Kolosasi 2:1-23
2 Jimbokani ji uékasïnga eskajtsï chá exeaka na engani xáni jánguarhintani jaka paraksïni chánksïni jarhuatani ka ístu imeechani engaksï Laodisea jaka ka iámindu imeechani engajtsïni nótki míteni jaka.*
2 Ji uékasïnga sési pʼikuastaantani iáminduechani ka eskaksï iáminduecha májku kʼéri jauaka jimbokaksï xénchperasïnga, ka eskaksï uaaka ambakiti ambe jatsini, inde ambakiti ambe jindeesti sési míteni ka ístu sési kurhanguni indeni ambe enga Tata Diosïiriika,* ka inde ambe enga Tata Diosïiriika, jindeesti Kristu.
3 Imasï sési jískakata jatsiti iámindu imani ambakiti ambe enga jarhuajpejka para ma úni sési jánhaskani ka iámindu ambe míteni.
4 Jíksïni ini ambe arhixaka paraksïni no ma repentku nema támisï jánhastani engaksïni sési arhini jauaka.
5 Nájkirukani ji no chánksïni jingoni jaka, ísïksïni arhixaka enajkini ji chánksïni jingoni japirini, ji sési pʼikuarherasïnga jimbokajtsï sési úxaka iámindu ambe ka jimbokajtsï kánikua mintsikasïnga Kristuni.
6 Ka jimbokajtsï jakajkuskia Kristu Jesúsini enga jindeeka juchaari Tata, ísï jimbo, seguirii je imani chúxapani,
7 ísïi je komueska anhatapu ma enga iauani inchaskuajka imeeri sïranguechani; ísïi je komueska kʼumanchikua ma enga sési uaxastakata jaka ka seguirii je sánderu mintsikani Kristuni ísï eskajtsï na jorhendanhakia, ka méntkisï diosmaiamukua arhijpi je.
8 Xéparini jáma je paraksïni no nema támisï jánhastani,* jimbokaksï mámaru ambe jorhentpisïnga, ka chkuanderakua ambeksï jorhentpisïndi ka ísku ambe ma, indeni ambe engaksï kʼuiripuecha pʼindeka úni, ambe engaksï parhakpini anapuecha eratsejka ka úni, ka no Kristueri ambe.
9 Jimboka ima méntku iámindu ambe jimbo xarhatasïnga na enga jásïika Tata Diosï.
10 Jimajkani imani jimbo, chájtujtsï iásï iámindu ambe jatsiskia, imani jimbo enga éjpueka iámindu juramukuecheeri ka juramutiicheeri.*
11 Jimbokajtsï mintsikasïnga Kristuni, chájtsï pasïri pʼikujtsïkuminhaska tsʼiuerakuarhu* joperu no ísï eskaksï kʼuiripuecha na újka, sánderu sési, nóterujtsï úsïngia ambe enga tsitijka kuerpu enga pekadu jukaraka ka Kristueri chúxapatiichaksï ísï pʼikujtsïkusïndi pasïri tsʼiuerakuarhu.
12 Jimbokajtsï chá imani jingoni jatsinhantaska enga ima itsï atakuarhipka,* ka jimbokajtsï imeeri chúxapatiiska, ístujtsï imani jingoni tsítanhantaska,* jimbokajtsï chá mintsikasïnga na enga xáni uinhapitiika Tata Diosï, ima Tata Diosï enga tsítantaka imani.
13 Ístu, Tata Diosïksïni íntskusti tsípikua imani jingoni, nájkirukajtsï chá uarhirini japka jimbokajtsï no sési ambe niátasïreenga ka jimbokajtsï no pʼikujtsïkuspka pasïri tsʼiuerakuani. Ka jimbokajtsïni xénchasïnga, puáchentastijtsïni ambe engachi xáni no sési niátaka
14 ka kʼamajkusti leini engajtsïni kastigariuenga. Tata Diosï kénditasti indeni leini enga ísï cháparhataka Kristuni chkarirhu ma enga jindeeka para no sési nitamakuarhini.*
15 Ka ísï úparini,* iámu xásku jurajkuasti gobiernuechani ka juramutiichani, ka jupikatini paasti paraksï uanopini ka paraksï iáminduecha exeni eskaksï tsïtaska ka eska ima andaaska.
16 Ísï jimbo, nóksïni nema jatsisti para jusgarini imani ambe jimbo engajtsï arhajka ka nijtu imani ambe jimbo engajtsï itsïmajka, o jimbokajtsï kʼuínchikua ambe úntasïnga, o ístu jimbokajtsï kʼuínchikua ambe úntasïnga jiáni enga jimbanhi luna jarhajka o sábadu jurhiatikua jimbo.
17 Iámindu inde ambe xarhataxapti ambe enga sánderu orhepani jupiringa, joperu iámindu inde ambe Kristunisï arhikuekajti.
18 Xéparini jáma je imeecha jingoni engaksï ísï jámajka enajkiksï kaxumbitii nomasi paraksï kʼuiripuecha exeani ka engaksï ánjeliichani kómarhiajka,* jimbokaksïni úpiringa ójkutani parajtsï chá no intsïnhani ambe engajtsï andakuarheaka. Imeechaksï méntku no uékasïndi jurajkuni ambe engaksï exejka. Ka kʼéramakuarhisïndiksï imani ambe jimbo enga ísku ambe máeka, jimbokaksï ísï eratsesïnga eska imeecheeri kuerpu na tsitijka,
19 inde kʼuiripuechaksï no éjpurhu mátakurhitixati, indeni éjpurhu enga újka eska iámu kuerpu uíuinhasï jauaka, ka sési mátakurhitixati kutukuechani ka kʼuanhapikuechani jingoni ka Tata Diosïsï újti eska inde kuerpu kʼuiripeaka.
20 Engajtsï chá Kristu jingoni uarhika parajtsï méntku nóteru ísï úni ka eratseni eskaksï parhakpini anapuecha, jimajkani, ¿andijtsïsï útasï ísï jámajki enajkijtsï parhakpini anapue? ¿Ka andijtsïsï útasï újki ambe engaksï ari mandamientuecha uandajka
21 “asï jáma jupikani, asï jáma tsʼémuni, asï jáma pʼárhini”?
22 Íksï mandamientuecha jindeesti para ima ambe enga kʼamakurhijka jiáni enga na anhajkia o itsïmanhani. Joperuksï kʼuiripuechasï jorhentpiajti ini mandamientuechani.
23 Ísï xarharasïndi enajkiksï i mandamientuecha jánhastaajki kʼuiripuechani, joperuksï no jarhuataasïndi paraksï pʼíngukuarhini ka nóksï úni ambe enga imeecheeri kuerpu tsitijka, ka ísïksï jámasïndi jimbokaksï imeecha ísï kómarhisïnga Tata Diosïni eskaksï imeecha na uéjka, ísïksï xarharasïndi enajkiksï kaxumbitii ka no sési ambeksï úkusïndi imeecheeri kuerpuni.
Notecha
^ Griegu jimbo: “nótki erateni jaka”.
^ Exe je Glosario, ambe ma enga Tata Diosïiriika.
^ Griegu jimbo: “jupikani”.
^ O “enga orhejtsïkuajka iámindu juramukuechani ka juramutiichani”.
^ O “chájtsï sirkunsidarinhaska”.
^ Exe je Glosario, itsï atakuarhini; itsï atani.
^ Griegu jimbo: “jauatanhantaska”.
^ Exe je Glosario, chkari enga jindeeka para no sési nitamakuarhini.
^ O jamberi “imani jimbo”.
^ O “engaksï ísï kómarhijka eskaksï ánjeliicha na újka”.
