Mateu 18:1-35
18 Imani jurhiatikua jimbo, Jesúsiiri chúxapatiichaksï andarhieraspti ka kurhamarhisptiksï: “Jiájkani, ¿né sánderu kʼéri ambeeski auandarhu anapu Reinurhu?”.
2 Jimajkani Jesúsi ióarhispti tataka sapichuni ma, ka terujkani peeraspti
3 ka arhiaspti: “Jíksïni arhisïnga eska engajtsï no mójtakurhiska* ka ísïintsï komueskaksï sapiicha, nójtsï méni inchaaka auandarhu anapu Reinurhu.
4 Ísï jimbo, ima enga ísï kaxumbitiuaka komueska i tataka sapichu, ima sánderu kʼéri ambeuati auandarhu anapu Reinurhu
5 ka ima enga sési erokajka iini jásï tataka sapichuni ma jimboka juchiiti chúxapatiiska, ístureni jíndeni sési erokasïndi.
6 Joperu ima enga no sési ambe úraaka máisï ini sapirhatiichani engajtsïni jíndeni mintsikajka, sánderu sési nikupirindi imani kʼuiripuni engaksï molinurhu anapu tsakapu ma jójchakupiringa engaksï burruecha uantsïkujka ka eskaksï marirhu terumikua kʼuanimapiringa.
7 ”¡Lástima parhakpini anapu ambe enga újka eska kʼuiripu no sési ambe niátaaka!* Ísïisti, nóchi ambe ma uaaka úni para no jarhani ima ambe enga újka eska kʼuiripu no sési ambe niátaaka, joperu, ¡lástima ima kʼuiripu enga újka eska máteru nema no sési ambe niátaaka!
8 Ísï jimbo, engakeni chiiti jájki o chiiti jantsiri no sési ambe úraska,* kachujku o kachundu ka iauanisï kʼuanikua. Sánderu sésiisti eskari intsïnhaaka tsípikua nájkirukari nóteru jukaakia máechakua jájki o máechakua jantsiri ka eskari tsimani jájkiichani jingoni o tsimani jantsiriichani jingoni kʼuanijpanhaaka chpirirhu enga méntku no pátakuarhijka.
9 Ístu, engakeni chiiti éskua no sési ambe úraska,* pʼitanharhi ka iauanisï kʼuaniku. Sánderu sésiisti eskari intsïnhaaka tsípikua nájkirukari máechakua éskua jukaaka ka nóri tsimani éskuechani jingoni Jeenarhu* kʼuanijpanhani enga kurhini jaka.
10 Xéparini je parajtsï no ísku exeni máisï ini sapirhatiichani, jimboka jíksïni arhisïnga eska imeeri ánjeliichaksï jini auandarhu, méntkuksï erateni jarhasïnga* juchiiti Taatini enga auandarhu jaka.
11 *
12 ”¿Nájtsï exesïni? Enga achamasï ma 100 karichiichani kaani jauaka ka máechakuani tsïtani, ¿nójtsï exesïni eska juátarhu jurajkuauaka imani 99 karichiichani ka nirani jirinhantani imani enga tsïnchetini jámani jaka?
13 Ka enga exentaska, jíksïni sési jimbo arhisïnga eska sánderu tsípiaka imani jimbo ka eska máteru 99 karichiichani jimbo engaksï no tsïncheka.
14 Májkueni úsïndi juchiiti* Taati enga auandarhu jaka, jimboka ima no uékasïnga eska ma i sapirhatiicha niáraaka tsïncheni.
15 ”Ísï jimbo, engakeni chiiti erachi* no sési ambe úchika, ní ka jandiajku uandontskuarhi imani jingoni ka arhi ambe enga no sési úni jaka.* Engakeni chiiti erachi kurhajchaska, jarhuataakari para ménderu ambakiti ambe úni.
16 Joperu engakeni no kurhajchaska, ní ménderu ma o tsimani kʼuiripuechani jingoni, paraka ambe uéjki jarhani, tsimani o tanimu kʼuiripuecha uaaka uandantani eska iámindu ambe ísïiska.
17 Enga no kurhajchaaska ini kʼuiripuechani, kúnguarhikuani aiangu. Ka enga kúnguarhikuantu no kurhajchaska, jiájkani ísï exe komueska kʼuiripu ma enga no Israeli anapueka ka komueska impuestu kobrarpiti ma.
18 ”Jíksïni sési jimbo arhisïnga eska iámindu ambe engajtsï echerirhu míkaaka, tʼuini míkuarhetini jauatia auandarhu ka iámindu ambe engajtsï echerirhu mítaaka, tʼuini mítakuarhetini jauatia auandarhu.
19 Ístu, engajtsï tsimani kʼuiripuecha ixú parhakpinirhu eratsetini jauakia kurhajkuarhini ambe ma enga jukaparhakueka, jíksïni sési jimbo arhisïnga eska niáraaka ísï úkuarhini juchiiti Taatini jimbo enga auandarhu jaka.
20 Jimboka nani engaksï tsimani o tanimu kʼuiripuecha tánguarhitini jaka juchiiti nombri jimbo, jíjtuni jima jarhasïnga imeechani jingoni”.
21 Jiájkani Pedru andarhieraspti Jesúsini ka kurhamarhispti: “Tata, engareni juchiiti erachi niáraska no sési ambe úchini, ¿namuni xanhari jatsiski parani puákuntani? ¿Siete xanhari jamberi?”.
22 Jesúsi arhispti: “Nómbe, jíkeni no arhixaka eska siete xanharku, sino 77 xanhari jamberi.
23 ”Ísï jimbo, auandarhu anapu Reinu ísïisti komueska juramuti ma enga kuenta kurhakuantajka imeeri jántspiriichani.
24 Enga ueenapka kuenta kurhakuantani, juákusptiksï jántspirini ma enga 10 mili talentu* kánguni japka.
25 Ka jimboka jántspiri no jatsispka néna maiamuntani, juramuti uandaspti eskaksï atarantapiringa imani jántspirini, imeeri témbani ka uájpeechani ka ístu iámindu ambe enga xáni jatsikuarhepka para úni kuerajchani kántsperatani.*
26 Joperu jántspiri tinguixurhispti ka kómarhispti: ‘Erokareni sáni ka iámukeni maiamuntaaka’.
27 Ini ambe jimbo, juramuti kánikua pʼamojkuspti. Ísï jimbo, arhispti imani jántspirini eska níntapiringa ka eska nóteru ma kánguxapkia.*
28 Joperu enga jántspiri na uéntapkia, exentaspti máteru jántspirini enga 100 denariu kánguni japka, jupipchakuspti ka ueenaspti pirajchakuni ka arhispti: ‘¡Íntskuntareni iámu sentabu engareni káncheni jaka!’.
29 Ka i jántspiri tinguixurhispti ka kómarhispti: ‘Erokareni sáni ka jíkeni maiamuntaaka’.
30 Joperu ima no kasu úkuspti. Níntaspti ka ónhatarkuarhispti astaka iámu maiamuntapiringa.
31 Engaksï máteru jántspiriicha mítepka ini ambe, kánikuaksï no sési exespti ka nirasptiksï aianguni juramutini.
32 Jiájkani juramuti pʼitajkuarhispti jántspirini ka arhispti: ‘¡Jántspiri engari xáni no ambakeka! Jíkeni arhispka eskarini tʼu nóteru ma sentabu kánchexapkia jiáni engareni ísï kómarhipka.
33 ¿Nóri úpirini tʼujtu májkueni pʼamojkuni máteru jántspirini, ísï eskakeni ji na pʼamojkuka tʼungini?’.
34 Juramuti kánikua ikiaspti ka arhiaspti kárselirhu anapu kuáriichani eskaksï ónhapiringa astaka na iámu maiampintapiringa ambe enga xáni kántspeni japka.
35 Ka májkuenksïni kámaati juchiiti Taati enga auandarhu jaka engajtsï no mintsita jingoni puákuantaska chaari erachiichani”.
Notecha
^ O “kʼuanhatsentaska”.
^ O “eska kʼuiripu téksarhutaaka”.
^ O “enga chiiti jájki o chiiti jantsiri úska eskari téksarhutaaka”.
^ O “enga chiiti éskua úska eskari téksarhutaaka”.
^ Exe je Glosario, Jeena.
^ O “úsïngaksï andarhierani”.
^ Exe je ambe enga arhijka nota enga Mateu 17:21 jimbo jaka.
^ O jamberi “chaari”.
^ O “ermanu”.
^ Griegu jimbo: “xuka”.
^ Diesi mili talentu plateeri xániispti 60 miioni denariu.
^ O “maiampintani”.
^ O “puákuntaspti na enga xáni kánguni japka”.
