Mateu 10:1-42
10 Jiájkani Jesúsi tánaantaspti imeeri 12 chúxapatiichani ka íntsaaspti juramukua paraksï petarpiantani no sési jásï espirituechani ka ístu paraksï ambakeraantani kʼuiripuechani engaksï mámaru ambe pʼamenchani japka ka no sési pʼikuarherani.
2 Ísïksï arhinhasïreendi 12 apostoliicha: ueenani jámani Simóni —engaksï ístu arhijka Pedru— ka imeeri ermanu jémba Andrési; Santiagu Sebedeu uájpa ka Juanu imeeri ermanu jémba;
3 Felipe ka Bartolomé; Tomási ka Mateu enga impuestu kobrarpienga; Santiagu Alfeu uájpa ka Tadeu;
4 Simóni ima enga tsípikua jingoni jámajka ka Judasï Iskariote —ima enga ísï tátsekua traisionariipka—.
5 Jesúsi axaaspti ini 12 apostoliichani arini ambe arhiaparini: “Asï ní je imani xanharu jimbo enga máteru ireteecharhu pájpejka ka asï inchaaku je Samaria anapu ireteecharhu.
6 Sánderu sési, méntku únda je jirinhaantani Israeli anapu karichiichani engaksï tsïnchetini jámani jaka.
7 Ní je ka aianhpi je ‘Auandarhu anapu Reinu janoxatiia’.
8 Ambakeraanta je pʼamenchatiichani, tsítaanta je* uarhiriichani, ambakeraanta je imeechani engaksï lepra pʼamenchani jaka, petarhitantaa je demoniuechani. Chájtsï no ma sentabu maiampiska, ísï jimbo, chájtu asï ma sentabu euajpi je.
9 Asï pá je chaari jónguarhikuarhu* oru nijtu plata nijtu kobri.
10 Ístu, asï jáma je páni sutupu ma tʼirekua jingoni, nijtu máteru xukuparhakua para mórhekuarhini, nijtu kuarhachiichani nijtu tenhexkuarhikua;* jimboka ánchikuarhiri jukanchasïnga tʼireranhani.
11 ”Engajtsï kʼéri iretarhu ma inchaakuaka o ireta sapichurhu ma, jirinhanta je imani enga jukanchaka para kurhaani ambe engajtsï aianhpini jaka ka jima pakara je astakajtsï uéakuntaaka jima uératini.
12 Engajtsï inchaakuaka kʼumanchikuarhu ma, sési uandajpaa je* imeechani engaksï jima jauaka.
13 Engaksïni sési jiókaska, imaksï pínandikua intsïnhaati, joperu enga nómbe, inde pínandikua chánksïni jingoni pakaraati.
14 Engaksïni kʼumanchikuarhu ma o kʼéri iretarhu ma no sési jiókaaka ka nóksï kurhaani ambe engajtsï aianhpini jaka, uarhandunta je* tʼupurini engajtsï na uéakuntani jámaakia.
15 Jíksïni sési jimbo arhisïnga eska ima Jurhiatikua enga Tata Diosï Jusgarpiaka, sánderu sési nikuauati Sodoma ka Gomorra anapuechani ka eska imani iretarhu anapuechani.
16 ”Exe je, jíksïni ísï axaxaka komueska karichiicha jima engaksï jiuatsïicha jaka. Ísï jimbo, ísïi je komueska akuitsiicha engaksï jingontku jámajka, joperu ístu, ísï jáma je komueska palomasïicha engaksï no ma ambe útspijka.
17 Jingontku jáma je kʼuiripuechani jingoni, jimbokaksïni paaka iretarhu anapu juesiichani jingoni ka kʼuikirhiatiksïni jima engaksï judiuecha tánguarhijka para Tata Diosïni kómarhini.
18 Ka jíndeni jimbo, chájtsï juramutiicha ka reichani jingoni pánhaaka. I ambe marhuauati parajtsï aianguani imeechani ka ístu iretarhu anapuechani ambe engajtsï chá jakajkujka.
19 Joperu engaksïni juramutiichani jingoni paaka, asï uandanhia je eratseparini ambe engajtsï uandaaka o na engajtsï uandaaka, jimboka jiáni enga ísï uétarhiaka, arhinhaakajtsï ambe engajtsï jatsiaka para uandani.
20 Jimbokajtsï no chájkusï uandani jauaka: chaari Taatiiri espiritu santusï uandaati chánksïni jimbo.
21 Ístu, ermanu ma íntspintaati imeeri ermanu jémbani paraksï uándikuni ka taati imeeri uájpani ka sapiichaksï nóteru uékaatia kurhajchaani taati jémbeechani ka uándikutarkuarhiauatiksï.
22 Iámindu kʼuiripuechaksïni kurhunhiati jíndeni jimbo. Joperu ima enga tekaantaaka astaka kʼamajkunhaaka parhakpini* pʼímutantskata uéraati.
23 Engaksïni no sési kámaaka iretarhu ma, máteru iretarhu ní je sïpakuarhini; jimbokaksïni ji sési jimbo arhisïnga eskajtsï no andajkuarhiaka iámindu Israeliiri ireteecha jimbo jámani enga jamberi janoaka Achamasïiri Uájpa.
24 ”Jorhenguarhiri no sánderu kʼéri ambeesti eska imeeri jorhentpiri, nijtu jántspiri sánderu kʼéri ambee eska imeeri patroni.
25 Sésku jarhasïndia para jorhenguarhiri ísïini komueska imeeri jorhentpiri ka para jántspiri ísïini komueska imeeri patroni. Engaksï kʼumanchikueri dueniuni niáraka arhini Belsebú,* ¡nénaksï no ísï arhiaua imeeri kʼumanchikuarhu anapuechani!
26 Ísï jimbo, asï chérhia je. Jimboka ambe enga jískakata jaka, niáraati exenhantani, ka ambe enga no mítekuarhika, niáraati mítekuarhini.
27 Ambe engaksïni ji sïpatikuarku arhijka, chá kʼuiripuni japarini uandanta je, ka ambe engaksïni ji arhindikujka, chá kʼumanchikuarhu karhakua uératini uandanta je.
28 Ka asï jáma je chérhiani imeechani engaksï uándikujka kuerpuni joperuksï no úni uándikuni almani.* Sánderu sési, chénharhi je* imani enga újka kʼamajkuni almani ka ístu kuerpuni Jeenarhu.*
29 Tsimani pájaruechaksï íntspikuarhinhasïndi sántku sentabu jimbo,* ¿no ísïiski? Joperu chaari Taati mítesïndi enga máisï niárajka uekorheni.
30 Ka chánksïni jingoni sánderia, jimboka iámu chaari jauiri jamberi kuenta úkata jarhaska.
31 Ísï jimbo, asï ché je. Chájtsï sánderu jukaparhaska eska uánikua pájaruecha.
32 ”Ima enga kʼuiripuechani japarini uandantajka eskarini jakajkusïnga, jíjtuni uandantaaka juchiiti Taatini japarini enga auandarhu jaka, eska ima juchiitiiska.
33 Joperu enga nema kʼuiripuechani japarini uandaska eskarini no míteska, jíjtuni juchiiti Taatiiri orhepani jimbo, enga auandarhu jaka, uandaaka eskani no míteska.
34 Asï eratsi je eskani jurhaska para pínandikua jarhani parhakpinirhu; no jurhaska para pínandikua jarhani sino espadasïni juáka.
35 Jimbokani jurhaska paraka kʼuiripu no uaaka májku kʼéri jarhani. Tataka no uaati sési pájperani taati jémba jingoni, nanaka no uaati sési pájperani amamba jingoni ka tarhamba no uaati sési pájperani suegra jémba jingoni.
36 Jiájkani, imeeri mismu kʼumanchikuarhu anapuechaksï ikiakuati kʼuiripuni ma.
37 Ima enga sánderu uékaska taati jémbani o amambani ka eska jíndeni, no jukanchasti juchiiti chúxapatiini ka ima enga sánderu uékaska imeeri tatakani o imeeri nanakani ka eska jíndeni, no jukanchasti juchiiti chúxapatiini.
38 Ka ima enga no jiókuarhiska imeeri chkarini enga jindeeka para no sési nitamakuarhini,* ka jurhandeni chúxapuni, no jukanchasti juchiiti chúxapatiini.
39 Ima enga uékaaka kuájchakuni imeeri tsípikuani,* masi uaati tsïtani ka ima enga tsïtaaka imeeri tsípikuani jimboka juchiiti chúxapatiiska, ménderu niáraati tsípikua jatsini.
40 ”Ima engaksïni sési erokajka chánksïni, ístureni sési erokasïndi jíndeni ka ima engareni sési erokajka jíndeni, ístu sési erokasïndi imani engareni axaka.
41 Ima enga sési erokaaka Tata Diosïiri uandakua párini* ma jimboka Tata Diosïiri uandakua páriiska, niáraati kóntperata ma intsïnhani ísï eska Tata Diosïiri uandakua pári ma, ka ima enga sési erokaaka imani kʼuiripuni enga sési jámajka jimboka sési jámasïnga, niáraati kóntperata ma intsïnhani ísï eska ima enga sési jámajka.
42 Jíksïni jurhimbikua jingoni arhixaka: ima enga íntskuaka ma basu itsï tsʼirapiti máechakuani ini sapirhatiichani jimboka juchiiti chúxapatiiska, no xántkisku pakaraati, sino niáraati jatsini imeeri kóntperatani”.
Notecha
^ Griegu jimbo: “jauataanta je”.
^ Jónguarhikua ma enga jukapka nani páni sentabu.
^ O “tékskurhikua”.
^ Engaksï judiuecha exejpereenga ísïksï uandajperasïreendi “Eskari pínandikua jatsiaka”.
^ O “uauandunta je”.
^ O “astaka kʼamakurhiaka tiempu”. Exe je Glosario, tiempu.
^ Nombri ma enga Satanásini arhikuekajka, enga jindeeka demoniuecheeri juramuti.
^ O “tsípikuani”, indenisï arhikuekani jati eska kʼuiripu ma uaaka ménderu irekani.
^ O “janhanharhi je”.
^ Exe je Glosario, Jeena.
^ O “moneda ma jimbo enga sántku jukaparhaka”. Griegu jimbo: “tsimani asarioniicha”.
^ Exe je Glosario, chkari enga jindeeka para no sési nitamakuarhini.
^ O “almani”.
^ O “profetani”.
