Mateu 15:1-39
-
Jesúsi uandasïndi eska no sési jarhaska ambe engaksï kʼuiripuecha pʼindeka úni (1 a 9)
-
Ambe enga tsïjpajka kʼuiripuni ma mintsitarhu uérasïndi (10 a 20)
-
Na enga xáni mintsikajka Fenisia anapu uarhiiti ma (21 a 28)
-
Jesúsi uánikua pʼamenchatiichani ambakeraantasïndi (29 a 31)
-
Tʼireraasïndi 4 mili achamasïichani (32 a 39)
15 Jimajkani andarhierasptiksï Jesúsini máru fariseuecha ka karariicha engaksï Jerusaléni uératini jupka ka arhisptiksï:
2 “¿Andiksïsï chiiti chúxapatiicha no újki ambe engaksï ióntki anapuecha pʼindepka úni? Exe, nóksï jupajkukuarhesïndi* para tʼireni”.
3 Jesúsi arhiaspti: “¿Ka andijtsïsï no újki ambe enga Tata Diosï juramujka ka sánderujtsï úni ambe engajtsï chá pʼindeka úni?
4 Jimboka Tata Diosï uandaska: ‘Janhanharhi chiiti taatini ka chiiti naandini’ ka ‘Uándikunhaati ima enga no sési ambe uandaaka taati jémbeeri o amambeeri’.
5 Joperujtsï chá uandasïnga: ‘Ima enga arhiaka taati jémbani o amambani “Iámindu ambe engani jatsika engakeni jimbo úpiringa jarhuatani, intsïmperata máesti engani Tata Diosïni aiakuka”,
6 inde kʼuiripu nóteru jatsistia para jarhuataani taati jémbeechani’. Jiájkani chaari pʼindekua ambe jimbo, chájtsï nóteru úxakaia ambe enga Tata Diosïiri uandakua arhijka.
7 Ísku apariicha, jimbosï Isaíasi tʼuini uandarini japtia chaari ambe:
8 ‘I kʼuiripuechajtsïni uandakua jimbojku kʼéri ambe arhisïndi, joperujtsïni no mintsita jingoni xénchasïndi.
9 Méntku no marhuasïndi engajtsïni ísï kʼéri ambe arhini jarhajka, jimbokaksï jorhentpisïnga imani ambe engaksï kʼuiripuecha juramujka’”.
10 Jimajkani arhiaspti kʼuiripuechani eskaksï andarhierapiringa ka uandaspti: “Kurhaa je ka kurhangunta je ambe engani ji uandani jaka:
11 no akua ambesï tsïjpajti kʼuiripuni ma, sino ambe enga uandajka; inde ambesï tsïjpajti”.
12 Jimajkani andarhierasptiksï imeeri chúxapatiicha ka arhisptiksï: “¿Exeskiri? Fariseuechaksï no sési exesti engaksï kurhaaka ambe engari uandaka”.
13 Jesúsi arhiaspti: “Ima planta enga no juchiiti Taati auandarhu anapu jatsintaka murutanhaati.
14 Ísï jimbo, ísku exea je. Orhekupaasïndiksï kʼuiripuechani joperuksï no úsïndi exeni. Ka enga jauaka kʼuiripu ma enga no újka exeni ka máteru kʼuiripuni orhekupani jarhani enga ístu no újka exeni, tsimarhanksï posurhu ma uekanheati”.
15 Jiájkani Pedru arhispti: “Aiangujtsïni amberi arhikuekaxaki indeni ejemplu jingoni”.
16 Ka Jesúsi mókukuspti: “¿Andi chájtu útasï no kurhanguxaki?
17 ¿Andi nójtsï exesïni eska ambe enga kʼuiripu ma arhajka sïturhirhu niárasïnga ka eska tátsekua petantasïnga?
18 Joperu ambe enga kʼuiripu ma uandajka mintsitarhu uérasïndi ka inde ambesï tsïjpajti.
19 Jimboka mintsitarhu uérasïnga no sési jásï eratsekua ambe, komueska uándikpini, ísku jándikua ambe* niátani, sïpani, chkuanderakua ambe uandantani ka ístu no sési jásï ambe uandani.
20 I ambesï tsïjpajti kʼuiripuni ma, joperu no nema tsïjpesïndi enga no jupajkutini* tʼireaka”.
21 Jesúsi kéndikuspti jima uératini ka niraspti Tiru ka Sidónisï.
22 Ka uarhiiti ma niáraspti enga Fenisia anapuepka ka uinhachaspti: “¡Pʼamojkureni sáni Tata, Dabidi Uájpa! Demoniu ma kánikua no sési kántaxati juchiiti nanakani”.
23 Joperu Jesúsi méntku no ma ambe arhispti. Jiájkani imeeri chúxapatiichaksï andarhieraspti ka arhisptiksï: “Arhi uarhiitini eska níntaaka, jimbokajtsïni chúxapuxaka ka méntku uinhachaxati”.
24 Ka Jesúsi uandaspti: “Ji Israeli anapu* karichiichani jimbojkusïni axanhaka engaksï tsïnchetini jámani jaka”.
25 Joperu uarhiiti andarhieraspti, tinguixurhikuspti* ka méntku úndaspti arhini: “¡Tata, jarhuatarini!”.
26 Ka Jesúsi mókukuspti: “No sési jarhasti uájpeechani euamukuani kurhinda para uíchu sapirhatiichani kʼuanikukuani”.
27 Ka uarhiiti arhispti: “Ísïisti Tata, joperuksï uíchu sapirhatiicha ántskantasïndi ambe engaksï kʼumanchikuarhu anapuecha uéjkujka”.
28 Jimajkani Jesúsi arhispti: “Uarhiiti, ¡xáni engari mintsikajka tʼu! Eska ísï úkuarhiaka eskari na kurhajkuarhini jaka”. Ka imeeri nanaka jirejiresï ambakentaspti.
29 Enga Jesúsi na kéndikupkia jima uératini, Galilea anapu marirhisï niáraspti ka juátarhu karhamaspti. Enga jima japka uaxakatini,
30 uánikua kʼuiripuechaksï andarhieraspti ka pákuasptiksï imeechani engaksï rengejteenga, imeechani engaksï no ueenga xanharani, imeechani engaksï no ueenga exeni, engaksï no ueenga uandani ka ístu uánikua pʼamenchatiichani. Kétsekuaksï peerakuasïreendi ka ima ambakeraantasïreendi.
31 Ka kʼuiripuechaksï ísku pakaraspti engaksï exepka eskaksï imeecha engaksï no ueenga uandani úsïreengaksïa uandani, imeecha engaksï no ueenga xanharani úsïreendiksïa xanharani ka imeecha engaksï rengejteenga sésiksï xanharasïreendia ka imeecha engaksï no ueenga exeni exesïreendiksïa ka kʼéri ambeksï arhispti Israeli anapu Tata Diosïni.
32 Jiájkani, Jesúsi ióarhiaspti imeeri chúxapatiichani ka arhiaspti: “Mintsita jingoni pʼamojkuasïnga ini kʼuiripuechani, jimbokaksï tanimu jurhiatikua jámaskia jíndeni jingoni ka nóksï ambe ma kámaxati para arhani. No uékasïnga ísku* axaantani paraksï no xanharu jimbo mirikurhini”.*
33 Joperu imeeri chúxapatiichaksï arhispti: “Iauanchi jámaxaka... ¿Nanichi pʼiua xáni uáni kurhinda parachi xáni uánikua kʼuiripuni íntskuni?”.
34 Jimajkani Jesúsi arhiaspti: “¿Namuntsï kurhinda kámaxaki?”. Imeechaksï mókukuspti: “Siete echakua, ka namunitu kurucha sapirhatiichani”.
35 Ka enga na arhipkia kʼuiripuni eska uaxandepiringa,
36 pʼíkuspti siete echakua kurhinda ka kurucheechani, diosmaiamukua arhispti Tata Diosïni, arhukuaspti ka íntsaaspti imeeri chúxapatiichani paraksï kʼuiripuechani intsïtaani.
37 Iáminduechaksï tʼirespti ka sésiksï uiniarhaspti. Ka tánantasptiksï kurhindani enga pakarapka ka siete kʼérati tsïkiataksï uinirini tánantaspti.
38 Ka 4 mili achamasïichaksï tʼirespti ka ístu uarhiitiicha ka sapiicha.
39 Tátsekua, enga na axaantapkia kʼuiripuechani, barkurhu ma jataspti ka Magadánisï niáraspti.
Notecha
^ Fariseuecha ka judiuechaksï pʼindespti jupajkukuarheni joperuksï imeecha újtsïkuarhespti indeni pʼindekuani.
^ Uandakua enga griegu jimbo jindeeka pornéia, uánikua ambe arhikuekasïndi. Exe je Glosario, ísku jándikua ambe.
^ Fariseuecha ka judiuechaksï pʼindespti jupajkukuarheni joperuksï imeecha újtsïkuarhespti indeni pʼindekuani.
^ O “Israeliiri kʼumanchikuarhu anapu”.
^ O “kʼéri ambe arhispti”.
^ O “no ma ambe aparini”, “no tʼirerini”.
^ O “desmaiarikuarhini”.
