbosïni xáni uinhamu ánchikuarhini jaka ka imeeri uinhapikuarhinisï jarhuatajti parani orhepani uérani, imeeri uinhapikuarhinisï xáni uinhaperantajti.
Notecha
^ O “ermanu”.
^ Exe je Glosario, Tata Diosï kánikua kóntpintasïndi.
^ Griegu jimbo: “Ima jindeesti orheta uájpa iámu kueraakateeri”.
^ Griegu jimbo: “imasï jindeeti orheta uájpa enga orheta tsíntaka”.
^ Exe je Glosario, chkari enga jindeeka para no sési nitamakuarhini.
^ O “sési pájperantapiringa”.
^ Exe je Glosario, ambe ma enga Tata Diosïiriika.
^ O “enga máteru tiempuecha jimbo”. Exe je Glosario, tiempu.
^ Exe je Glosario, ambe ma enga Tata Diosïiriika.
^ O “ka sésiksï jarhani iámindu ambe jimbo”.
