Mateu 12:1-50
-
Jesúsi ‘Juramutiisti sábadu jurhiatikueri’ (1 a 8)
-
Ambakerantasïndi achamasïni ma enga no ueenga máechakua jájki manatani (9 a 14)
-
Jántspiri enga Tata Diosï xáni xénchajka (15 a 21)
-
Petarpiantasïndi demoniuechani espiritu santu jimbo (22 a 30)
-
Pekadu enga no puáminhantajka (31 ka 32)
-
Frutu jimbo xarharasïndi na enga jásïika anhatapu (33 a 37)
-
Ambe enga Jonási nitamakuarhika mínda máesti (38 a 42)
-
Enga no sési jásï espiritu ma incharhintajka kʼuiripuni ma (43 a 45)
-
Jesúsiiri amamba ka ermanu jémbeecha (46 a 50)
12 Jiánisï, sábadu* ma jimbo, Jesúsi jimeesïsï nitamaspti nani enga trigu jukapka ka imeeri chúxapatiichaksï ueenaspti kʼarhimani, ísï jimbo, ueenasptiksï pʼikuani máru píntsïteechani ka semiia akuakuni.
2 Engaksï fariseuecha ini ambe exepka, arhisptiksï: “¡Exe! Chiiti chúxapatiichaksï imani ambe úxati enga no sési jaka para úni sábadu jurhiatikua jimbo”.
3 Jesúsi arhiaspti: “¿Andi nójtsï arhintaxaki ambe enga úpka Dabidi jiáni enga ima ka ima achamasïicha engaksï imani jingoni jámani japka niárapka kʼarhimani?
4 ¿Andi no inchaspi Tata Diosïiri kʼumanchikuarhu, ka ima ka ima achamasïicha engaksï imani jingoni jámani japka auaani imani kurhindeechani engaksï jindeepka para kéjtsïtani? Ka imaksï no sésikua jatsispti para indeni ambe úni, saserdotiichajkuksïsï újti arhani.
5 Ístu, ¿andi nójtsï arhintaski ambe enga karakata jaka Leirhu? Jima enga arhijka eskaksï sábaduechani saserdotiicha ánchikuarhisïnga templurhu ka indeni ambe jimboksï no no sési ambe exeminhasïndi.
6 Joperu jíksïni arhisïnga eskajtsï ixú jatsiska ambe ma enga sánderu kʼéri ambeeka eska templu.
7 Engajtsï kurhangupiringa ambe enga arhikuekajka ari ambe: ‘Uékasïnga eskajtsï pʼamojpeaka ka no eskajtsïni kéjtsïtakua ambe úchiaka’, nójtsï kʼamanharhitaantapiringa imeechani engaksï no ma ambe no sési úka.
8 Jimboka Achamasïiri Uájpa Juramutiiska sábadu jurhiatikueri”.
9 Ísï tátsekua enga Jesúsi na kéndikupkia jima uératini, inchaspti jima engaksï judiuecha tánguarhijka para Tata Diosïni kómarhini,
10 ka jima jarhaspti achamasï ma enga no ueenga máechakua jájkini manatani.* Ísï jimbo, paraksï úni no sési ambe uandani Jesúsiiri ambe, kurhamarhisptiksï: “¿Sési jarhaski ambakerantani nemani sábadu jurhiatikua jimbo?”.
11 Ka ima arhiaspti: “Engajtsï chá jatsipiringa karichini ma ka i posurhu ma uekanheni sábadu jurhiatikua ma jimbo, ¿chá no nipirini pʼínhantani?
12 ¡Kʼuiripu ma sánderu jukaparhasti eska karichi ma! Ísï jimbo, sési jarhasti ambakiti ambe úni sábadu jurhiatikua jimbo”.
13 Jimajkani arhispti achamasïni: “Iójkurhantsï”. Enga ima iójkurhantapka, ambajkurhantaspti ka imeeri jájki sési niántaspti ísï eska máteru.
14 Joperu fariseuechaksï uéntaspti jima uératini ka ueenasptiksï jirinhakuntani néna uándikuni.
15 Jesúsi niáraspti míteni ini ambe, jimbosï kéndikupti jima uératini. Uánikua kʼuiripuechaksï niraspti chúxapani ka ima iáminduechani ambakeraantaspti.
16 Joperu arhiaspti eskaksï no nemani jámapiringa aianguni neespi ima.
17 Ísï niárasti úkuarhini ambe enga uandakata japkia Isaíasini jimbo, Tata Diosïiri uandakua pári:*
18 “Exe je, i jindeesti juchiiti jántspiri engani ji erakuka, engani xáni xénchajka, engani jaiapanhentajka.* Íntskuaka juchiiti espiritu santuni ka i aianguauati ireteechani ambesï sési jaki para úni.
19 No nemani jingoni arhirperaati nijtu uinhachaa. Ka no nema kurhachakuati kʼérati xanharuechani jimbo.
20 No kuarhakuati imani pʼatamuni enga sánisï kuarhakurhitini jakaia nijtu pátaa imani jítani enga sánderku tixarani* jakaia asta jiáni enga na sési peentaakia ambe enga no sési jaka.
21 Sési jimbo, iámindu kʼuiripuechaksï ambakiti ambe erokuarhini jauati imeeri nombrini jimbo”.
22 Jimajkani, juákusptiksï acheetini ma enga demoniu ma incharhitini japka, acheeti no úsïreendi exeni nijtu uandani. Ka Jesúsi ambakerantaspti ka ima úspti exeni ka uandani.
23 Iámindu kʼuiripuechaksï ísku pakaraspti ka ueenasptiksï uandani: “¿O inde jindee Dabidi Uájpa?”.
24 Engaksï fariseuecha kurhaapka ini ambe, uandasptiksï: “I petarpiantasïndi demoniuechani Belsebúni* jimbo enga jindeeka demoniuecheeri juramuti”.
25 Míteparini ambe engaksï eratseni japka, Jesúsi arhiaspti: “Enga juramukua ma jimbo kʼuiripuechaksï no májku kʼéri jarhajka ka ueenanksï uarhiperani, juramukua niárasïndi kʼamakurhini, ka ireta ma jimbo o kʼumanchikua ma jimbo engaksï kʼuiripuecha no májku kʼéri jarhajka ka ueenanksï uarhiperani, ístuksï niárasïndi kʼamakurhini.
26 Májkueni, enga Satanási petarhitantajka Satanásini, ima mismu jingoni uarhiperasïndi. Enga ísïika, ¿andi no niáraa kʼamakurhini imeeri juramukua?
27 Ístu, engani ji Belsebúni jimbo petarpiantajka demoniuechani, ¿chaari chúxapatiichaksï néni jimbo petarpiantasïni? Jiájkani, chaari mismu chúxapatiichaksïni arhiati ambe engajtsï no sési úni jaka.
28 Joperu engani ji Tata Diosïiri espiritu santu jimbo petarpiantajka demoniuechani, jiájkani jindeesti jimbokajtsï chá no erokuarhixapka Tata Diosïiri Reinuni.*
29 Ístu, enga nema uékaska inchaakukuni achamasï uíuinhasïni ma para sïpakuni imeeri jatsikuarhekua ambe, orheta jatsisti para jójkuni ka jóndukuni, ¿no ísïiski? Solu ísï uaati sïpakuni ambe ma kʼumanchikuarhu.
30 Ima enga no jíndeni jingoniika, ikiachesïndireni ka ima engareni no jarhuatajka parajtsïni máteruecha andarhierani, úsïndi eskajtsïni kʼuiripuecha sánderu jarhariaka.
31 ”Jimboksïnisï arhijka eskaksï kʼuiripuecha puáminhantaaka náki uéjki pekaduni ka ístu engaksï no sési ambe uandaaka imeeri ambe enga pímbinhasïika. Joperuksï kʼóru méntku no puáminhantaati imeecha engaksï no sési ambe uandaaka espiritu santueri ambe.
32 Ima enga no sési ambe uandaaka Achamasïiri Uájpeeri ambe, puáminhantaati imeeri pekaduni; joperu ima kʼóru méntku no puáminhantaati enga no sési ambe uandaaka espiritu santueri ambe, méntku nómbe, ni ini tiempu jimbo nijtu sánderu orhepani.*
33 ”Engajtsï kuidariiska anhatapuni ma, ambanharhi frutu jukaati, joperu engajtsï no kuidariiska anhatapuni, no ambanharhi frutu jukaati. Jimboka frutu jimbo xarharasïnga na enga jásïika anhatapu, sini ambakitiiski o nómbe.
34 Akuitsi uájpeecha, ¿nénajtsï uaa ambakiti ambe uandani ka jinijtsï no sési úriini? Jimboka kʼuiripu ma uandasïnga ambe enga xáni mintsitarhu jatsijka.
35 Ambakiti kʼuiripu ma, ambakiti ambe uandasïndi jimboka ambakiti ambe jatsiska imeeri mintsitarhu, ka no sési úri ma, no sési jásï ambe uandasïndi jimboka no sési jásï ambe jatsiska imeeri mintsitarhu.
36 Jíksïni arhisïnga eska ima Jurhiatikua enga Tata Diosï Jusgarpiaka, kʼuiripuechaksï jatsiati para uandantani andiksïsï imani ambe uandajki enga no marhuajka.
37 Jimboka engari ambakiti ambe uandaska, Tata Diosïkeni ísï exeati komueska kʼuiripu ma enga sési jámajka, joperukeni no sési ambe exechiati engari no sési ambe uandaska”.
38 Jiájkani máru karariicha ka fariseuechaksï arhispti: “Jorhentpiri, uékasïngachi eskajtsïni mínda* ma exeraaka”.
39 Ka Jesúsi arhiaspti: “Iásï anapu kʼuiripuecha engajtsï xáni no kurhajchajka Tata Diosïni ka no sési úriini, chájtsï méntku uékani jarhasïnga mínda ma exeni joperujtsï no ma exeaka, ima ambejku enga Jonási nitamakuarhipka, Tata Diosïiri uandakua pári.
40 Jimboka ísï eska Jonási na tanimu jurhiatikua ka tanimu chúrikua kʼéri kurucheeri sïturhi jimbo japka, ístu Achamasïiri Uájpa tanimu jurhiatikua ka tanimu chúrikua inchatsetini jauati.
41 Jiáni enga Tata Diosï jusgarpiaka, Nínibe anapuechaksï májku kʼéri tsíntaati iásï anapu kʼuiripuechani jingoni ka xarhataatiksï eskaksï i kʼuiripuecha no sési úriiska. Jimbokaksï Nínibe anapuecha móantaspka engaksï kurhaapka ambe enga Jonási aianhpini japka. Joperu exe je, ixú jarhasti nema enga sánderu kʼéri ambeeka eska Jonási.
42 Jiáni enga Tata Diosï jusgarpiaka, surirhu anapu reina májku kʼéri tsíntaati iásï anapuechani jingoni ka xarhataati eskaksï i kʼuiripuecha no sési úriiska. Jimboka ima iauanisï uératini jurhaspka para kurhaani na enga xáni jánhaskatiipka Salomóni. Joperu exe je, ixú jarhasti nema enga sánderu kʼéri ambeeka eska Salomóni.
43 ”Enga no sési jásï espiritu ma uérhintajka kʼuiripuni ma, jámasïndi jirinhani nani enga uaaka mintsikuarhini jimeesïsï enga kʼarhikʼarhindeka, joperu no nani úsïndi mintsikuarhini.
44 Jimajkani uandasïndi: ‘Kʼuanhatsentaaka jucheeni nani engani uéntaka’. Ka enga na niántajkia, exesïndi eska no nema jarhaska, eska kʼarhatakata jarhaska ka sési jándu.
45 Jimajkani nirasïndi ka kʼuanhatsentasïndi máteru siete espirituechani jingoni engaksï sánderu no ambarhaka eska ima, ka engaksï na incharhijkia kʼuiripuni, jimaksï pakarasïndi irekani. Ka i kʼuiripu sánderu no sési uéranchasïndi ka iásï sánderu no sési jarhasïndia eska ueenani jámani. I ambeksïsï úkuarhinchaati iásï anapu kʼuiripuecha engaksï xáni no sési úriika”.
46 Enga Jesúsi kʼuiripuechani jingoni uandontskuarheni japka, imeeri amamba ka ermanu jémbeechaksï uérakua jarhaspti ka uékasïreendiksï imani jingoni uandontskuarheni.
47 Jimajkani nema arhispti: “Exe, chiiti naandi ka chiiti ermanuechaksï uérakua jarhasti ka tʼungini jingonksïnha uékasïndi uandontskuarheni”.
48 Ka Jesúsi arhispti imani kʼuiripuni: “¿Né jindeeski juchiiti naandi ka néksï jindeeski juchiiti ermanuecha?”.
49 Ka imeeri chúxapatiichani tʼantsirapariani, uandaspti: “¡Exe! ¡Íksï jindeesti juchiiti naandi ka juchiiti ermanuecha!
50 Jimboka ima enga újka ambe enga uékajka juchiiti Taati enga auandarhu jaka, ima jindeesti juchiiti ermanu, juchiiti pirenchi ka juchiiti naandi”.
Notecha
^ Exe je Glosario, sábadu.
^ Griegu jimbo: “enga kʼarhijkurhatini japka”.
^ O “profeta Isaíasini jimbo”.
^ O “ima jindeesti engani ji jaiapanhentaka”.
^ O “érhuni”.
^ Nombri ma enga Satanásini arhikuekajka.
^ O “jimbokaksïni janocheskia Tata Diosïiri Reinu”.
^ O “nijtu imani tiempu jimbo enga jurhani jaka”. Exe je Glosario, tiempu.
^ O “seniali”.
