Kolosasi 4:1-18
4 Chá engajtsï patroniika, sési kaa je imeechani engaksïni jántspichejka ka iáminduechani májkueni kaa je, jimbokajtsï mítetixaka eskajtsï chájtu jatsiska Patronini ma enga auandarhu jaka.
2 Méntku kómarhini ja je, ka engajtsï kómarhini jauaka, jingontku ja je ka diosmaiamukua arhi je Tata Diosïni.
3 Ístu, kómarhijpichejtsïni je juchantsïni ka kurhaku je Tata Diosïni eskajtsïni mítacheaka puerta ma, parachi jucha úni aianhpini ka uandantani indeni ambe enga Tata Diosïiriika,* jo, Kristueri ambe, ka Tata Diosïiri ambe jimbosïni iásï ónhakata jaka.
4 Ístu, kurhaku je Tata Diosïni eska sési kurhangukuarhiaka ambe engani ji uandantaaka, ísï eskani náminduni jatsika parani uandantani.
5 Xarhata je eskajtsï chá jánhaskasïnga ka méntkisï sési jáma je imeechani japarini engaksï no jakajkutiika, ka asï ísku jatini ambendurhi je* chaari tiempuni.
6 Jatsiskajtsï para méntkisï sési uandani, ísï uanda je enajkijtsï itukua jingoni ásperaantapirini chaari uandakuechani, parakajtsï míteaka néna kurhakuni mándani kʼuiripuni engaksïni arhini jauaka ambe ma.
7 Tíkiku, juchiiti erachi* engani ji xáni xénchajka, enga sési marhuani jaka ka enga ístu ísï marhuakuni jaka Tatani komueska jántspiri ma, indeksïni aianguati na jámaxaki ji.
8 Jíksïni indeni axachexaka parakajtsï míteaka náchi jámaxaki jucha ka ístu paraka sési pʼikuastantaaka chaari mintsitani.
9 Onésimu jingoni niuati, juchiiti erachi engani ji xáni mintsinharhijka ka engani ji xáni xénchajka, inde enga chánksïni jingoni jarheenga. Indeechaksïni aianguati na enga jánhaskuarhini jaka ixúanisï.
10 Aristarku, enga ístu jíndeni jingoni ónhakata jaka, indejtuksïni uandajperata ma axachexati ka ístu Markusï enga Bernabéeri primu jémbeeka, —engaksïni inde niuaka exeni, chájtsï jatsiska para sési erokani ísï eskajtsï na arhinhakia—.
11 Ka ístuksïni uandajperata ma axachexati Jesúsi, engaksï arhijka Justu, iámindu iichaksï pasïri pʼikujtsïkusti tsʼiuerakuani.* Indeechajkujtsïnisï jarhuatani jati uandantani Tata Diosïiri Reinueri ambe, indeechajtsïni méntkisï sési pʼikuastantasïndi* jíndeni.
12 Epafrasijtuksïni uandajperata ma axachexati, inde chánksïni jingoni jarhasïreendi ka ísï marhuakuxati Kristu Jesúsini komueska jántspiri ma. Indeksïni méntkisï mintsita jingoni kómarhijpichesïndi parajtsï chá méntkisï uíuinhasï jarhani ísï komueska ima kʼuiripuecha engaksï eratsekua jukariika* ka engaksï jakajkujka ambesï uéjki Tata Diosï.
13 Ji sési mítetixaka* eska inde kánikua jánguarhintasïnga paraksïni chánksïni jarhuatani ka ístu para Laodisea anapuechani jarhuataani ka Ierápolisi anapuechani.
14 Lukasï, enga doktoriika ka engachi xáni xénchajka, indejtuksïni uandajperata ma axachexati ka ístu Demasi.
15 Chá sáni aiangua je Laodisea anapuechani eskani ji uandajperata ma axakuaxaka ka ístu Ninfani, ka imani kúnguarhikuarhu anapuechani engaksï imeeri kʼumanchikua jimbo tánguarhijka.
16 Engajtsï na arhintaakia ini karakatani, Laodisea axa je paraka ístu arhinhantaaka jima anapu kúnguarhikua jimbo, ka chájtu arhinta je imani karakatani engani Laodisea anapuechani axakuaka.
17 Ístu, ísï arhi je sáni Arkipuni: “Jánguarhinta sési úni Tateeri ánchikuarhitani, indeni ánchikuarhitani engari tʼu uandapka eskari úpiringa”.
18 Ji Pablu, jíksïni karachixaka ini uandajperatani engaksïni axacheni jaka. Asï mirikurhi je eskani ónhakata jarhaska. Eskaksïni Tata Diosï kánikua kóndentaaka.
Notecha
^ Exe je Glosario, ambe ma enga Tata Diosïiriika.
^ O “ka sési úra je”.
^ O “ermanu”.
^ O “sirkunsidarikuarhisti”.
^ O “jurhasïndi jarhuatani parajtsïni uinhaperantani”.
^ O “engaksï sési jaka iámindu ambe jimbo”.
^ O “uaaka uandantani”.
