Mateu 16:1-28
16 Enga jima japkia, andarhierasptiksï fariseuecha ka saduseuecha, ka paraksï tsʼéjkuni, arhisptiksï eska exeraapiringa auandarhu anapu mínda* ma.
2 Jesúsi arhiaspti: “Enga inchatiruejkia, chájtsï uandasïnga ‘Sési jánhaskuarhiati jimboka charhacharhancheska’.
3 Ka tsípajtsï chá uandasïnga ‘Iásï tsʼirakuarhiati ka janiati jimboka auanda charhacharhancheska, joperu ónharhisti’. Chájtsï míteska na enga jánhaskuarhiaka jimbokajtsï exesïnga auandani, joperujtsï no úsïnga kurhanguni ambe enga ini jurhiatikuechani jimbo úkuarhini jaka.
4 Iásï anapu kʼuiripuecha engajtsï xáni no kurhajchajka Tata Diosïni ka no sési úriini, chájtsï méntku uékani jarhasïnga mínda ma exeni joperujtsï no ma exeaka, imani ambejku enga Jonási nitamakuarhipka”. Enga na ísï arhiapkia, kéndikuspti ka jima jurajkuaspti.
5 Jimajkani, nirasptiksï jiniani uanamukuteni, joperu imeeri chúxapatiichaksï mirikurhispti kurhinda páni.
6 Jesúsi arhiaspti: “Xéparini je ka jingontku jáma je fariseuecheeri ka saduseuecheeri xarhipiti* jingoni”.
7 Jimajkani, úndasptiksï arhijperani: “Nóchi juáska kurhinda”.
8 Enga Jesúsi kurhajchaapka, arhiaspti: “Achamasïicha engajtsï xáni sántku mintsikajka, ¿andijtsïsï uandani jaki eskajtsï no juáska kurhinda?
9 ¿Andi útasïjtsï no úsïni kurhanguni? ¿Nóterujtsï miásïnia eska sinko kurhinda andanguspka para 5 mili achamasïichani tʼireraani ka eskajtsï tsïkiateechani jimbo tánantaspka kurhindani enga pakarapka?
10 ¿Ka nóterujtsï miásïnia eska siete kurhinda andanguspka para 4 mili achamasïichani tʼireraani ka eskajtsï kʼérati tsïkiateechani jimbo tánantaspka imani kurhindani enga pakarapka?
11 ¿Andijtsïsï no kurhangu eskaksïni ji no kurhindeeri ambesï arhini japka? Ambe engaksïni ji arhipka, jindeesti eskajtsï jingontku jámaaka fariseuecheeri ka saduseuecheeri xarhipiti* jingoni”.
12 Jiánksïsï kurhanguptia eska Jesúsi no arhiaxapka eskaksï jingontku jámapiringa imani xarhipiti* jingoni enga kurhindarhu jukajka, sánderu sési, imani ambe jingoni engaksï fariseuecha ka saduseuecha jorhentpienga.
13 Enga na niárapkia Sesarea de Filipuisï, Jesúsi kurhamarhiaspti imeeri chúxapatiichani: “¿Na uandasïni kʼuiripu eska neeska Achamasïiri Uájpa?”.
14 Imeechaksï arhispti: “Máruksï uandasïndi eska Juanueska, ima enga itsï atauenga* kʼuiripuechani. Máteruechaksï uandasïndi eska Elíasiiska ka máteruecha eska Jeremíasiiska o eska máteru Tata Diosïiri uandakua páriiska”.*
15 Ima arhiaspti: “¿Ka chá na uandasïni eskani neeski ji?”.
16 Simóni Pedru arhispti: “Tʼuri jindeeska Kristu, Tata Diosïiri Uájpa, ima Tata Diosïiri enga tsípiti jaka”.
17 Ka Jesúsi arhispti: “Xáni sési tʼungini jimbo Simóni, Jonási uájpa, jimbokakeni no kʼuiripusï ma* aianguti indeni ambe, sino juchiiti Taati enga auandarhu jaka”.
18 Ístu arhispti: “Tʼuri jindeeska Pedru ka ini kʼerendani jimbo uaxastaaka juchiiti kúnguarhikuani ka uarhikueri uinhapikua* no uaati andani.
19 Jíkeni íntsauaka auandarhu anapu Reinueri iabeechani. Ambe uéjki engari echerirhu míkaaka,* tʼuini míkuarhetini jauatia auandarhu. Ka ambe uéjki engari echerirhu mítaaka,* tʼuini mítakuarhetini jauatia auandarhu”.
20 Jimajkani, arhiaspti imeeri chúxapatiichani eskaksï no nemani jámapiringa aianguni eska ima jindeespka Kristu.
21 Jiáni uératini, Jesúsi ueenaspti arhiani imeeri chúxapatiichani eska jatsispka para Jerusaléni nirani ka eskaksï kánikua no sési kámapiringa orhejtsïkutiicha, kʼérati saserdotiicha ka ístu karariicha ka eska uándikunhapiringa ka tanimu jurhiatikua jimbo tsítanhantani.*
22 Pedru támu páspti ka ueenaspti xukani: “¡Tata, pʼamojkukuarhi sáni! Tʼuri no méni ísï nitamakuarhiaka”.
23 Joperu Jesúsi pʼirhipakuarhespti ka arhispti Pedruni: “¡Kéndikucherini Satanási! Jimbokarini ójkutaxaka parani úni ambe engani jatsika para úni. Jimbokari no ísï eratsesïnga eska Tata Diosï sino ísï eskaksï kʼuiripuecha”.
24 Jimajkani, Jesúsi arhiaspti imeeri chúxapatiichani: “Engareni nema uéjka chúxapuni, eska ísku exekuarhiaka,* eska tarhatakuarhiaka imeeri chkarini enga jindeeka para no sési nitamakuarhini* ka eskarini méntkisï chúxapaaka.
25 Jimboka ima enga uékaaka kuájchakuni imeeri tsípikuani,* masi uaati tsïtani. Joperu ima enga tsïtaaka imeeri tsípikuani jimboka juchiiti chúxapatiiska, ménderu niáraati tsípikua jatsini.
26 Jimboka, ¿ambe marhuakua kʼuiripuni ma enga niáraska iámu parhakpinini andani, joperu tsïtani imeeri tsípikuani? ¿O ambe uaa íntspini kʼuiripu ma para kuájchakuni imeeri tsípikuani?
27 Jimboka Achamasïiri Uájpa, juuati Taati jémbeeri juramukua jingoni ka imeeri ánjeliichani jingoni. Ka kastigariauati imeechani engaksï no sési ambe niátajka ka kóndeantauati imeechani engaksï sési ambe újka.
28 Jíksïni sési jimbo arhisïnga eskaksï jarhaska máru ixú engaksï no uarhiaka astakaksï exeaka Achamasïiri Uájpani jurhani jarhani imeeri Reinurhu”.
Notecha
^ O “seniali”.
^ O “kʼúratarakua”.
^ O “kʼúratarakua”.
^ O “kʼúratarakua”.
^ Exe je Glosario, itsï atakuarhini; itsï atani.
^ O “eska máteru profeteeska”.
^ Griegu jimbo: “kʼuiripeta ka iurhiri”.
^ O “Tumbeeri puerteechaksï”. Griegu jimbo: “Adesiiri puerteechaksï”, indenisï arhikuekani jati jima engaksï uarhiriicha mintsikuarhini jaka, joperu inde lugari no nani jarhasti. Exe je Glosario, tumba.
^ Griegu jimbo: “jótaaka”.
^ Griegu jimbo: “kuerataaka”.
^ Griegu jimbo: “jauatanhantani”.
^ O “eska nóteru irekaakia para imajkumindu”.
^ Exe je Glosario, chkari enga jindeeka para no sési nitamakuarhini.
^ O “almani”.
