Mateu 19:1-30
19 Enga Jesúsi na uandapkia ini ambe, uéakuntaspti Galilea uératini ka jima niáraspti nani enga ueenakuarhijkia Judea, Jordánirhu parhikuteni.
2 Uánikua kʼuiripuechaksï niraspti chúxapani jima jamberi ka Jesúsi ambakeraantaspti pʼamenchatiichani.
3 Jimajkani, andarhierasptiksï máru fariseuecha engaksï uékeenga tsʼéjkuni ka kurhamarhisptiksï: “¿Sési jarhaski eska acheeti ma ísku jatini jurajkuaka témbani?”.*
4 Jesúsi arhiaspti: “Andi nójtsï méni arhintaski eska ima enga ueenakuarhu kuerauaka kʼuiripuechani, tatakani ka nanakani kueraaska
5 ka uandasti ‘Ísï jimbo, tataka jurajkuati taati jémbani ka amambani ka kúrhiati imeeri témbani* ka tsimarhanksï májku kuerpueuati’.
6 Ísï jimbo, nóteruksï tsimaniistia sino májku kuerpu. Jimajkani, ambe enga Tata Diosï kúndaka,* eska no ma kʼuiripu niáraaka jarharitani”.
7 Imeechaksï arhispti: “Jiájkani, ¿andisï Moisési juramupi eska acheeti sïranda ma úkupiringa témbani para jurajkuni* ka eska chútantapiringa?”.
8 Ima arhiaspti: “Moisésiksïni sésikua íntskuspti parajtsï jurajkuani chaari témbeechani* jimbokajtsï chá meru no kurhangusïnga.* Joperu ueenakuarhu no ísïispti.
9 Jíksïni arhisïnga eska ima enga jurajkuaka témbani,* joperu no ísku jándikua ambe jimbo,* ka máteru nemani tembuni, ísku jándikua ambe niátasïndi”.
10 Imeeri chúxapatiichaksï arhispti: “Engaksï ísï kámberajka acheeti ka uarhiiti, jiájkani sánderu sésiisti jandiajku jarhani”.
11 Ima arhiaspti: “Nóksï iáminduecha úsïndi indeni ambe úni, imeechajku engaksï ísï kóndenhaka.
12 Máruksï no tembuchasïndi* jimbokaksï ísï andajpenuska. Máteruecha jimbokaksï kʼuiripuecha úkuaska ambe ma. Joperuksï jarhasti máteruecha engaksï jandiajku eratsejka no tembuchani auandarhu anapu Reinu jimbo. Ima enga uaaka ísï úni, eska ísï uaaka”.
13 Jimajkani, juákuasptiksï máru sapiichani para ima újchakuraani* ka kómarhijpikuani. Joperu imeeri chúxapatiichaksï xukaaspti.
14 Ka Jesúsi arhiaspti: “Asï ambe ma arhia je sapiichani. Asï jáma je pʼínguani parajtsïni jurhani andarhierani, jimboka auandarhu anapu Reinu imeecheeriiska engaksï ísïika komueska i sapiicha”.
15 Tátsekua újchakuraaspti ka kéndikuspti jima uératini.
16 Jimajkani andarhieraspti achamasï ma ka kurhamarhispti: “Jorhentpiri, ¿ambe ambakiti ambe jatsiski parani úni parani jatsini tsípikua para méntkisï?”.
17 Ima arhispti: “¿Andirenisï jíndeni kurhamarhijki ambeeski ambakiti ambe? Májkusï jati enga ambakitiika. Joperu engari uéjka tsípikua jatsini, jatsiskari para méntkisï úni ambe engaksï mandamientuecha uandajka”.
18 Ima kurhamarhispti: “¿Ambe ka ambeeski?”. Jesúsi arhispti: “Asï jáma uándikpini, asï jáma ísku jándikua ambe niátani, asï jáma sïpani, asï jáma chkuanderakua ambe uandantani,
19 janhanharhi chiiti taatini ka chiiti naandini ka xénchaa máteru kʼuiripuechani* ísï eskari tʼujkumindu na xénchakuarhijka”.
20 Tumbi arhispti: “Ji desde iónisï úskia iámindu indeni ambe. ¿Ambeteruni uaa úni?”.
21 Jesúsi arhispti: “Engari uéjka méntku iámindu ambe sési úni, ní ka íntspikuarhi ambe engari xáni jatsikuarheka, ka imeechani íntsaa sentabu engaksï no ma ambe jatsikuarheka, ísï úparini, tʼuri auandarhu jatsiaka chiiti jatsikuarhekua ambe. Tátsekua jungua ka júreni chúxapuni”.
22 Enga ísï arhinhapka, tumbi kánikua kómu pʼikuarheraparini kéndikuspti jimboka uánikua ambe jatsikuarhespka.
23 Jimajkani, Jesúsi arhiaspti imeeri chúxapatiichani: “Jíksïni sési jimbo arhisïnga eska jatsikuarheri ma kánikua úkua jukanchaaka auandarhu anapu Reinurhu inchani.
24 Ka ménderuksïni arhisïnga eska sánderu fásiliiska eska kameiu ma pʼikukuarhisï inchajchakuaka ka eska jatsikuarheri ma Tata Diosïiri Reinurhu inchaaka”.
25 Ka imeeri chúxapatiicha, méntkuksï ísku pakareeraspti engaksï kurhaapka ini ambe ka uandasptiksï: “Jiájkani, ¿né uaa pʼímutantskata uérani?”.
26 Jesúsi erateaspti ka arhiaspti: “Kʼuiripuechaksï ísï exesïndi enajkiksï no méni uaa ini ambe úni, joperu Tata Diosï méntku iámindu ambe úsïndi úni”.
27 Jimajkani Pedru arhispti: “Exe, jucha méntku iámindu ambe jurajkuska paraksïni chúxapani. Jiájkani, ¿ambechi intsïnhaa?”.
28 Jesúsi arhiaspti: “Jíksïni sési jimbo arhisïnga eska jiáni enga niáraaka ima jurhiatikua enga iámindu ambe jimbanhi únhantaaka* ka jiáni enga Achamasïiri Uájpa uaxakaaka imeeri kʼéri uaxantskuarhu para juramuni, chá engajtsïni chúxapani jaka, chájtujtsï uaxakaaka 12 kʼéri uaxantskuecha jimbo parajtsï juramukuani ka jusgariuani 12 Israeli anapu ireteechani.
29 Ka ima enga jíndeni jimbo jurajkuaka imeeri kʼumanchikuani, ermanu jémbeechani, pirembeechani,* taati jémbani, amambani, uájpeechani o echeriichani, niáraati 100 uelta sánderu intsïnhantani ka jatsiati tsípikua para méntkisï.
30 ”Joperuksï uánikua engaksï iásï orheteeka, últimueuatiksï ka uánikua engaksï iásï últimueka, orheteuatiksï.
Notecha
^ O “diborsiarikuarhiaka témba jingoni”.
^ O “ka imeeri témba jingoni jauati”. Uandakua enga griegu jimboeka arhikuekaxati ambe ma enga sési mákuarhitini jaka.
^ O “májku uananchatarakua jimbo peeraka”.
^ O “para diborsiarikuarhini imani jingoni”.
^ O “parajtsï diborsiarikuarhini chaari témbeecha jingoni”.
^ Griegu jimbo: “jimboka chaari mintsita chopeska”.
^ O “enga diborsiarikuarhiaka témba jingoni”.
^ O “jimboka uarhiiti ísku jándikua ambe niátaska máteru acheeti jingoni”. Griegu jimbo pornéia. Exe je Glosario, enganiarpini; ísku jándikua ambe niátani.
^ Griegu jimbo: “eunukuesti”. Exe je Glosario, eunuku.
^ O “pʼájtsïkuani”.
^ O “xéncha chiiti prójimuni”.
^ O “ménderu kueraanhantaaka”.
^ O “ermaneechani”.
