Mateu 14:1-36
14 Imani jurhiatikuechani jimbo, Erodesi* enga Galileaisï juramuni japka, niáraspti míteni ambe enga xáni uandanheenga Jesúsiiri ambe
2 ka arhiaspti imeeri jántspiriichani: “Inde achamasï Juanuesti, enga itsï atauenga* kʼuiripuechani, tsítanhantastia ka jimbosï újti indeni milagruechani uaani”.
3 Ka jimboka Erodíasi ísï arhispka, Erodesi jupirkuarhispti Juanuni, jótaspti kadeneechani jimbo ka ónhatarkuarhispti. Erodíasi Filipu témbeespti, ka Filipu, Erodesiiri ermanu jémbeespti.
4 Jimboka Juanu méntku arhixapka: “No sési jarhasti engari Erodíasini tembuka”.
5 Erodesi uékasïreendi uándikuni Juanuni, joperu chérhiasïreendi kʼuiripuechani jimbokaksï imeecha ísï exesïreenga Juanuni komueska Tata Diosïiri uandakua pári.*
6 Joperu jiáni engaksï kʼuínchikua úkuntani japka Erodesini, jimboka máteru uéxurhini andangutaxapka,* uátsï ma, Erodíasi uájpa, uarhaspti imani kʼuínchikuarhu ka Erodesi kánikua tsitispti na enga uarhapka,
7 jimbosï aiakupti uátsïni eska íntskupiringa ambe enga kurhakupiringa,
8 ka jimboka imeeri amamba ísï arhistakuspka, uátsï arhispti: “Juácherini ixú, charola ma jimbo, Juanueri éjpuni, imeeri enga itsï ataajka kʼuiripuechani”.
9 Jimajkani juramuti kómu pʼikuarheraspti, joperu jimboka tʼuini ísï aiakuspkia imeechani japarini engaksï jima japka,* uandaspti eskaksï juákupiringa.
10 Ísï jimbo, juramuspti eskaksï nipiringa kachujchakuni Juanuni jima enga ónhakuarhetini japka.
11 Jimajkani juákusptiksï charola ma jimbo Juanueri éjpuni ka íntskusptiksï uátsïni ka ima amambani pákuspti.
12 Tátsekuaksï jurhaspti Juanueri chúxapatiicha ka pásptiksï Juanueri kuerpuni ka jatsintasptiksï. Tátsekuaksï niraspti Jesúsini aianguni.
13 Enga Jesúsi mítepka ini ambe, kéndikuspti jima uératini ka barku jimbo niraspti nani enga pínandipka* para úni jandiajku jarhani. Joperu engaksï kʼuiripuecha mítepka, uápurisï anapuechaksï niraspti chúxapani xanharakuarhiparini.
14 Enga na niárapkia marirhu uanamukuteni, exeaspti uánikua kʼuiripuechani ka jimboka mintsita jingoni pʼamojkuaspka ambakeraantaspti imeechani engaksï pʼamenchani japka.
15 Joperu enga inchatiruepkia, imeeri chúxapatiichaksï andarhieraspti ka arhisptiksï: “Iauanchi jámaxaka ka chúrixatiia. Axaantia kʼuiripuechani paraksï ireteecharhisï nirani ka paraksï tʼirekua ambe piákuarhini”.
16 Joperu Jesúsi arhiaspti: “Nóksï jatsisti para níntani. Chá íntsaa je ambe ma paraksï tʼireni”.
17 Imeechaksï arhispti: “Jucha solu sinko kurhinda kámaxaka ka tsimani kurucheechani”.
18 Ka Jesúsi arhiaspti: “Juácheajtsïni je”.
19 Jimajkani arhiaspti kʼuiripuechani eskaksï uaxaakupiringa. Tátsekua pʼíkuaspti sinko kurhindeechani ka tsimani kurucheechani ka kómarhispti Tata Diosïni* auandarhisï erancheparini. Ka enga na arhukuapkia kurhindeechani, imeeri chúxapatiichani íntsaaspti ka imeechaksï kʼuiripuechani íntsaaspti.
20 Ísï jimbo, iáminduechaksï tʼirespti ka sésiksï uiniarhaspti. Tátsekuaksï tánantaspti kurhindani enga pakarapka ka 12 tsïkiataksï uinirini tánantaspti.
21 Ma 5 mili achamasïichaksï tʼirespti ka ístu uarhiitiicha ka sapiicha.
22 Jimajkani jirejiresï arhiaspti imeeri chúxapatiichani eskaksï barkurhu jatapiringa paraksï úndani jiniani uanamukuteni nirani enga jamberi ima uandanuantapiringa kʼuiripuechani.
23 Enga na uandanuantapkia kʼuiripuechani, jandiajku karhamaspti juátarhu para Tata Diosïni kómarhini. Enga na chúripkia, ima útasï jima jarhaspti jandiajku.
24 Ima jandorisï, barku iauani niraxaptia marirhu, joperu oleechaksï no sési páxapti barkuni jimboka no sési tarhiaxapka.
25 Joperu enga nótki erandeni japka,* Jesúsi niraspti andarhieraani ka xanharapaspti marirhisï.
26 Engaksï imeeri chúxapatiicha exepka eska ima marirhisï xanharaxapka, chérakuarhesptiksï ka uandanksï: “¡Chérpiri máesti!”. Ka méntkuksï ísï uinhachaspti xáni chéni.
27 Joperu Jesúsi jirejiresï arhiaspti: “¡Asï uandanhia je! Jiiska. Asï ché je”.
28 Ka Pedru kurhakuspti: “Tata, engari tʼueka, ióarhireni parakeni nirani andarhierani itsïirhisï xanharaparini”.
29 Jesúsi arhispti: “¡Ju!”. Jimajkani Pedru kétsespti barkurhu ka niraspti Jesúsini andarhierani itsïirhisï xanharaparini.
30 Joperu chéspti enga exepka na enga xáni uinhamu tarhiani japka, ka jimboka ueenaspkia inchameni,* uinhachaspti: “¡Tata, pʼímantareni!”.
31 Jesúsi jirejiresï ióxurhantaspti, jupikaspti ka arhispti: “Achamasï engari xáni sántku mintsikajka, ¿andiresï ché?”.
32 Ka nóteru tarhiasptia engaksï imeecha na jatantapkia barkurhu.
33 Jimajkani, imeecha engaksï barkurhu nirani japka, kʼéri ambeksï arhispti* ka arhisptiksï: “Tʼuri sési jimbo Tata Diosïiri Uájpeeska”.
34 Ka engaksï na parhimepkia marirhu, Jenesaretisïksï niáraspti.
35 Ka engaksï jimeesïsï anapu achamasïicha mítentapka, iápurisïksï uandantaspti eska Jesúsi jimeesïsï jámaxapka ka juákuasptiksï iámindu imeechani engaksï pʼamenchani japka.
36 Ka kurhakusïreendiksï eska jurajkuapiringa paraksï sikiera imeeri xukuparhakuani jupirhukukuni, ka iáminduecha engaksï xáni pʼárhienga, ambakentasïreendiksï.
Notecha
^ Ixú Erodesi Antipasini arhikuekaxati. Exe je Glosario, Erodesi.
^ Exe je Glosario, itsï atakuarhini; itsï atani.
^ O “profeta ma”.
^ O “imeeri kumpleaniuespka”.
^ O “engaksï imani jingoni uaxaparhakupka mesarhu”.
^ O “piindipka”.
^ O “ka újchakuraspti”.
^ Griegu jimbo: “kuarta bijilia jimbo”. Tresi de la manianisï asta enga erandeni jarhajkia, sáno seisi de la manianisï.
^ O “jirhimeni”, “súmeni”.
^ O “tinguixurhikusptiksï”.
